រាជធានីភ្នំពេញ ៖ បន្ទាប់ពីមានជម្លោះបន្តិចបន្តួចសង្ស័យកើតចេញពីគ្មានលុយបង់ថ្លៃបន្ទប់ ធ្វើឲ្យបុរសជាម្ចាស់ផ្ទះជួលម្នាក់ បានចាប់ដៃស្ត្រីមានផ្ទៃពោះម្នាក់ ចងជាប់នឹងទ្វារ ។
ហេតុការណ៍នេះ បានកើតឡើងកាលពីថ្ងៃទី៥ ខែមេសា ឆ្នាំ២០២០ នៅចំណុចក្រោយរោងចក្រឥណ្ឌា ភូមិព្រៃទា សង្កាត់ចោមចៅ៣ ខណ្ឌពោធិ៍សែន ។
តាមរយៈវីដេអូឃ្លីបមួយ ដែលបានចែកចាយនៅលើបណ្ដាញសង្គមហ្វេសប៊ុក នៅព្រឹកថ្ងៃទី៦ មេសា ២០២០ បង្ហាញអំពីសកម្មភាពរបស់បុរសម្នាក់ បានចាប់ស្រីម្នាក់មានផ្ទៃពោះផង ដោយអោយស្ត្រីវ័យចំណាស់ម្នាក់ហុចក្រម៉ាមក ដើម្បីចងដៃស្ត្រីរងគ្រោះ ។
ទង្វើរបស់បុរសរូបនេះ បង្ហាញអំពីអំពើឃោរឃៅ គ្មានការយោគយល់ និងហិង្សាលើមនុស្សស្រីទន់ខ្សោយ ។ ចំណែកឯ ស្ត្រីវ័យចំណាស់នោះ ឃើញបុរសខាងលើប្រើហិង្សា មិនឃាត់ទេ បែរជារួមចំណែកជាមួយ អោយប្រព្រឹត្តិបទល្មើសទៅវិញ ។
ទោះជាយ៉ាងណាលោកអធិការនគរបាលខណ្ឌពោធិ៍សែន កោះសន្តិភាពនៅមិនទាន់ទាកទងសុំការបំភ្លឺបាននៅឡើយទេ នៅរសៀលថ្ងៃទី៦ មេសា ២០២០នេះ ។
យោងតាមពាក្យបណ្តឹងរបស់ជនរងគ្រោះឈ្មោះ អឿម នៀក ភេទស្រី អាយុ៣៣ឆ្នាំ បានរៀបរាប់ថា កាលពីថ្ងៃទី៥ ខែមេសា ឆ្នាំ២០២០ វេលាម៉ោង១រសៀល មុនពេលកើតហេតុ ជនរងគ្រោះបានទៅជួយរើ អីវ៉ាន់របស់បងស្រី ឈ្មោះ ស្រីម៉ៅ ដែលបានជួលបន្ទប់លេខ A4 ស្ថិតនៅភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ។ ពេលជនរងគ្រោះទៅដល់បានរើអីវ៉ាន់ដាក់លើម៉ូតូកង់បី ដើម្បីយកមកបន្ទប់ជួលថ្មី នៅក្បែរបន្ទប់ជួលចាស់ ស្របពេលនោះ ម្ចាស់ផ្ទះចាស់ឈ្មោះ អ៊ូ ប៊ុនធី ភេទប្រុស អាយុ៤១ឆ្នាំ ជាមន្ត្រីសាធារណការ និង ម្នាក់ទៀតឈ្មោះ ស្រេង ឆេងលីន ភេទស្រី ៦១ឆ្នាំ ជាម្ចាស់ផ្ទះជួលបានមករករឿង រហូតមានទំនាស់ពាក្យសម្តី ដោយយកក្រមាចាំចងជនរងគ្រោះជាប់នឹងទ្វារតែម្តង ។
បើតាមសេចក្តីរាយការណ៍អោយដឹងថា ស្ត្រីរងគ្រោះកំពុងសម្រាលព្យាបាលនៅមន្ទីរពេទ្យ សម្ភព សុវណ្ណារ៉ា ។ ចំណែកឯ ជនសង្ស័យជាមន្ត្រីសាធារណការ បានរត់គេចខ្លួនហើយ ៕
ចែករំលែកព័តមាននេះ