នៅពេលថ្ងៃចូលឆ្នាំមកដល់ គេរៀបគ្រឿងសក្ការបូជាសម្រាប់ទទួលទេវតាថ្មី ចំណែកផ្ទះសម្បែង មានការតុបតែងរំលេចដោយអំពូល អគ្គិសនី ខ្សែតូចៗ ចម្រុះពណ៌ ឬចង្កៀងគោម គ្រប់ពណ៌ សម្រាប់ទទួលទេវតាថ្មី…
នៅពេលថ្ងៃចូលឆ្នាំមកដល់ គេរៀបគ្រឿងសក្ការបូជាសម្រាប់ទទួលទេវតាថ្មី ចំណែកផ្ទះសម្បែង មានការតុបតែងរំលេចដោយអំពូល អគ្គិសនី ខ្សែតូចៗ ចម្រុះពណ៌ ឬចង្កៀងគោម គ្រប់ពណ៌ សម្រាប់ទទួលទេវតាថ្មី ។ លុះដល់វេលាកំណត់ទេវតាថ្មីយាងមក គេនាំកូនចៅអង្គុយជុំគ្នា នៅជិតកន្លែងរៀបគ្រឿងសក្ការៈនោះ ហើយអុជទៀន ធូបបាញ់ទឹកអប់ បន់ស្រន់ សុំសេចក្តីសុខចម្រើន គ្រប់ប្រការអំពីទេវតាថ្មី ។ ចំពោះគ្រឿងសក្ការៈ និងក្រយាស្ងើយដាក់ថ្វាយទេវតានាះ គេនិយមតម្រូវតាមចិត្តទេវតាដែលនឹងចុះមកក្នុងឆ្នាំនីមួយៗ ។ នៅក្នុងរង្វង់៣ថ្ងៃនៃបុណ្យចូលឆ្នាំនោះមានពិធីដូចតទៅ ៖
ថ្ងៃទី១- គេត្រូវជួបជុំគ្រួសារ ត្រៀមអុចធូបបន់ស្រន់ទទួលទេវតាឆ្នាំថ្មីដែលចុះមកដើម្បីសុំនូវសេចក្ដីសុខ ហើយនិងការបន់ស្រន់សុំសម្រេចនូវបំណងប្រាថ្នាអ្វីមួយពីទេវតាឆ្នាំថ្មី បន្ទាប់មកកូនចៅជូនសម្លៀកបំពាក់ នំចំណី ប្រាក់កាក់ដល់អ្នកមានគុណ មានឪពុកម្តាយ ជីដូនជីតា ជាដើម ជួនកាលគេធ្វើទានដល់អ្នកក្រីក្រទៀតផង ។
ថ្ងៃទី២- គេយកចង្ហាន់ទៅប្រគេនព្រះសង្ឃទាំងឡាយនៅតាមវត្តអារាម ពេលល្ងាចគេនាំគ្នាជញ្ជូនខ្សាច់សាងវាលុកចេតិយ នៅជុំវិញព្រះវិហារ ឬនៅជុំវិញដើមពោធិ៍ណាមួយនៅក្នុងវត្តនោះ។ នៅពេលព្រលប់ គេប្រគេនភេសជ្ជៈដល់ភិក្ខុទាំងឡាយ និមន្តភិក្ខុសូត្រចម្រើនព្រះបរិត្ត និងសម្ដែងធម្មទេសនា។ ពេលរសៀល គេនាំគ្នាទៅពូនភ្នំខ្សាច់ ហើយសូត្រធម៌អធិដ្ឋានភ្នំខ្សាច់ដែលគេសន្មតទុកដូចចូឡាមណីចេតិយ ហើយនិមន្តភិក្ខុទាំងឡាយ បង្សុកូលចេតិយ បញ្ជូនមគ្គផលដល់វិញ្ញាណក្ខន្ធបងប្អូនញាតិសន្តានដែលបានស្លាប់ទៅ។
ថ្ងៃទី៣- ពេលព្រឹកគេនិមន្តព្រះរស់នៅក្នុងផ្ទះដែលយើងហៅថាឪពុកម្ដាយដើម្បីស្រង់ទឹកលាងបាប និងជាការដឹងគុណផង ពេលថ្ងៃគេទៅស្រង់ព្រះពុទ្ធបដិមាដើម្បីយកទឹកមកលប់លាងមុខជម្រះឧបទ្រពចង្រៃផ្សេងៗ រួចគេនិមន្តព្រះសង្ឃសូត្រឆ្លងភ្នំខ្សាច់ ។ ពេលល្ងាចភិក្ខុសង្ឃត្រូវចេញទៅស្រង់ទឹកជូនឧបាសក ឧបាសិកានៅតាមភូមិស្រុកវិញដើម្បីជម្រះឧបទ្រពចង្រៃក្នុងឆ្នាំចាស់ ដើម្បីបញ្ជាក់អត្ថន័យថា ការធ្វើអំពើល្អ អំពើល្អនឹងត្រឡប់សងមកវិញ។
នៅក្នុងឱកាសបុណ្យចូលឆ្នាំថ្មីទាំងបីថ្ងៃនេះ គេនាំគ្នាលេងល្បែងប្រជាប្រិយកម្សាន្ដសប្បាយជាច្រើនដូចជា ល្បែងទាញព្រ័ត្រ ស្ដេចចង់ បោះអង្គញ់ ចោលឈូង លាក់កន្សែង ខ្លែងឆាបកូនមាន់ ជាដើម ពិសេសរាំតាមចង្វាក់ភ្លេងសម័យមានរាំវង់ រាំក្បាច់ សារ៉ាវ៉ាន់យ៉ាងសប្បាយក្រៃលែង តែក៏គេមិនភ្លេចយកចង្ហាន់ទៅវត្តអារាមដែរ ។ សាន សារិន
ចែករំលែកព័តមាននេះ