ខេត្តកំពត ៖ អាជ្ញាធរ និងអ្នកភូមិបានលើកគ្នាចេញអន្តរាគមន៍ពន្លត់ភ្លើងព្រៃ ដែលឆេះរាលដាលមកដល់ភូមិ កាលពីវេលាម៉ោង១២ថ្ងៃត្រង់ថ្ងៃទី៤ មេសា ។ ភ្លើងព្រៃទាំងនោះ បានឆេះរាលដាលផ្អើលអ្នកភូមិជ្រោះតាសោម ឃុំប្រាសាទភ្នំខ្យង ស្រុកកំពង់ត្រាច ខេត្តកំពត ។ ដោយសារតែការបារម្ភភ្លើងឆេះដល់ផ្ទះ អ្នកភូមិបានចេញជួយពន្លត់ នៅពេលដែលភ្លើងឆេះតាមវាលស្រែក្បែរផ្ទះ ។
ក្នុងនោះក៏មានរថយន្តពន្លត់អគ្គិភ័យនគរបាលស្រុកកំពង់ត្រាច ជួយអន្តរាគមន៍ រួមទាំងកម្លាំងនគរបាលស្រុក និងនគរបាលឃុំអង្គសុភី ។ លោក ហ៊ុន តេង មេឃុំប្រាសាទភ្នំខ្យងដែលមកជួយពន្លត់ភ្លើងឆេះព្រៃនោះដែរ បាននិយាយប្រាប់ឱ្យដឹងថា នៅថ្ងៃទី៤ មេសានេះ មានភ្លើងឆេះព្រៃបានរាលដាលមកឆេះក្បែរភូមិចំនួន២ គឺភូមិព្រៃកឹក និងភូមិជ្រោះតាសោម ។
លោក ហ៊ុន តេង និយាយទៀតថា តាមព័ត៌មានថា ការបង្កឱ្យមានភ្លើងឆេះព្រៃនិងឆេះរាលដាលតាមវាលស្រែបែបនេះ ព្រោះនៅភូមិព្រៃកឹក មានគេមកសែនផ្នូរ(ឆេងម៉េង) ដុតធូបទៀនសែន ក៏ឆេះរាលដាលតែម្តង ។ លោកមេឃុំនិយាយថា ការឆេះក្បែរភូមិដ្ឋានប្រជាពលរដ្ឋនេះ មិនមានការប៉ះពាល់ដល់ផ្ទះប្រជាពលរដ្ឋទេ ។
លោកវរសេនីយ៍ទោ សេង សុគន្ធ ជាអធិការនគរបាលស្រុកកំពង់ត្រាច បានប្រាប់ឱ្យដឹងថា នគរបាលប្រមាណ២០នាក់ មកជួយអន្តរាគមន៍ពន្លត់ភ្លើងឆេះព្រៃចូលក្បែរភូមិចំនួន២ក្នុងស្រុកកំពង់ត្រាចនោះ ។ លោកវរសេនីយ៍ទោ និយាយប្រាប់ទៀតថា បើកុំតែពលរដ្ឋក្នុងភូមិរួមសហការជាមួយនិងកម្លាំងនគរបាលជួយទប់ស្កាត់អំណាចភ្លើងទាន់ កុំអីឆេះផ្ទះពលរដ្ឋនៅក្នុងភូមិជ្រោះតាសោម មិនខានឡើយ ។
ចែករំលែកព័តមាននេះ