ខេត្តមណ្ឌលគិរី ៖ កសិកររស់នៅខេត្តមណ្ឌលគិរី កំពុងមមាញឹកលើការប្រមូលផលដំណាំដំឡូងបារាំង ដែលកំពុងដាំសាកល្បងចំនួន១២គ្រួសារ ខណៈមន្ទីរកសិកម្មរំពឹងថា និងមានកសិករបង្កើនការដាំដុះនាឆ្នាំនេះ។ លោក សុង ឃាង…
ខេត្តមណ្ឌលគិរី ៖ កសិកររស់នៅខេត្តមណ្ឌលគិរី កំពុងមមាញឹកលើការប្រមូលផលដំណាំដំឡូងបារាំង ដែលកំពុងដាំសាកល្បងចំនួន១២គ្រួសារ ខណៈមន្ទីរកសិកម្មរំពឹងថា និងមានកសិករបង្កើនការដាំដុះនាឆ្នាំនេះ។
លោក សុង ឃាង ប្រធានមន្ទីរកសិកម្មខេត្តបានឲ្យដឹងថា ក្នុងឆ្នាំ ២០១៩ មន្ទីរបានឲ្យកសិករសាកល្បងដាំចំនួន១២គ្រួសារ លើពូជចំនួន៤ ជាលទ្ធផលគឺទទួលបានផលល្អ ហើយនៅឆ្នាំ២០២០នេះលោកសង្ឃឹមថានឹងមានការដាំដុះច្រើនជាងមុន ។
លោកប្រធានមន្ទីរបន្តថា កន្លងមកសកលវិទ្យាល័យភូមិន្ទកសិកម្មបាននាំយកពូជដំទ្បូងបារាំងផ្សេងៗ ពីប្រទេសមួយចំនួនដូចជា ប្រទេសអាល្លឺម៉ង់៤ពូជ, ប្រទេសអៀកទ្បង់៤ពូជ ប្រទេសកូរ៉េ១៣ពូជ និងប្រទេសវៀតណាម២ពូជ ។
លោកប្រធានមន្ទីរបានបន្តថា តាមរយៈលទ្ធផលនៃការពិសោធន៍ស្រាវជ្រាវកន្លងមករបស់សកលវិទ្យាល័យភូមិន្ទកសិកម្ម បានបង្ហាញឲ្យឃើញថា ពូជដំឡូងបារាំង ដែលសមស្រប សម្រាប់ខេត្តមណ្ឌលគិរី មាន៣ពូជ ១. ពូជ Tornado នាំចូលពីប្រទេសអៀកឡង់ ២. ពូជ Madeira និង ពូជ Coronada នាំចូលពី ប្រទេសអាល្លឺម៉ង់ ៣. ពូជ PO3 និង ពូជ PO7 នាំចូលពីប្រទេសវៀតណាម ចំពោះទិន្នផលអាចទទួលបានពី ១៣តោន ទៅ ២៥តោន ក្នុងមួយហិកតា ។
លោកប្រធានមន្ទីរបានបន្តទៀតថា ដោយទ្បែកពូជដទៃទៀត សកលវិទ្យាល័យកំពុងធ្វើការតាមដាននៅទ្បើយ រង់ចាំពិនិត្យមើលលទ្ធផលនៅពេលក្រោយបន្តទៀត ទើបអាចធ្វើសេចក្តីសន្និដ្ឋាន ។ អំពីរដូវកាលដាំដុះមន្ត្រីជំនាញបានពិនិត្យឃើញថា រដូវដែលអាចដាំដុះបានគឺនៅ ចន្លោះពីចុងខែកញ្ញា ដល់សប្តាហ៍ទី២ នៃខែធ្នូ ។ តែសមស្របបំផុត គឺចាប់ពី ពាក់កណ្តាលខែតុលា ដល់ ខែវិច្ឆិកា ។ ចំពោះការប្រមូលផលដំឡូងបារាំង នាពេលនេះគឺស្ថិតនៅចំការរបស់កសិករឈ្មោះ កែវ ប៊ុនសេង នៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ៕ (កែសម្រួលដោយ ៖ ធីតា)
ចែករំលែកព័តមាននេះ