ខេត្តមណ្ឌលគិរី ៖ បច្ចុប្បន្ននេះ កសិករចំនួន១២គ្រួសារដែលបានដាំសាកល្បងដំណាំដំឡូងបារាំងកំពុងមមារញឹកក្នុងការប្រមូលផល ខណៈមន្ទីរកសិកម្មរំពឹងថា នឹងមានកសិករបង្កើនការដាំដុះនាឆ្នាំនេះ ។
លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងថា កាលពីឆ្នាំ២០១៩ មន្ទីរបានឲ្យកសិករចំនួន១២គ្រួសារ សាកល្បងដាំដំណាំដំឡូងបារាំង ដោយប្រើប្រាស់ពូជចំនួន៤ផ្សេងៗគ្នា ហើយជាលទ្ធផល គឺទទួលបានផលល្អ ។ ចំណែកនៅឆ្នាំ២០២០នេះ លោកសង្ឃឹមថា នឹងមានការដាំដុះច្រើនជាងមុន ។
លោកប្រធានមន្ទីរបន្តថា កន្លងមក សាកលវិទ្យាល័យភូមិន្ទកសិកម្ម បាននាំយកពូជដំទ្បូងបារាំងផ្សេងៗពីប្រទេសមួយចំនួនដូចជា ប្រទេសអាល្លឺម៉ង់៤ប្រភេទ ប្រទេសអៀរទ្បង់៤ប្រភេទ ប្រទេសកូរ៉េ១៣ប្រភេទ និងប្រទេសវៀតណាម២ប្រភេទ ។ តាមរយៈលទ្ធផលនៃការពិសោធស្រាវជ្រាវ កន្លងមក របស់សកលវិទ្យាល័យភូមិន្ទកសិកម្ម បានបង្ហាញឲ្យឃើញថា ពូជដំឡូងបារាំងដែលសមស្របសម្រាប់ខេត្តមណ្ឌលគិរីមាន៣ប្រភេទ ៖
១-ពូជ Tornado នាំចូលពីប្រទេសអៀរឡង់
២-ពូជ Madeira និងពូជ Coronada នាំចូលពីប្រទេសអាល្លឺម៉ង់ និង
៣-ពូជ PO៣ និងពូជ PO៧ នាំចូលពីប្រទេសវៀតណាម ។
ឯចំពោះទិន្នផលអាចទទួលបានពី១៣តោនទៅ២៥តោន ក្នុងមួយហិកតា ។ ដោយទ្បែក ពូជដទៃទៀត សាកលវិទ្យាល័យកំពុងធ្វើការតាមដាននៅទ្បើយ រង់ចាំពិនិត្យមើលលទ្ធផលនៅពេលក្រោយបន្តទៀត ទើបអាចធ្វើសេចក្តីសន្និដ្ឋាន ។ អំពីរដូវកាលដាំដុះ មន្ត្រីជំនាញបានពិនិត្យឃើញថា រដូវដែលអាចដាំដុះបាន គឺនៅចន្លោះពីចុងខែកញ្ញា ដល់សប្តាហ៍ទី២ នៃខែធ្នូ តែសមស្របបំផុត គឺចាប់ពីពាក់កណ្តាលខែតុលា ដល់ខែវិច្ឆិកា ។
ដោយឡែក ការប្រមូលផលដំឡូងបារាំងនាពេលនេះ គឺស្ថិតនៅចម្ការរបស់កសិករឈ្មោះ កែវ ប៊ុនសេង នៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ៕
ចែករំលែកព័តមាននេះ