ប្រទេសចិន ៖ «ឡេឡេ» ដែលជាឆ្មាពូជអង់គ្លេស នៅក្នុងទីក្រុង Wuhan ប្រទេសចិន បានក្លាយជានិមិត្តរូបនៃភាពធន់ទ្រាំក្នុងកំឡុងពេលមានជំងឺរាតត្បាតនាពេលបច្ចុប្បន្ន ដែលបង្ហាញយើងជាមនុស្សថា ប្រសិនបើវាអាចរស់បានដោយខ្លួនឯងនៅក្នុងផ្ទះដែលចាក់សោអស់រយៈពេល ៤០ថ្ងៃនោះ យើងក៏អាចធ្វើបានដូច្នោះដែរ។
ការជាប់នៅក្នុងផ្ទះចាប់ផ្តើមនៅខែមករា ឆ្នាំ២០២០ នៅពេលដែលវិបត្តិកូវីដ១៩ នៅទីក្រុង Wuhan ទើបតែចាប់ផ្តើម។ ម្ចាស់របស់ឡេឡេ ត្រូវសម្រាកព្យាបាលនៅមន្ទីរពេទ្យ បន្ទាប់ពីឆ្លងវីរុសនេះ ហើយមុនពេលចូលឆ្នាំចិន (២៥ មករា) សត្វឆ្មាផើមឡេឡេ ត្រូវម្ចាស់ទុកចោលនៅក្នុងផ្ទះម្នាក់ឯង។ គេមិនបានជួលឱ្យនរណាម្នាក់មកមើលថែទេ ដោយសារតែមិនដឹងថា តើនៅក្នុងផ្ទះអស់វីរុសកូវីដ១៩ឬនៅ?
មូលហេតុដែលឡេឡេ អាចរស់បានដោយគ្មានម្ចាស់នៅក្នុងផ្ទះអស់រយៈពេល៤០ថ្ងៃ គឺមកពីម្ចាស់បានហែកកញ្ចប់ចំណីឆ្មាចោល ទុកនៅច្រើនកន្លែងក្នុងផ្ទះ មុនពេលគាត់ទៅធ្វើការសម្រាកព្យាបាលនៅមន្ទីរពេទ្យ។ ជាមួយគ្នានេះដែរ គាត់បានទិញក្រណាត់ទន់ៗ ដាក់ឱ្យឡេឡេកើតកូន ប្រសិនបើវាត្រូវកើតមុនពេលគាត់មកវិញ។ ក្រៅពីចំណី និងក្រណាត់ ម្ចាស់វាក៏បានដាក់ទឹកគ្រប់គ្រាន់សម្រាប់ ឡេឡេ ផឹកផងដែរ។
អស់រយៈពេល៤០ថ្ងៃ ដែលម្ចាស់ឡេឡេ ត្រូវបានបញ្ជូនទៅមន្ទីរពេទ្យ និងរារាំងមិនឱ្យវិលត្រឡប់ទៅផ្ទះវិញ គ្មាននរណាម្នាក់ដឹងថា ឡេឡេកើតកូនយ៉ាងណាទេ។ ស្រាប់តែពេលម្ចាស់មកវិញ គាត់ក៏ឃើញឡេឡេ និងកូន៤ក្បាលរបស់នាង រត់លេងពេញផ្ទះ៕ ដកស្រង់ចេញពីវេបសាយ ៖ odditycentral (កែសម្រួលដោយ ៖ បុប្ផា)
ចែករំលែកព័តមាននេះ