តើអ្នកវាស់វែងភាពជោគជ័យរបស់មនុស្សបានយ៉ាងដូចម្តេច?តើអ្នកមើលលើអ្វីដើម្បីដឹងថាអ្នកបានក្លាយជាមនុស្សជោគជ័យ? សម្រាប់មហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិករបស់ក្រុមហ៊ុន Microsoft លោកចូលចិត្តសួរខ្លួនឯងថា «តើខ្ញុំបានបង្កើតមិត្តភាពថ្មី ឬពង្រឹងមិត្តភាពចាស់ ឬទេ?» ហើយវាជាសំណួរដែលលោកតែងតែសួរខ្លួនឯងជារៀងរាល់ឆ្នាំដើម្បីវាស់វែងលើភាពជោគជ័យរបស់លោកក្នុងឆ្នាំនោះ ។
លោកបានបង្កើតទម្លាប់នេះព្រោះតែមិត្តភាពដែលលោកបានកសាងមកឡើងអស់រយៈពេលជាច្រើនឆ្នាំជាមួយនឹងលោកមហាសេដ្ឋី វ៉ារេន បាហ្វេត (Warren Buffett) ។ ក្រៅពីជាមិត្តដ៏ល្អហើយ លោក បាហ្វេត ដើរតួយ៉ាងសំខាន់ក្នុងការជះឥទ្ធិពលលើលោក ហ្គេតស៍ ។
ក្នុងបទសម្ភាសន៍អនឡាញមួយនៅឆ្នាំ ២០១៧ លោក ហ្គេតស៍ បាននិយាយថា លោកបា ហ្វេតតែងតែនិយាយថារង្វាស់ល្អជាងគេសម្រាប់ភាពជោគជ័យ គឺចំនួនមនុស្សសំខាន់របស់អ្នកដែលសប្បាយចិត្ត និងស្រលាញ់អ្នក ។
លោកធ្លាប់សរសេរក្នុងអត្ថបទមួយដែលលោកបានចែករំលែកកាលពីឆ្នាំ ២០១៦ ដែរថា «ខ្ញុំបានរៀនសូត្រជាច្រើនពី វ៉ារេន ក្នុងកំឡុងពេល ២៥ឆ្នាំកន្លងមកនេះ ប៉ុន្តែអ្វីដែលសំខាន់ជាងគេ គឺប្រហែលជារឿងមិត្តភាព ។ មិត្តភាព គឺទាក់ទងទៅនឹងការធ្វើជាមិត្តដែលអ្នកចង់បាន» ។
ជាក់ស្តែងមិត្តភាពជាកត្តាសំខាន់មួយបើនិយាយពីសុខភាព និងសុភមង្គលរបស់មនុស្សព្រោះវាជួយឲ្យមនុស្សចៀសវាងអារម្មណ៍ឯកា ។ យោងទៅតាម Mayo Clinic បានឲ្យដឹងថា ការមានមិត្តជួយជំរុញដល់អារម្មណ៍សប្បាយរីករាយ កាត់បន្ថយអារម្មណ៍ស្ត្រេស និងបង្កើនជំនឿចិត្តឲ្យមនុស្សថែមទៀត ។
យោងទៅតាមការសិក្សារបស់សាកលវិទ្យាល័យ Harvard ដែលបានចាប់ផ្តើមតាំងពីឆ្នាំ ១៩៣៨ បានឲ្យដឹងដែរថា ទំនាក់ទំនងជិតស្និទ្ធិជាអ្វីដែលជួយឲ្យមនុស្សមានសុភមង្គលយូរជាងគេ ។ ទំនាក់ទំនងនោះការពារមនុស្សពីឧបសគ្គផ្សេងៗក្នុងជីវិត និងជួយកាត់បន្ថយការចុះខ្សោយផ្នែករាងកាយ និងផ្លូវចិត្តផងដែរ ៕
ចែករំលែកព័តមាននេះ