អ្នកឆ្លងកូវីដ១៩ នៅរុស្ស៊ី កើនឡើងលឿន ១ថ្ងៃជិត១ពាន់នាក់ សរុប៦.៣៤៣ករណី
ទីក្រុងមូស្គូ ៖ ទិន្នន័យផ្លូវការបានបង្ហាញថា នៅទូទាំងប្រទេសរុស្ស៊ី មានអ្នកឆ្លងកូវីដ១៩ សរុបចំនួន ៦.៣៤៣ករណី គិតត្រឹមថ្ងៃចន្ទ ទី៦ មេសា…
ទីក្រុងមូស្គូ ៖ ទិន្នន័យផ្លូវការបានបង្ហាញថា នៅទូទាំងប្រទេសរុស្ស៊ី មានអ្នកឆ្លងកូវីដ១៩ សរុបចំនួន ៦.៣៤៣ករណី គិតត្រឹមថ្ងៃចន្ទ ទី៦ មេសា ដោយកើនឡើងក្នុងកំណត់ត្រាប្រចាំថ្ងៃ គឺចំនួន ៩៥៤ នាក់ ។
មជ្ឍមណ្ឌលជំងឺឆ្លងរបស់រុស្ស៊ី បាននិយាយនៅក្នុងសេចក្តីថ្លែងការណ៍មួយថា ចំនួនអ្នកស្លាប់បានកើនឡើងដល់ ៤៧នាក់ ខណៈមនុស្ស ៤០៦នាក់ ត្រូវបានព្យាបាលឲ្យជាសះស្បើយវិញ ។
ទីក្រុងមូស្គូ ដែលជាតំបន់រងគ្រោះធ្ងន់ធ្ងរបំផុតក្នុងប្រទេស អភិបាលក្រុងបានបញ្ជាក់ថា មានករណីឆ្លងថ្មី ចំនួន ៥៩១ករណី ក្នុងរយៈពេល ២៤ម៉ោងចុងក្រោយនេះ សរុបនៅមូស្គូ មានអ្នកឆ្លងវីរុសនេះចំនួន ៤.៤៨៤ករណី ។ ហើយកាលពីអាទិត្យនេះ ប្រជាជនប្រមាណ ១៩៥.៤២៣នាក់ ស្ថិតនៅក្រោមការឃ្លាំមើលខាងវេជ្ជសាស្ត្រ នៅក្នុងប្រទេស ។
សូមជម្រាបថា កាលពីថ្ងៃទី៣០ មីនា ប្រទេសរុស្ស៊ី មានអ្នកឆ្លងវីរុសសរុបត្រឹម ១,៨៣៦ ករណីប៉ុណ្ណោះ រហូតមកដល់ថ្ងៃនេះ កើនឡើងដល់ ៦.៣៤៣ករណី ចំនួននេះពិតជាឡើងលឿនគួរឲ្យបារម្ភសម្រាប់រុស្ស៊ី ។
ជនជាតិរុស្ស៊ីទាំងអស់ លើកលែងតែអ្នកធ្វើការ នៅតាមស្ថាប័ន និងគ្រឹះស្ថានសំខាន់ៗ គឺទទួលបានប្រាក់ឈ្នួលឈប់សម្រាក ចាប់ពីថ្ងៃទី៣០ ខែមីនា ដល់ថ្ងៃទី៣០ ខែមេសា ដែលជាផ្នែកមួយ នៃកិច្ចខិតខំប្រឹងប្រែងរបស់ជាតិ ដើម្បីទប់ស្កាត់ការរីករាលដាល នៃមេរោគនេះ ៕
ចែករំលែកព័តមាននេះ