អាហ្វ្រិកខាងត្បូង៖ បើទោះបីជាវីរុសកូវីដ១៩ កំពុងតែកូរពិភពលោកឲ្យវ៉ល់ ដោយសារតែវាបានឆក់យកជីវិតមនុស្សជាច្រើន ធ្វើឲ្យគូរស្នេហ៍ត្រូវព្រាត់ប្រាស់គ្នា សេដ្ឋកិច្ចពិភពលោកដាំក្បាលចុះ មនុស្សរាប់លាននាក់ត្រូវដាក់ដាច់ដោយឡែក និងខ្លះទៀតត្រូវធ្វើការពីផ្ទះ និងបញ្ឈប់ការជួបជុំប្រារព្ធពិធីបុណ្យជាតិនិងអន្តរជាតិ ក៏ដូចជាពិធិបុណ្យសាសនាសំខាន់ៗ តែវីរុសឆ្លងមួយនេះ ក៏បង្កើតឲ្យមាននូវកិច្ចឈប់បាញ់គ្នាដែលមិនធ្លាប់មានពីមុនមករវាងក្រុមក្មេងទំនើងដែលតែងតែអុកឡុកទីក្រុងមួយនេះ មិនឲ្យប្រជាជនរស់នៅបានសុខនោះ ។
ទីក្រុង Cape គឺជាទីក្រុងកំពង់ផែមួយនៅឆ្នេរសមុទ្រភាគនិរតីរបស់អាហ្វ្រិកខាងត្បូង ដែលទីក្រុងនេះកន្លងមកកើតមាននូវអំពើហឹង្សារបស់ក្រុមក្មេងទំនើងជាញឹកញាប់ ដែលអាជ្ញាធរប្រឈមមុខជាខ្លាំងក្នុងការបង្ក្រាបនូវអំពើហឹង្សារវាងក្រុមក្មេងទំនើងជាច្រើនក្រុមនោះ តែពេលនេះសន្តិភាពរវាងក្មេងទំនើងនៃទីក្រុងមួយនេះបានកើតមានឡើង ដែលគ្មាននរណាម្នាក់នឹកគិតដល់នោះទេ ។
ដោយមានករណីឆ្លងវីរុសកូវីដ ១៩ មានចំនួន ១៦៥៥ ករណីនៅអាហ្វ្រិកខាងត្បូង ដូច្នេះទីក្រុងមួយចំនួនធំ រួមទាំងទីក្រុង Cape ត្រូវអាជ្ញាធរសម្រេចបិទទីក្រុងទាំងមូលនិងតម្រូវឲ្យប្រជាជនត្រូវនៅក្នុងផ្ទះ ដើម្បីចូលរួមប្រយុទ្ធនឹងជំងឺរាតត្បាតកូវីដ ១៩ នេះ កាលពីដើមខែមេសានេះ ។
ក្រោយការបិទទីក្រុងបានប៉ុន្មានថ្ងៃ លោក Andie Steel-smith ដែលជាមេដឹកនាំសាសនាគ្រឹស្តក្នុងទីក្រុងនេះបានទទួលទូរស័ព្ទពីមេជើងកាង ២ រូបដែលស្នើសុំលោកឲ្យជួយ ដោយសារតែពួកគេបានដាច់ស្បៀង និងរស់នៅជាមួយភាពអត់ឃ្លាន ដោយសារតែការបិទទីក្រុង ។
ដោយសារតែក្តីអាណិតអាសូរនិងការជួយរបស់លោក Andie មេដឹកនាំក្រុមជើងកាងធំៗជាច្រើនបានចូលរួមជាមួយលោក Andie ដោយបញ្ចប់នូវទំនាស់និងប្រកួតប្រជែងជាមួយគ្នាក្នុងបេសកម្មចុះជួយយកសម្ភារៈនិងម្ហូបអាហារដល់ផ្ទះប្រជាជនដែលរងគ្រោះដោយសារតែការបិទទីក្រុងហើយពុំមានអាហារគ្រប់គ្រាន់ដើម្បីទទួលទាននោះ ។
អាជ្ញាធរទីក្រុង Cape បាននិយាយថាគេមិននឹកស្មានថាក្រុមក្មេងទំនើងនិងមេដឹកនាំរបស់ពួកគេបានកែប្រែខ្លួនពីក្រុមដែលជាប់ពាក់ព័ន្ធអំពើហឹង្សានិងការធ្វើទារុណកម្មបានកែប្រែមកធ្វើអំពើល្អនាពេលនេះ ។
ជាមួយនឹងអាហ្វ្រិកខាងត្បូងបច្ចុប្បន្នស្ថិតនៅកណ្តាលនៃការជាប់គាំងដើម្បីព្យាយាមគ្រប់គ្រងការរីករាលដាលនៃវីរុសនេះមនុស្សជាច្រើននៅក្នុងសហគមន៍ក្រីក្រកំពុងតស៊ូក្នុងការទិញទំនិញដែលពួកគេត្រូវការ ៕
ចែករំលែកព័តមាននេះ