រាជធានីភ្នំពេញ ៖ ទីបំផុត ជនបង្កដែលចាប់នារីមានផ្ទៃពោះម្នាក់ចងដៃនឹងកន្សែង បានចូលខ្លួនមកបំភ្លឺនៅអធិការដ្ឋាននគរបាលខណ្ឌពោធិ៍សែនជ័យ ពេលនេះ សមត្ថកិច្ចកំពុងសួរចម្លើយដេីម្បីធ្វើកំណត់ហេតុ ។ នេះបើយោងតាមផេកស្នងការរាជធានីភ្នំពេញ ថ្ងៃទី០៧ មេសា នេះ ។ គួររំលឹកថា៖ បុរសម្ចាស់ផ្ទះ ចាប់ស្ត្រីមានផ្ទៃពោះម្នាក់ ចងដៃជាប់នឹងទ្វារ រឿងមិនបង់ថ្លៃបន្ទប់ជួល?
ចាំមើលទៀត តើរឿងនេះនឹងបញ្ចប់ដោយវិធីណា ?
សូមរំលឹកថា ទិដ្ឋភាពប្រទាំងប្រទើសគ្នាមួយ បានកើតឡើងនៅព្រឹកថ្ងៃទី៦ មេសា ខណៈតាមបណ្តាញសង្គមហ្វេសប៊ុកនានាបានបង្ហោះរូបភាព ដែលថតបានជាច្រើនសន្លឹកបង្ហាញពីភាពឃោរឃៅពីសំណាក់បុរសម្នាក់ចាប់ដៃស្ត្រីពោះធំម្នាក់ប្រទាក់ប្រទាញទៅចង ដៃជាប់នឹងទ្វារ ។ នោះគឺកំហឹងរបស់ម្ចាស់ផ្ទះជួលមួយកន្លែង ដែលក្តៅក្រហាយនឹងស្ត្រីម្នាក់ដែលឈប់ជួលបន្ទប់ខ្លួនស្នាក់នៅតទៅទៀត ហើយរើអីវាន់ទៅស្នាក់នៅផ្ទះជួលផ្សេងក៏បានបង្កជម្លោះរហូតកើតមាន អំពើហិង្សាដោយកូនប្រុសម្ចាស់ផ្ទះជួលខាងលើ បានចាប់ស្ត្រីដែលមានផ្ទៃពោះម្នាក់ ដែលជាប្អូនស្រីរបស់ស្ត្រីអ្នកជួលផ្ទះនោះ រួចយកក្រមាចងដៃជាប់ជាមួយទ្វារដែក ។
មិនតែប៉ុណ្ណោះម្ចាស់បន្ទប់ជួលបានជម្រុញឲ្យជនរងគ្រោះថា ទៅប្ដឹងដល់ណាក៏ប្ដឹងទៅព្រមទាំងដេញចាប់ស្ត្រីជាបង ដើម្បីចងថែមទៀតផង ប៉ុន្តែនាងរត់រួច ។ បន្ទាប់មកនាងបានយករូបភាពដែលនាងថតបានពេលដែលកូនម្ចាស់ផ្ទះចាប់ប្អូននាងចងនោះ បង្ហោះលើបណ្ដាញសង្គមហ្វេសប៊ុក ទើបបង្កឲ្យផ្ទុះការរិះគន់និងថ្កោលទោសចំពោះទង្វើអាក្រក់មួយនេះព្រោងព្រាតដែលមិនធ្លាប់មាន ។ ស្ត្រីរងគ្រោះបានទៅដាក់ពាក្យបណ្ដឹងសុំឲ្យនគរបាលជួយរកយុត្តិធម៌ព្រមទាំងទាមទារសំណងជម្ងឺចិត្តជាប្រាក់ចំនួន៥ពាន់ដុល្លារពីជនដៃដល់ផងដែរ ។
ហេតុការណ៍នោះបានកើតឡើងកាលពីវេលាម៉ោង១២និង៤០នាទីរសៀលថ្ងៃទី៥ ខែមេសា ឆ្នាំ២០២០ នៅចំណុចបន្ទប់ជួលលេខA4 ស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ជនដៃដល់ដែលជាម្ចាស់ផ្ទះជួលខាងលើឈ្មោះ អ៊ូ ប៊ុនធី ភេទប្រុស អាយុ៤១ឆ្នាំ មុខរបរជាមន្ត្រីផ្នែកសាធារណការនិងដឹកជញ្ជូន ប៉ុន្តែពុំដឹងថានៅក្រសួងឬមន្ទីរណាទេ និងម្ដាយឈ្មោះ ស្រេង ឆេងលីន អាយុ៨១ឆ្នាំ ក៏ត្រូវបាននគរបាលហៅទៅសាកសួរនៅប៉ុស្តិ៍ដែរ ។ ចំណែកស្ត្រីរងគ្រោះដោយការចាប់ចងដៃ និងក្រមានោះឈ្មោះ អឿន នាត អាយុ៣៣ឆ្នាំ នាងមានផ្ទះពោះ៤ខែ រីឯបងស្ត្រីនាងឈ្មោះ អឿន ស្រីម៉ៅ អាយុ៣៧ឆ្នាំ ។ អ្នកទាំង២ស្នាក់នៅផ្ទះជួល២ផ្សេងពីគ្នា ស្ថិតនៅក្នុងភូមិកើតហេតុខាងលើ និងមានទីលំនៅអចិន្ត្រៃយ៍ក្នុងភូមិទួលតាកោ ឃុំទួលស្នួល ស្រុកក្រូចឆ្មារ ខេត្តកំពង់ចាម ។
ស្ត្រីរងគ្រោះបាននិយាយថា បងស្រីរបស់នាងឈ្មោះ អឿន ស្រីម៉ៅ បានស្នាក់នៅក្នុងផ្ទះជួលរបស់ជនដៃដល់ខាងលើនោះរយៈពេល១ឆ្នាំកន្លងមកហើយដោយតម្លៃផ្ទះជួលនោះក្នុង១ខែ៤៥ដុល្លារ ។ ព្រោះតែសព្វថ្ងៃកើតមានវិបត្តិវីរុសCovid-19 កំពុងវាយលុកធ្វើឲ្យបងស្រីនាងគ្មានលទ្ធភាពដើម្បីរកប្រាក់ឲ្យថ្លៃឈ្នួលផ្ទះបាន ទើបបងស្រីនាងសម្រេចចិត្តឈប់ជួលផ្ទះនោះតទៅទៀត ដោយបានទៅរកជួលផ្ទះផ្សេងទៀតស្នាក់នៅដែលក្នុង១ខែតម្លៃត្រឹមតែ២៥ដុល្លារវិញ ។
មិនតែប៉ុណ្ណោះក៏បានប្រាប់ទៅជនដៃដល់ដែលជាម្ចាស់ផ្ទះជួលខាងលើបានដឹងអស់ហើយថានឹងចាកចេញនៅថ្ងៃទី១០ ខែមសា ខាងមុខតែដោយសារតែមុននឹងក្រោយគង់តែចេញដដែល ទើបនៅថ្ងៃកើតហេតុបងស្រីនាងសម្រេចចិត្តជញ្ជូនអីវាន់ចេញទៅកាន់ផ្ទះថ្មី។ ប្រភពដដែលបានបន្តទៀតថា ពេលនោះនាងនិងបងស្រីបានជួលម៉ូតូកង់បី១គ្រឿង ជិះទៅដឹកអីវាន់ ប៉ុន្តែដោយអីវាន់ច្រើនដឹកមិនអស់ ទើបដឹកទៅ១ជើងសិន ហើយនៅសល់ពួកនាងបានចាក់សោទ្វារបន្ទប់ទុកសិន ។ លុះពេលដឹកអីវាន់ទៅដល់បន្ទប់ថ្មីនាងបានទៅសម្រាកក្នុងបន្ទប់នោះ ចំណែកបងស្រីនាងបានរើអីវាន់ចេញពីម៉ូតូកង់បីដាក់ក្នុងបន្ទប់រួចរាល់ បងស្រីនាងបានជិះម៉ូតូកង់បីនោះវិលទៅដឹកអីវាន់ដែលនៅសល់បន្តទៀត ។
លុះពេលទៅដល់បានឃើញម្ចាស់ផ្ទះជួលវាយផ្ដាច់សោដែលបងស្រីនាងចាក់បន្ទប់នោះចោលរួចយកសោថ្មីចាក់ជំនួសវិញ ។ឃើញបែបនេះបងស្រីនាងសួរនាំក៏ត្រូវម្ចាស់ផ្ទះជួលនោះរករឿងជេប្រមាថទើបមានរឿងទំនាស់គ្នាកើតឡើងតែម្ដង ។ បន្ទាប់មកបងស្រីនាងបានខលហៅនាងឲ្យទៅជួយ ហើយពេលទៅដល់នាងបានសួរនាំទើបត្រូវបានកូនប្រុសម្ចាស់ផ្ទះប្រើអំពើហិង្សាបម្រុងយកដំបងវាយនាងរួចចាប់អូសដៃនាង និងយកក្រមាចងដៃទាំង២ទៅមុខអូសយកទៅចងជាប់ទ្វាររបងផ្ទះ ។ ខណៈនោះទោះបីជានាងប្រាប់ថាមានផ្ទៃពោះនិងប្រយ័ត្នប៉ះពាល់កូនក្នុងផ្ទៃនាងក៏ជននោះមិនព្រមឈប់ដែរ ហើយថែមទាំងស្រែកខ្លាំងៗថា«ងាប់ក៏ងាប់ទៅមិនមែនកូនអញទេ ហើយទៅប្ដឹងអាណាប្ដឹងទៅ» ។
សកម្មភាពនោះត្រូវបានបងស្រីនាងថតបាន មិនតែប៉ុណ្ណោះក្រោយចងនាងរួចហើយជនខាងលើដេញចាប់បងស្រីនាងថែមទៀត តែចាប់មិនបានបងស្រីរត់រួច បន្ទាប់មកនាងបានយកមាត់ខាំស្រាយក្រមា រួចដើរចេញទាំងមានអាការៈចុកពោះយ៉ាងខ្លាំង ។នគរបាលបានឲ្យដឹងថា ក្រោយពេលកើតហេតុស្ត្រីរងគ្រោះមិនបានមកដាក់ពាក្យប្ដឹងភ្លាមៗនោះទេ ហើយស្ត្រីជាបងបានយករូបភាពដែលថតបានទៅបង្ហោះនៅក្នុងបណ្ដាញសង្គមហ្វេសប៊ុក បង្កឲ្យមានការភ្ញាក់ផ្អើលទើបដឹងដល់កម្លាំងនគរបានចុះធ្វើការស្រាវជ្រាវ ។
លុះដល់វេលាព្រឹកថ្ងៃទី៦ ខែមេសា ទើបស្ត្រីរងគ្រោះមកដាក់ពាក្យបណ្ដឹងសុំឲ្យជួយអន្តរាគមន៍ ដោយបានទាមទារសំណងជំងឺចិត្តចំនួន៥ពាន់ដុល្លារពីជនដៃដល់ ហើយនៅវេលាព្រឹកថ្ងៃដដលនោះកម្លាំងនគរបាលប៉ុស្តិ៍ចោមចៅទី៣ ក៏បានហៅស្ត្រីជាម្ដាយដែលជាម្ចាស់ផ្ទះជួលទៅធ្វើការសាកសួរ អំពីរឿងហេតុដែលបានកើតឡើង ខណៈដែលកូនប្រុសជាជនដៃដល់បានរត់គេចខ្លួនបាត់ទៅហើយ ។ ប៉ុន្តែពុំដឹងស្ត្រីម្ចាស់ផ្ទះជួលនោះនិយាយអ្វីខ្លះទេក្រោយមកនគរបាលបានឲ្យគាត់ត្រឡប់ទៅផ្ទះវិញ ។
ស្ត្រីចំណាស់ជាម្ដាយដែលជាអ្នកហុចក្រមាឱ្យលូនចងនិងឈរមើល ត្រូវបានប៉ូលិសឱ្យត្រឡប់មកផ្ទះវិញ ឯបុរសក្លាហានតែជាមួយ ស្ត្រីភេទទន់ខ្សោយថាខ្លួនមិនរត់ទេ គឺនៅមើលប្រពន្ធឆ្លងទន្លេ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ