ខ្យល់កន្ត្រាក់វាយប្រហារនៅប៉ៃលិន ក្រោយបាត់ដំបងមួយថ្ងៃ
- ប៉ៃលិន
ខេត្តប៉ៃលិន ៖ បើតាមសេចក្តីរាយការណ៍ពីលោក ចេង តូ ជាមេភូមិអូរ៧៥ បានឱ្យកោះសន្តិភាពដឹងនៅព្រឹកថ្ងៃទី០៤ មេសា នេះថា ក្រោយពីមេឃខ្មៅអួរអាប់…
ខេត្តប៉ៃលិន ៖ បើតាមសេចក្តីរាយការណ៍ពីលោក ចេង តូ ជាមេភូមិអូរ៧៥ បានឱ្យកោះសន្តិភាពដឹងនៅព្រឹកថ្ងៃទី០៤ មេសា នេះថា ក្រោយពីមេឃខ្មៅអួរអាប់ ស្រាប់តែមានភ្លៀងលាយដោយខ្យល់កន្ត្រាក់ បានកើតឡើងកាលពីវេលាម៉ោង៤ និង៣០នាទីរសៀលថ្ងៃទី០២ មេសា បណ្តាលឱ្យដួលរលំ និងប៉ើងដំបូលផ្ទះប្រជាពលរដ្ឋអស់ចំនួន៤ខ្នង ព្រមទាំងរងរបួសមនុស្សម្នាក់ស្រាល ។ គួររំលឹកថា៖ ខ្យល់កន្ត្រាក់ប្រហារក្រុងនិងស្រុកក្នុងខេត្តបាត់ដំបង លើកនេះបំផ្លាញធ្ងន់ធ្ងរ
លោកមេភូមិឱ្យដឹងទៀតថា រហូតដល់វេលារសៀលថ្ងៃ០៣ មេសា ឆ្នាំ២០២០ លោក ឃ្លោក នួយ អភិបាលរងខេត្ត ជាប្រធានក្រុមការងារចុះជួយឃុំអូរអណ្តូង ដោយមានការចូលរួមពីលោកអនុភូមិអូរ៧៥ បានអញ្ជើញចុះទៅសួរសុខទុក្ខដល់ប្រជាពលរដ្ឋ ដែលទទួលរងគ្រោះមហន្តរាយ ដោយសារខ្យល់កន្ត្រាក់ទាំងអស់នោះ ។
មានអំណោយជូនពលរដ្ឋរងគ្រោះ ស្ថិតនៅក្នុងភូមិអូរ៧៥ ឃុំអូរអណ្តូង ស្រុកសាលាក្រៅ ខេត្តប៉ៃលិន ដោយក្រុមការងារបាននាំយកមកជាមួយនូវសម្ភារ:គ្រឿងឧបភោគបរិភោគ ក្នុងម្នាក់ៗ ទទួលបានអង្ករ២០គីឡូក្រាម ប្រេងឆា២ដប ទឹកត្រី១យួរ ត្រីខ១យួរ សាប៊ូលាងដៃ៤ដុំ និងថវិកា២ម៉ឺនរៀល ដើម្បីជួយដោះស្រាយ ចំពោះការលំបាករបស់ពួកគាត់បានមួយផ្នែកដែរ ។
លោកក៏បានបន្ថែមទៀតថា ករណីខ្យល់កន្ត្រាក់នេះ បានធ្វើឱ្យដួលរលំផ្ទះប្រជាពលរដ្ឋទាំងចំនួន២ខ្នង និងប៉ើងដំបូលអស់ចំនួន២ខ្នង ហើយរហូតមកដល់ពេលនេះ ម្ចាស់ផ្ទះទាំងអស់ កំពុងនាំគ្នាសាងសង់ និងជួសជុលសារជាថ្មីឡើងវិញ ។ ចំពោះករណីរន្ទះបាញ់ បណ្តាលឱ្យរបួស ឬស្លាប់ មិនទាន់មានកើតឡើងនៅក្នុងទឹកដីខេត្តប៉ៃលិននៅឡើយ នាឆ្នាំ២០២០នេះ ។
ដូច្នេះ ប្រជាពលរដ្ឋម្នាក់ៗត្រូវមានការប្រុងប្រយ័ត្ន ព្រោះក្តៅកាន់តែខ្លាំង នៅពេលមានករណីភ្លៀងផ្គរក៏ខ្លាំងផងដែរ ៕
ចែករំលែកព័តមាននេះ