រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា កម្លាំងនគរបាលនៃអធិការដ្ឋានខណ្ឌមានជ័យ សហការនឹងកម្លាំងខណ្ឌដូនពេញ បានធ្វើការចាប់ឃាត់ខ្លួនជន សង្ស័យម្នាក់ ក្នុងចំណោមបក្សពួក២នាក់ ក្រោយពីពួកគេនាំគ្នាវាយប្លន់យកម៉ូតូមួយគ្រឿងម៉ាកស្គូពី ដែលមានភ្ជាប់ប្រព័ន្ធ GPS ពីស្ត្រីជាជនរងគ្រោះមានផ្ទៃពោះ២ខែម្នាក់ កាលពីយប់ថ្ងៃទី៥ ខែមេសា ឆ្នាំ២០២០ នៅម្តុំបឹងទំពុន រួចហើយយកទៅលាក់ទុកក្នុងបន្ទប់ជួលមួយកន្លែងនៅក្នុងតំបន់មិនរៀបរយតាមផ្លូវរថភ្លើងក្នុងសង្កាត់ស្រះចកនោះ។
សេចក្តីរាយការណ៍បន្តថា ការបង្ក្រាបនេះដែរ បានធ្វើឡើងកាលពីម៉ោង៩ព្រឹក ថ្ងៃទី០៦ ខែ មេសា ឆ្នាំ២០២០ នៅចំណុចបន្ទប ជួលគ្មានលេខ ក្នុងតំបន់មិនរៀបរយតាមបណ្តោយផ្លូវរថភ្លើង ស្ថិតនៅភូមិ២ សង្កាត់ស្រះចក ខណ្ឌដូនពេញ។
តាមប្រភពពីនគរបាលបានប្រាប់ឱ្យដឹងថា បុរសជាជនសង្ស័យម្នាក់ក្នុងចំណោមបក្សពួក២នាក់ខាងលើនេះ មានឈ្មោះ ជិន អេលីយ៉ា អាយុ២៨ឆ្នាំ មុខរបរមិនពិតប្រាកដ មានទីលំនៅក្នុងសង្កាត់ផ្សារដេប៉ូទី១ ខណ្ឌទួលគោក។ ចំណែកឯនារីរងគ្រោះឈ្មោះ លៀន វ៉ាន់រ៉ា អាយុ៣២ឆ្នាំ មានទីលំនៅក្នុងសង្កាត់បេងទំពុនទី១ ខណ្ឌមានជ័យ។
នគរបាលបន្តថា មុនពេលកើតហេតុ កាលពីម៉ោង១១យប់ ថ្ងៃទី៥ មេសា នារីរងគ្រោះបានជិះម៉ូតូម៉ាកស្គូពី ពណ៌ស ពាក់ស្លាកលេខភ្នំពេញ ១HV-៩១៥៧ តែម្នាក់ឯងចេញពីផ្ទះក្នុងគោលបំណងទៅយកប្តីនៅផ្ទះម្តាយមីងដែលនៅក្បែរនោះដែរ។
ប្រភពដដែលប្រាប់បន្តថា ពេលដែលនារីរងគ្រោះជិះម៉ូតូដល់ពាក់កណ្តាលផ្លូវ ក៏ស្រាប់តែ លេចមុខក្រុមជនសង្ស័យចំនួន២នាក់ជិះម៉ូតូមិនស្គាល់ម៉ាកមួយគ្រឿង មកស្ទាក់មុខនាងឱ្យឈប់ រួចហើយក៏នាំគ្នានិយាយគំរាមឱ្យចុះពីម៉ូតូ និងប្រគល់ម៉ូតូឱ្យពួកគេ តែនាងមិនព្រម ក៏ស្រាប់តែបក្សពួកម្នាក់ក្នុងចំណោមនោះស្ទុះទៅវាយនាងមួយដៃ ត្រូវចំត្រង់ដោះចំហៀងខាងស្តាំ ។
ដោយសារតែនារីរងគ្រោះខ្លាចក្រែងគេវាយត្រូវចំពោះដែលកំពុងតែមានទម្ងន់ចំនួន២ខែ ដែលធ្វើឱ្យប៉ះពាល់ដល់កូនក្នុងផ្ទៃនោះ ទើបនាងយល់ព្រមប្រគល់ម៉ូតូឱ្យទៅពួកគេ ហើយក៏ពួកគេក៏នាំគ្នាជិះរត់គេចខ្លួនបាត់ស្រមោលអស់ទៅ ទើបនាងរត់ទៅប្តឹងនគរបាលប៉ុស្តិ៍បឹងទំពុនទី១ ឱ្យជួយធ្វើការអន្តរាគមន៍ពីរឿងនេះ។
ប្រភពដដែលបន្តទៀតថា លុះព្រឹកថ្ងៃទី៦ មេសានេះ ដោយសារតែម៉ូតូមានភ្ជាប់ប្រព័ន្ធ GPS នោះ កម្លាំងមានសម្ថកិច្ចខណ្ឌមានជ័យ បានធ្វើការសហការជាមួយនឹងកម្លាំងនគរបាលខណ្ឌដូនពេញ បានមករកឃើញម៉ូតូលាក់ទុកក្នុងបន្ទប់ជួលខាងលើ និងចាប់ខ្លួនបានជនសង្ស័យម្នាក់ ចំណែកបក្សពួកម្នាក់ទៀតរត់គេចខ្លួនបាត់។
ក្រោយពីកម្លាំងនមានសមត្ថកិច្ចធ្វើការសហការគ្នាស្រាវជ្រាវតាមរយៈប្រព័ន្ធ GPS ឈានទៅការរកឃើញម៉ូតូម៉ាកស្គូពី និងចាប់ឃាត់ខ្លួនបានបុរសជាជនសង្ស័យម្នាក់រួចហើយ សមត្ថកិច្ចក៏បានប្រគល់ម៉ូតូទៅឱ្យកម្លាំងនគរបាលនៃអធិការដ្ឋានខណ្ឌមានជ័យ ដើម្បីធ្វើការប្រគល់ទៅឱ្យនារីរងគ្រោះជាម្ចាស់វិញ។ ហើយពេលនេះសមត្ថកិច្ចក៏កំពុងតែធ្វើការស្រាវជ្រាវតាមរកចាប់ខ្លួនជនសង្ស័យម្នាក់ទៀត ដើម្បីយកមកធ្វើការផ្តន្ទាទោសទៅតាមផ្លូវច្បាប់ជាបន្តទៀតផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ