ខេត្តសៀមរាប ៖ បុរសម្នាក់ដែលបង្ហោះសារគំរាមថ្នាក់ដឹកនាំនិងជេរប្រមាថព្រះមហាក្សត្រ បន្ទាប់ពីសមត្ថកិច្ចឃាត់ខ្លួននាំមកសាកសួរ ជននេះបានឆ្លើយសារភាពថា«ខ្លួនពិតជាបានបង្ហោះ ដោយប្រើប្រាស់គណនី៣ ទី១-ឈ្មោះ (ត្រាំងសិលា អង្គរធំភូមិប្រសាទ) ទី២-ឈ្មោះ(សិលាសៀមរាប ឬសិលាប្រាសាទ) និងទី៣-គណនី Tiktok ឈ្មោះសិលា សៀមរាប ពិតប្រាកដមែន ដោយប្រើឈ្មោះនិងរូបថតអតីតប្រពន្ធរបស់ខ្លួន ។
ជននេះបន្តថា ការប្រើឈ្មោះនិងរូបថតនេះ គឺដើម្បីចង់ឱ្យសមត្ថកិច្ចចាប់អតីតប្រពន្ធខ្លួនដាក់គុក ព្រោះខឹងនាងមិនព្រមរស់នៅជាមួយខ្លួនវិញ ។ បច្ចុប្បន្ន ជនសង្ស័យត្រូវបានសមត្ថកិច្ចកំពុងកសាងសំណុំរឿងបញ្ជូនទៅតុលាការ នៅថ្ងៃទី០៨ មេសានេះ ។ ជនសង្ស័យរូបនេះ ឈ្មោះអាត់ អេង ឬ សេន អាត អាយុ៣៦ឆ្នាំ មុខរបរជាងភ្លើង និងម៉ាស៊ីនត្រជាក់ មានទីលំនៅភូមិទួល ឃុំទឹកល្អក់ ស្រុកព្រៃលប់ ខេត្តព្រះសីហនុ ។
ការឃាត់ខ្លួនធ្វើឡើងក្រោមការចង្អុលបង្ហាញពីលោកនាយឧត្តមសេនីយ៍ សន្តិបណ្ឌិត នេត សាវឿន អគ្គ ស្នងការនគរបាលជាតិ, នាយកដ្ឋានជំនាញ សហការជាមួយផែនការងារសន្តិសុខនៃស្នងការដ្ឋាននគរបាលខេត្តព្រះសីហនុ និងផែនការងារសន្តិសុខ នៃស្នងការដ្ឋាននគរបាលខេត្តសៀមរាប ដែលមានការិយាល័យប្រឆាំងភេរវកម្ម និងឧក្រិដ្ឋកម្មឆ្លងដែនជាអ្នកអនុវត្តនីតិវិធី ហើយមានការសម្របសម្រួលពីសំណាក់លោកព្រះរាជអាជ្ញាអមសាលាដំបូងខេត្តព្រះសីហនុ និងលោកព្រះរាជអាជ្ញាអមសាលាដំបូងខេត្តសៀមរាប ។
ចែករំលែកព័តមាននេះ