មកដល់ពេលនេះ វីរុសកូវីដ១៩បានផ្តាច់ជីវិតវេជ្ជបណ្ឌិតនិងគិលានុបដ្ឋាយិកាជាង ១០០នាក់នៅជុំវិញពិភពលោកដែលជិតពាក់កណ្តាលនៃពួកគេត្រូវបានគេរាយការណ៍ថា មាននៅក្នុងប្រទេសអុីតាលី។
សហរដ្ឋអាមេរិកបានឃើញគ្រូពេទ្យសង្គ្រោះបន្ទាន់ដំបូងរបស់ខ្លួនបានបាត់បង់ជីវិត បន្ទាប់ពីបានបង្ហាញរោគសញ្ញាកូវីដ១៩ ក្នុងសប្តាហ៍នេះ។ បុគ្គលិកថែទាំសុខភាពជាច្រើននាក់ផ្សេងទៀតបានបាត់បង់ជីវិត ចាប់តាំងពីមានការផ្ទុះឡើងនៅពាសពេញពិភពលោក រួមទាំងនៅប្រទេសចិន សហរដ្ឋអាមេរិក បារាំង អេស្ប៉ាញ និងអុីរ៉ង់។
វីរុសដែលត្រូវបានគេរាយការណ៍ដំបូងនៅទីក្រុង Wuhan ប្រទេសចិន បានឆ្លងដល់មនុស្សជាងមួយលាននាក់នៅទូទាំង ១៨១ប្រទេស និងតំបន់ ខណៈដែលជាង ៥៨០០០នាក់បានបាត់បង់ជីវិត នេះបើយោងតាមតួលេខចុងក្រោយបង្អស់ពីសាកលវិទ្យាល័យ Johns Hopkins ។
ថ្លែងប្រាប់សារព័ត៌មាន Newsweek នាយកប្រតិបត្តិនៃក្រុមប្រឹក្សាថែទាំសុខភាពអន្តរជាតិ លោក Howard Catton មានប្រសាសន៍ថា៖ «យើងមានការព្រួយបារម្ភអស់រយៈពេលមួយសប្តាហ៍អំពីចំនួនគិលានុបដ្ឋាយិកានិងបុគ្គលិកថែទាំសុខភាពដទៃទៀត ដែលបានឆ្លងវីរុសនេះ ហើយគិលានុបដ្ឋាយិកានៅជុំវិញពិភពលោកកំពុងធ្វើការ។ ស្ថិតនៅក្រោមសម្ពាធយ៉ាងខ្លាំងអស់រយៈពេលជាច្រើនម៉ោង ដោយគ្មានការឈប់សម្រាកនិងគ្មានថ្ងៃឈប់សម្រាក ហើយវានឹងធ្វើឱ្យប៉ះពាល់ដល់សុខភាព»។
លោកបានសម្គាល់ឃើញថា អត្រាឆ្លងក្នុងចំណោមបុគ្គលិកថែទាំសុខភាពនៅអុីតាលីមាន ៩% និង អេស្ប៉ាញមាន១៤%។ លោកបានបន្ថែមថា៖ «គួរឱ្យស្តាយណាស់ដែលមានការស្លាប់ក្នុងចំណោមគិលានុបដ្ឋាយិកានៅអុីតាលីនិងអេស្ប៉ាញ និងនៅអ៊ីរ៉ង់និងឥណ្ឌូនេស៊ីគិលានុបដ្ឋាយិកាខ្លះបានបាត់បង់ជីវិតដោយការធ្វើអត្តឃាត»។
យើងមិនមានការឆ្ងល់ទេថា អត្រានៃការឆ្លងមានទាក់ទងនឹងផ្នែកខ្លះនៃកង្វះខាតឧបករណ៍ការពារផ្ទាល់ខ្លួន។ យើងដឹងថាមានការខ្វះខាតជាសកល ប៉ុន្តែគិលានុបដ្ឋាយិកាគឺជាជួរមុខពួកគេជាវីរបុរស ហើយពួកគេត្រូវតែត្រូវបានការពារប្រសិន បើពួកគេចង់បន្តការងារសង្គ្រោះជីវិត។
នេះគឺជាចំនួនវេជ្ជបណ្ឌិតនិងគិលានុបដ្ឋាយិកាតាមប្រទេស ដែលបានបាត់បង់ជីវិតដោយសារជំងឺកូវីដ១៩ គិតត្រឹមថ្ងៃទី៤ ខែមេសា ឆ្នាំ២០២០៖ អុីតាលី យ៉ាងហោចណាស់៦៦នាក់, ចិន យ៉ាងហោចណាស់១៣នាក់, ចក្រភពអង់គ្លេស យ៉ាងហោចណាស់៥នាក់, បារាំង យ៉ាងហោចណាស់ ៥នាក់, អេស្ប៉ាញ យ៉ាងហោចណាស់ ៥នាក់, អុីរ៉ង់ យ៉ាងហោចណាស់ ៣នាក់, អាមេរិក យ៉ាងហោចណាស់១នាក់, ក្រិច យ៉ាងហោចណាស់ ១នាក់, ប៉ូឡូញ យ៉ាងហោចណាស់១នាក់, ប៉ាគីស្ថាន យ៉ាងហោចណាស់ ១នាក់៕ (យោងតាមប្រភពពី www.newsweek.com)
ចែករំលែកព័តមាននេះ