រាជធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជា បានប្រកាសឲ្យដឹងថា ថ្មីៗនេះក្រោយពីទទួលបាននូវសំណើរមួយពីសមាគមរោងចក្រកាត់ដេរនៅកម្ពុជាដែលសុំអន្តរាគមន៍ពីរដ្ឋ ព្រោះម្ចាស់រោងចក្រពុំមានលទ្ធភាពក្នុងការបង់ដល់កម្មកររោងចក្រដែលត្រូវព្យួរការងារ ដោយសារតែការបិទរោងចក្រ ព្រោះបញ្ហាកូវីដ១៩ នោះទេ។ ពេលនេះរដ្ឋសម្រេចសម្រួលផ្តល់ដល់កម្មករម្នាក់ៗទទួលបានសរុប ៧០ ដុល្លារអាមេរិកក្នុងមួយខែ ខណៈកាលពីលើកមុនអះអាងថា អាចជួយបានដល់ ៩០ ដុល្លារអាមេរិកក្នុងមួយខែនោះ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជាធ្លាប់បានមានប្រសាសន៍កន្លងមកថា សម្រាប់កម្មករទាំងអស់នោះដែលត្រូវបានព្យួរការងារបណ្ដោះអាសន្ន គឺនៅទទួលបានប្រាក់បៀវត្សន៍៦០ភាគរយផងដែរ ដោយក្នុងនោះថៅកែរោងចក្រ ផ្ដល់៤០ភាគរយ និងរដ្ឋផ្ដល់២០ភាគរយ។
ក៏ប៉ុន្តែសម្តេចតេជោ បានថ្លែងនៅព្រឹកថ្ងៃទី ៧ មេសា នៅសន្និសីទកាសែតនៅវិមានសន្តិភាពដោយបានបញ្ជាក់យ៉ាងច្បាស់ថា ម្ចាស់រោងចក្រដែលតម្រូវឲ្យចេញ ៤០ភាគរយពីមុន និងរដ្ឋ ២០ ភាគរយ កន្លងមក មិនអាចអនុវត្តបានទេ ដោយសារតែម្ចាស់រោងចក្រអត់មានលទ្ធភាពទេ ដូច្នេះតម្រូវឲ្យរដ្ឋចេញ ៤០ និងឲ្យម្ចាស់រោងចក្រ ៣០ ដុល្លារវិញ «អញ្ចឹងអ្នកដែលព្យួរ គឺកម្មករម្នាក់ទទួលបាន អត្ថប្រយោជន៍សរុប ៧០ ដុល្លារអាមេរិក» ដែលពីមុនគឺថា នឹងទទួលបាន ៩០ ដុល្លារអាមេរិកក្នុងមួយខែនោះ ។
សូមរម្លឹកថា លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវះធ្លាប់ប្រាប់សារព័ត៌មានឲ្យដឹងថាគិតត្រឹមថ្ងៃទី ១ មេសា គឺមានរោងចក្រសរុប ៩១ រោងចក្របានបិទទ្វារ និងប៉ះពាល់កម្មករប្រមាណជាង ៦ម៉ឺននាក់៕ (កែសម្រួលដោយ ៖ បុប្ផា)
ចែករំលែកព័តមាននេះ