ចិន ៖ ប្រទេសចិនបានបញ្ចប់ការចាក់សោក្រុង Wuhan របស់ខ្លួន ដែលជាចំណុចកណ្តាលនៃវិបត្តិជំងឺកូវីដ១៩ ក្រោយពីជំងឺនេះ បានធូរស្បើយច្រើនក្នុងរយៈពេលប៉ុន្មានថ្ងៃមកនេះ។ ប៉ុន្តែទោះបីជា Wuhan…
ចិន ៖ ប្រទេសចិនបានបញ្ចប់ការចាក់សោក្រុង Wuhan របស់ខ្លួន ដែលជាចំណុចកណ្តាលនៃវិបត្តិជំងឺកូវីដ១៩ ក្រោយពីជំងឺនេះ បានធូរស្បើយច្រើនក្នុងរយៈពេលប៉ុន្មានថ្ងៃមកនេះ។
ប៉ុន្តែទោះបីជា Wuhan បានបើកទ្វារព្រំដែនរបស់ខ្លួនឡើងវិញ បន្ទាប់ពី៧៦ថ្ងៃក៏ដោយ ក៏ការរឹតត្បិតមួយចំនួននៅក្នុងទីក្រុងនឹងនៅតែមានដដែល ហើយក្រុមមន្ត្រីព្រមានថា ការគំរាមកំហែងនៃការឆ្លងបន្ថែមទៀតនៅតែអាចមាន។
នៅថ្ងៃពុធ ទីបំផុតអ្នករស់នៅ និងភ្ញៀវទេសចរដែលមានសុខភាពល្អនឹងត្រូវបានអនុញ្ញាតឱ្យចាកចេញពីទីក្រុង Wuhan ដែលជារដ្ឋធានីរបស់ខេត្តហ៊ូប៉ី ដោយរថភ្លើង និងជើងហោះហើរបានចាប់ផ្តើមឡើងវិញ ហើយច្រកផ្លូវហាយវ៉េបានបើកជាថ្មី។
អាជ្ញាធរផ្លូវដែករបស់ទីក្រុង Wuhan បានប៉ាន់ប្រមាណថា អ្នកដំណើរជាង ៥៥០០០នាក់នឹងចាកចេញពីក្រុងតាមរថភ្លើងនៅថ្ងៃពុធ ដោយប្រហែល ៤០% បានភ្ជាប់សម្រាប់តំបន់ដីសណ្តទន្លេគុជដែលជាមជ្ឈមណ្ឌលផលិតកម្មដ៏ធំមួយនៅក្នុងប្រទេសចិន។
ការបន្ធូរបន្ថយការរឹតបន្តឹងការធ្វើដំណើរលើ Wuhan គឺជាព្រឹត្តិការណ៍សំខាន់ចុងក្រោយបង្អស់ក្នុងការប្រយុទ្ធប្រឆាំងនឹងជំងឺកូវីដ១៩ របស់ប្រទេសចិន។ ប្រទេសនេះបានរាយការណ៍ថា មានការឆ្លងមេរោគក្នុងស្រុកថ្មីជិតស្មើសូន្យនៅក្នុងប៉ុន្មានសប្តាហ៍ថ្មីៗនេះ។
យោងតាមគណៈកម្មការសុខភាពជាតិបានឱ្យដឹងថា ទីក្រុង Wuhan ដែលជាកន្លែងផ្ទុះជំងឺកូវីដ១៩ ដំបូងគេ បានរាយការណ៍ថា កន្លងមក មានការឆ្លងជាង ៥ម៉ឺននាក់ និងជាង ២៥០០នាក់បានស្លាប់ ដែលស្មើនឹង ៧៧% នៃការបាត់បង់ជីវិតដោយសារជំងឺកូវីដ១៩ទាំងអស់នៅក្នុងប្រទេសចិន៕ ដកស្រង់ចេញពីវេបសាយ ៖ edition (កែសម្រួលដោយ ៖ បុប្ផា)
ចែករំលែកព័តមាននេះ