រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានថ្លែងថា ពេលវេលានេះ គឺជាកាលៈទេសៈដែលមន្ត្រីរាជរដ្ឋាភិបាលបរិច្ចាគថវិកាផ្ទាល់ខ្លួនដោយស្ម័គ្រចិត្ត គ្មានការបង្ខំដើម្បីប្រយុទ្ធប្រឆាំងនឹងជំងឺកូវីដ១៩ និងធ្វើដើម្បីប្រជាពលរដ្ឋ ។…
រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានថ្លែងថា ពេលវេលានេះ គឺជាកាលៈទេសៈដែលមន្ត្រីរាជរដ្ឋាភិបាលបរិច្ចាគថវិកាផ្ទាល់ខ្លួនដោយស្ម័គ្រចិត្ត គ្មានការបង្ខំដើម្បីប្រយុទ្ធប្រឆាំងនឹងជំងឺកូវីដ១៩ និងធ្វើដើម្បីប្រជាពលរដ្ឋ ។ ជាការកត់សម្គាល់ក្រោយពេលដែលសម្តេចតេជោបានប្រកាសបរិច្ចាគប្រាក់បៀវត្ស៧ខែជូនដល់គណៈកម្មការជាតិប្រយុទ្ធប្រឆាំងជំងឺកូវីដ១៩ធ្វើជាគំរូរួចមក ក្រុមមន្ត្រីដែលស្ថិតក្នុងសមាជិក សមាជិការាជរដ្ឋាភិបាល និងស្ថាប័ននានារាប់ទាំងជួរមន្ត្រីអ្នកមុខអ្នកការផ្សេងៗក៏បានស្ម័គ្រចិត្តភ្លូកទឹកភ្លូកដី បរិច្ចាគបៀវត្សរបស់ខ្លួនជូនដល់គណៈកម្មការជាតិដើម្បីមានលទ្ធភាពឆ្លើយតបនៅនឹងការទប់ស្កាត់កូវីដ១៩ ។
យោងតាមសារសំឡេងរបស់សម្តេចតេជោហ៊ុន សែន នាយករដ្ឋមន្ត្រីចេញផ្សាយតាមប្រព័ន្ធតេឡេក្រាមនៅថ្ងៃទី២ ខែមេសា បានមានប្រសាសន៍ថា៖ «ខ្ញុំសូមគណៈអចិន្ត្រៃយ៍ ក៏ដូចជាសមាជិករាជរដ្ឋាភិបាល ក៏ដូចជាថ្នាក់ដឹកនាំនៅតាមស្ថាប័ន ហើយថ្នាក់ខេត្ត និងថ្នាក់ផ្សេងៗ ដែលមានការពាក់ព័ន្ធនៅពេលប្រយុទ្ធជំងឺកូវីដ១៩នេះ រាជរដ្ឋាភិបាលមិនមែនខ្វះលុយទេ ប៉ុន្តែទឹកចិត្តរបស់ប្រជាជនយើងមានការចូលរួមខ្លាំងណាស់ រហូតដល់ពេលនេះលុយជាង១១លានដុល្លារ ត្រូវបានបញ្ចូលជាបន្តបន្ទាប់តាមតិច តាមច្រើន» ។
សម្តេចតេជោបន្តថា បន្ទាប់ពីសម្តេចប្រកាសបរិច្ចាគបៀវត្សរបស់ខ្លួនចំនួន៧ខែ សម្រាប់ចូលទៅក្នុងការប្រយុទ្ធប្រឆាំងកូវីដ១៩ ឃើញមន្ត្រីរាជរដ្ឋាភិបាល មានឧបនាយករដ្ឋមន្ត្រី រដ្ឋមន្ត្រី ក៏ចូលរួមដែរ ។ ខ្ញុំយល់ថាការងារនេះមិនមែនជាការចាប់បង្ខំនោះទេ ក៏ប៉ុន្តែវាបង្ហាញពីកាយវិការនៃការចូលរួមប្រយុទ្ធប្រឆាំង មិនមែនគ្រាន់តែចូលរួមនឹងមាត់នោះទេ គឺមានថវិកាផ្ទាល់ខ្លួនថែមទៀត ។ ចំណុចនេះបានធ្វើឲ្យមានជំនឿចិត្តដល់ប្រជាពលរដ្ឋ ហើយបង្កើននូវជំនឿទុកចិត្តនូវក្រុមគ្រូពេទ្យដែលចុះជួយព្យាបាលអ្នកជំងឺតាមការរំលែកថវិកាផ្ទាល់ខ្លួននេះ ។
សម្តេចក៏បានគូសបញ្ជាក់ថា៖«មន្ត្រីនីមួយៗមានលទ្ធភាពមិនដូចគ្នានោះទេ អុីចឹងមន្ត្រីខ្លះមានលទ្ធភាពអាចបរិច្ចាគបានរាប់ខែទាំងស្រុង តែមន្ត្រីខ្លះទៀតអាចលទ្ធភាព២០% ឬ៣០% ឬ៤០% ឬ៥០% ទៅតាមលទ្ធភាពដែលខ្លួនអាចធ្វើទៅបាន ។ អុីចឹងខ្ញុំស្នើថាខាងរាជរដ្ឋាភិបាលនៅក្នុងក្រសួងស្ថាប័នធ្វើការចលនាទៅរដ្ឋលេខាធិការ អនុរដ្ឋលេខាធិការធ្វើការបរិច្ចាគទៅតាមការស្ម័គ្រចិត្ត ។ អ្នកខ្លះប្រាក់ប៉ុណ្ណឹងមិនមានបញ្ហាសម្រាប់គាត់ទេ ប៉ុន្តែអ្នកខ្លះមានសម្រាប់តែបង្គ្រប់ តែក៏មានលទ្ធភាពអាចជួយខ្លះបានដែរ ។ ចំណែកមន្ត្រីរដ្ឋសភា ព្រឹទ្ធសភា ក៏អាចធ្វើការបរិច្ចាគបានដែរម្នាក់ៗ ខាងផ្នែកកងទ័ព នគរបាល ក៏អាចធ្វើបាន ប៉ុន្តែសូមកុំចាប់បង្ខំ» ។
សម្តេចតេជោក៏បានលើកឡើងថា អ្នកស្ម័គ្រចិត្តបរិចា្ចគថវិកាផ្ទាល់ខ្លួននោះត្រូវតែសរសេរលិខិតទៅលោកម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការជាតិប្រឆាំងនឹងជំងឺកូវីដ១៩ថាខ្លួនបរិច្ចាគប្រាក់ប៉ុន្មានខែ ឬប៉ុន្មានភាគរយក្នុងមួយខែ ហើយរយៈពេលប៉ុន្មានខែ ។ គេចម្លងទៅក្រសួងសេដ្ឋ
កិច្ច និងហិរញ្ញវត្ថុ និងក្រសួងមុខងារសាធារណៈ ដើម្បីគេធ្វើការចាត់ចែងប្រាក់ទាំងនេះ ។ សម្តេច ក៏បានលើកឡើងសម្រាប់សម្តេចប្រាក់ខែមួយខែប្រមាណ១០លានរៀល អុីចឹងកាត់ពន្ធនៅសល់៩លាន ៩ម៉ឺនរៀលទេ ក្នុងមួយខែ ។
ចំពោះសមាជិករដ្ឋសភា ព្រឹទ្ធសភា សមាជិកក្រុមប្រឹក្សារដ្ឋធម្មនុញ្ញ សមាជិកគណៈកម្មាធិការជាតិរៀបចំការបោះឆ្នោត ក៏អាចធ្វើបានដោយមិនចាំបាច់ប្រាប់ថាប្រាក់ខែប៉ុន្មាននោះទេ ដោយសុំមួយខែជូនប៉ុណ្ណេះ ឧទាហរណ៍ មួយខែជូន៥០ម៉ឺនរៀល ១លាន ឬ២លានរៀល ក្នុងរយៈពេលប៉ុន្មានខែ ។សម្តេចប្រមុខរាជរដ្ឋាភិបាលក៏បានលើកឡើងថាមិនគិតតែសមាជិករាជរដ្ឋាភិបាលនោះទេ តំណាងគណបក្សនយោបាយផ្សេងៗក៏អាចធ្វើបានដែរ ប៉ុន្តែមិនចាប់បង្ខំនោះទេ ហើយពេលធ្វើគឺត្រូវធ្វើលិខិតទៅកាន់រដ្ឋមន្ត្រីក្រសួងសុខាភិបាលផ្ទាល់ ។ថ្នាក់អគ្គនាយក អគ្គនាយកដ្ឋានរង ប្រធាននាយកដ្ឋាន ក៏អាចធ្វើបានខ្លះដែរ តែកុំតម្រូវឲ្យធ្វើច្រើនពេក ។ អ្នកខ្លះគេក៏មិនចាំបាច់ប្រាក់ខែរដ្ឋនោះទេ ប៉ុន្តែកាលៈទេសៈទាមទារឲ្យឃើញកាយវិការជាក់ស្តែង មិនមែនគ្រាន់តែនិយាយនោះទេ ។
សម្តេចតេជោបានសង្កត់ធ្ងន់ថា៖«ខ្ញុំមិនចាត់ទុកថារឿងនេះវាជាលក្ខខណ្ឌវិនិច្ឆ័យសម្រាប់មន្ត្រីទេ ប៉ុន្តែវាគ្មានពេលវេលាសម្រាប់ការឈឺឆ្អាលហួសពីពេលវានេះទៅទៀតទេ ។ កងទ័ពក៏អាចធ្វើបាន អគ្គបញ្ជាការកងទ័ព អគ្គបញ្ជាការរង មេបញ្ជាការជើងគោក អនុបញ្ជាការជើងគោក មេបញ្ជាការជើងអាកាស អនុបញ្ជាការជើងអាកាស មេបញ្ជាការជើងទឹក មេបញ្ជាការរងជើងទឹក អគ្គស្នងការ អគ្គស្នងការរង ចៅហ្វាយខេត្ត ចៅហ្វាយខេត្តរង អាចធ្វើបាន ។ យើងមានមន្ត្រីរាប់ពាន់នាក់ដែលស៊ីប្រាក់ខែរដ្ឋ ខ្លះធ្វើជាទីប្រឹក្សារដ្ឋាភិបាលមានឋានៈស្មើរដ្ឋមន្ត្រី ប៉ុន្តែប្រាក់ខែមិនគ្រាន់តែបង្ហាញថាខ្លួនលះបង់ប៉ុណ្ណេះ ដាក់ជាតួលេខប៉ុន្មាន មិនចាំជាភាគរយ ថាខ្លួនចូល៥០ម៉ឺនរៀល ក្នុងរយៈពេលប៉ុន្មានខែ«…» ។សម្តេចតេជោយល់ថាប្រសិនបើខ្មែរយើងមានចលនាផុលផុសយ៉ាងដូច្នេះ បរទេសគេមិនអាចមើលងាយនោះទេ លើកលែងតែគេចង់ធ្វើបាបយើង ។
សម្តេចតេជោហ៊ុន សែន បានលើកឡើងថា ពេលវេលានេះគឺជាពេលវេលាប្តូរផ្តាច់ក្នុងការប្រយុទ្ធជាមួយកូវីដ១៩ ហើយសម្តេចក៏អរគុណទុកជាមុនសម្រាប់ការបរិច្ចាគថវិកាផ្ទាល់ខ្លួននេះ ដើម្បីបង្ហាញពីការរួមរស់ជាមួយប្រជាពលរដ្ឋ ។«វប្បធម៌នៃការចែករំលែក ជួយគ្នាក្នុងគ្រាមានអាសន្ន គឺជាមោទនភាពជាតិខ្មែរ» ជាទស្សនៈដែលបានលើកឡើងថា នៅក្នុងលិខិតមួយច្បាប់ផ្ញើជូនរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ
និងរដ្ឋមន្ត្រីក្រសួងសុខាភិបាលអំពីការស្ម័គ្រចិត្តបរិច្ចាគប្រាក់បៀវត្សរបស់សម្តេចតេជោចំនួន៧ខែ ចាប់ពីខែមីនា រហូតដល់ខែកញ្ញា ឆ្នាំ២០២០ ជូនទៅគណៈកម្មការជាតិប្រយុទ្ធនឹងជំងឺកូវីដ១៩ ។ ការសម្រេចចិត្តផ្តល់ប្រាក់បៀវត្សរបស់សម្តេចនាពេលនេះគឺដោយសារស្ថានភាពនៃការវិវឌ្ឍរបស់ជំងឺកូវីដ-១៩ នៅក្នុងព្រះរាជាណាចក្រកម្ពុជានៅតែមិនទាន់បង្ហាញនូវសញ្ញានៃការថមថយណាមួយនៅឡើយនោះទេ ។
កាយវិការលះបង់ខ្ពស់របស់សម្តេចតេជោនាយករដ្ឋមន្ត្រីនាពេលនេះ គឺពិតជាគំរូវីរភាពដ៏ថ្លៃថ្លា ក្នុងស្មារតីស្រឡាញ់ជាតិ និងប្រជាជន។ គួររំឭកថា នៅរាល់ពេលដែលប្រទេសជាតិជួបប្រទះនូវគ្រាលំបាក ម្តងៗ សម្តេចតេជោ ហ៊ុន សែន តែងបានឈានមុខគេក្នុងការលះបង់ប្រយោជន៍ផ្ទាល់ខ្លួន ដើម្បីស្វែងរកសេចក្តីសុខជូនប្រជាជនជានិច្ច ។
ក្នុងនោះក៏មានការហ៊ានលះបង់នូវកម្លាំងកាយ កម្លាំងចិត្ត រហូតដល់អាយុជីវិតទៀតផង ដូចជាបុព្វហេតុដើម្បីរំដោះប្រទេស និងប្រជាជនឱ្យបានរស់រានមានជីវិតពីរបបប្រល័យពូជសាសន៍ខ្មែរក្រហម ភាពក្លាហាននៃការអនុវត្តនយោបាយឈ្នះ-ឈ្នះ ក្នុងការហ៊ានចូលទៅក្នុងតំបន់សមាហរណកម្មខ្មែរក្រហមក្នុងឆ្នាំ១៩៩៨ ការជម្នះបានដោយជោគជ័យនៃសេដ្ឋកិច្ចកម្ពុជានូវវិបត្តិហិរញ្ញវត្ថុសាកលក្នុងឆ្នាំ២០០៩ និងភាពលេចធ្លោនាពេលថ្មីៗកន្លងមកក្នុងដំណើរទស្សនកិច្ចទៅប្រទេសចិនដើម្បីរឹតចំណងសាមគ្គីភាព និងលើកទឹកចិត្តដល់មិត្តចិនក្នុងកាលៈទេសៈដែលប្រទេសនេះកំពុងជួបវិបត្តិកូវីដ-១៩ នេះជាដើម ។
គំរូនៃការបរិច្ចាគរបស់សម្តេចតេជោនាយករដ្ឋមន្ត្រី នៅក្នុងដំណាក់កាលដែលប្រទេសកម្ពុជា និងពិភពលោកកំពុងជួបវិបត្តិនៃជំងឺកូវីដ-១៩ មិនទាន់ឃើញមានសញ្ញាធូរស្រាល ហើយនិងស្ថានភាពនៃសេដ្ឋកិច្ចនិងហិរញ្ញវត្ថុសាកលលោកកំពុងធ្លាក់ដាំក្បាលចុះយ៉ាងគំហុកបែបនេះ បានឆ្លុះបញ្ចាំងពីវិធានការថ្មីបន្ថែមទៀត ក្រៅពីការចាត់វិធានការត្រៀមស្តុកបម្រុងទុកនូវទំនិញយុទ្ធសាស្ត្រ ដូចជា អង្ករ និងអំបិល ជាដើម និងត្រៀមទំនិញយុទ្ធសាស្ត្រផ្នែកសុខាភិបាល ដូចជាម៉ាស់ ទឹកអាល់កុល សម្លៀកបំពាក់ការពារសម្រាប់គ្រូពេទ្យ ។ល។
សម្តេចតេជោហ៊ុន សែន ក៏បានចាត់វិធានការត្រៀមបម្រុងធនធានថវិកាជាតិផងដែរ ។ ក្នុងន័យនេះដើម្បីកាត់បន្ថយការចំណាយហិរញ្ញវត្ថុសាធារណៈ និងដើម្បីចូលរួមសន្សំថវិកាជាតិ សម្តេចនាយករដ្ឋមន្ត្រី បានស្ម័គ្រចិត្តផ្តល់បៀវត្សចំនួន៧ខែ ដើម្បីផ្តល់ជូនគណៈកម្មការជាតិប្រយុទ្ធនឹងជំងឺកូវីដ១៩ នាពេលនេះ ។
ជារួមយើងទាំងអស់គ្នា សុទ្ធតែបានដឹងហើយថា ក្រៅពីបានសម្លាប់ជីវិតមនុស្សអស់រាប់ម៉ឺននាក់នៅជុំវិញពិភពលោកហើយនោះ ជំងឺកូវីដ១៩ បានធ្វើឱ្យខូចខាតដល់សេដ្ឋកិច្ចកម្ពុជា និងសេដ្ឋកិច្ចពិភពលោកយ៉ាងដំណំផងដែរ ។ ដូច្នេះ គឺមានតែជាតិខ្មែរយើងទាំងអស់គ្នាចេះរួបរួមសាមគ្គីគ្នារវាងប្រជាពលរដ្ឋគ្រប់រូបជាមួយប្រមុខរាជរដ្ឋាភិបាល សមាជិករាជរដ្ឋាភិបាល មន្ត្រីរាជការ និងកងកម្លាំងប្រដាប់អាវុធគ្រប់ប្រភេទប៉ុណ្ណោះ ទើបយើងសង្ឃឹមថានឹងទទួលបានជោគជ័យក្នុងពេល ឆាប់ៗ ក្នុងការប្រយុទ្ធប្រឆាំងនឹងជំងឺកូវីដ១៩នេះ ហើយ «វប្បធម៌នៃការចែករំលែកជួយគ្នាក្នុងគ្រាមានអាសន្នគឺជាមោទនភាពជាតិខ្មែរ» ៕
ចែករំលែកព័តមាននេះ