រាជធានីភ្នំពេញ ៖ គេមិនដឹងថាផ្តើមចេញពីរឿងអ្វីនោះទេ ស្រាប់តែមានបុរស២នាក់មិនស្គាល់អត្តសញ្ញាណនោះទេបានជិះម៉ូតូ២គ្រឿង មកបាញ់គំរាមក្រុមអ្នកបើកបររថយន្តមួយក្រុមចំនួន២គ្រាប់ បណ្តាលឲ្យខ្ទាតអំបែងទៅត្រូវអ្នកដំណើរម្នាក់ឲ្យរងរបួសស្រាល ដែលហេតុការណ៍នេះបានបង្កអោយមានការភ្ញាក់ផ្អើលកាលពីវេលាម៉ោង៧យប់ថ្ងៃទី៨ ខែមេសា ឆ្នាំ២០២០ នៅចំណុចទល់មុខវិទ្យាល័យទួលស្វាយព្រៃ…
រាជធានីភ្នំពេញ ៖ គេមិនដឹងថាផ្តើមចេញពីរឿងអ្វីនោះទេ ស្រាប់តែមានបុរស២នាក់មិនស្គាល់អត្តសញ្ញាណនោះទេបានជិះម៉ូតូ២គ្រឿង មកបាញ់គំរាមក្រុមអ្នកបើកបររថយន្តមួយក្រុមចំនួន២គ្រាប់ បណ្តាលឲ្យខ្ទាតអំបែងទៅត្រូវអ្នកដំណើរម្នាក់ឲ្យរងរបួសស្រាល ដែលហេតុការណ៍នេះបានបង្កអោយមានការភ្ញាក់ផ្អើលកាលពីវេលាម៉ោង៧យប់ថ្ងៃទី៨ ខែមេសា ឆ្នាំ២០២០ នៅចំណុចទល់មុខវិទ្យាល័យទួលស្វាយព្រៃ ផ្លូវ១៩៩ កែងនឹងផ្លូវ ៣៦៦ ស្ថិតក្នុងសង្កាត់ទួលស្វាយព្រៃ១ ខណ្ឌបឹងកេងកង ។
តាមប្រភពពីបុរសម្នាក់ឈ្មោះ ហេង ចាន់តារា អាយុ២២ឆ្នាំ មុខរបរបើកបររថយន្ត ស្នាក់នៅភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ បានអោយដឹងថា មុនពេលកើតហេតុ គាត់បានបើករថយន្តមួយគ្រឿងទៅសណ្តោងរថយន្ដមួយគ្រឿងទៀតដែលខូចនៅម្តុំសណ្ឋាគារអាំងទែរកុងទីណង់តាល់ ដើម្បីយកមកម្តុំវិទ្យាល័យទួលស្វាយព្រៃ ។
តាមប្រភពដដែលបានបន្តថា ខណៈគាត់សណ្តោងរថយន្ដយកមកដល់កន្លែងកើតហេតុខាងលើ ក៍ស្រាប់តែមានបុរស២នាក់បានជិះម៉ូតូចំនួន២គ្រឿង ក្នុងនោះមួយគ្រឿងម៉ាកស្គូពី និងមួយគ្រឿងទៀតម៉ាកហុងដាឌ្រីម បានជិះមកឈប់ រួចហើយបុរសម្នាក់ដែលជិះម៉ូតូម៉ាកស្គូពីបានដកកាំភ្លើងខ្លីមិនស្គាល់ម៉ាកបាញ់ឡើងលើមួយគ្រាប់គំរាមពួកគាត់ ដោយមិនដឹងមូលហេតុ ។ លុះបន្តិចក្រោយមក ខ្មាន់កាំភ្លើងបានបាញ់ផ្ចុចដីមួយគ្រាប់ទៀត បណ្តាលឲ្យខ្ទាតអំបែងទៅត្រូវអ្នកដំណើរម្នាក់រងរបួសដៃស្រាល ភ្លាមៗនោះជនបង្កទាំង២នាក់ ក៏បានជិះម៉ូតូគេចខ្លួនបាត់អស់តែម្ដង ។ ចំណែកជនរងគ្រោះដែលរងរបួសស្រាល ក៏បន្តដំណើរទៅមុខបាត់ ។
ក្នុងហេតុការណ៍នេះដែរ បន្តិចក្រោយមក ឃើញមានកម្លាំងសមត្ថកិច្ច មូលដ្ឋានបានចុះទៅកន្លែងកើតហេតុ រួចក៍បានរកឃើញសំបកកន្ទុះចំនួន២គ្រាប់ តែមិនទាន់ដឹងថា ជាគ្រាប់សំបក ប្រភេទកាំភ្លើងអ្វីនោះទេ ។
ក្រោយពេលកើតហេតុ បន្ទាប់ពីសមត្ថកិច្ចចុះទៅសាកសួរនិង និងពិនិត្យទីតាំងកើតហេតុរួចហើយ ក៏បានយកសំបកកន្ទុះយកទៅរក្សាទុកដើម្បីធ្វើការស្រាវជ្រាវតាមរកជនបង្កយកមកផ្តន្ទាទោស ៕ (កែសម្រួលដោយ ៖ ធីតា)
ចែករំលែកព័តមាននេះ