ខេត្តប៉ៃលិន ៖ បន្ទាប់ពីគេហទំព័រកាសែតកោះសន្តិភាពបានបង្ហោះចេញផ្សាយ កាលពីវេលាម៉ោង៥ និង១២នាទីល្ងាច ថ្ងៃទី០២ មេសា ឆ្នាំ២០២០ រហូតដល់វេលាម៉ោង៣ និង៣០នាទីរសៀលថ្ងៃទី០៣…
ខេត្តប៉ៃលិន ៖ បន្ទាប់ពីគេហទំព័រកាសែតកោះសន្តិភាពបានបង្ហោះចេញផ្សាយ កាលពីវេលាម៉ោង៥ និង១២នាទីល្ងាច ថ្ងៃទី០២ មេសា ឆ្នាំ២០២០ រហូតដល់វេលាម៉ោង៣ និង៣០នាទីរសៀលថ្ងៃទី០៣ មេសា ២០២០ មានសប្បុរសជនម្នាក់ជាអាជីវករលក់ដូរទាខ្វៃនៅរាជធានីភ្នំពេញបានវេរប្រាក់ចំនួន១០០០០០រៀល តាមរយ:ភ្នាក់ងារប្រចាំខេត្តប៉ៃលិន យកទៅឧបត្ថម្ភដល់លោកយាយកំសត់ទុរគតម្នាក់ ដែលប្រកបរបរ ដើរបេះស្លឹកផ្ទី ស្លឹកបាស និងឡើងដើមអំពិលខ្ពស់ៗបេះស្លឹកអំពិល ដាក់លក់ដូរនៅទីផ្សារព្រំថ្មី ដើម្បីបានប្រាក់បន្តិចបន្តួច សម្រាប់ចិញ្ចឹមចៅកំព្រាឪពុកម្តាយម្នាក់ ។ ក្នុងការផ្តល់ថវិកាដល់លោកយាយកំសត់រូបនេះ ក៏មានការអញ្ចើញចូលរួមពីលោក ព្រាប សារុន មេភូមិផ្សារព្រំជើងផងដែរ ។
លោកយាយកំសត់ទុរគត ឈ្មោះ ហំ ម៉ៃ អាយុ៦៧ឆ្នាំ បានលើកដៃសំពះថ្លែងអំណរគុណពីចម្ងាយ ដល់លោក សេង គី ជាអាជីវករលក់ទាខ្វៃ នៅផ្សារច្បារអំពៅ រាជធានីភ្នំពេញ ទាំងអួលដើមក.ថា គាត់បានទទួលថវិកាដ៏ច្រើន ដែលពុំធ្លាប់មានពីមុនមក គាត់ពិតជាមានការរំភើបក្នុងចិត្តយ៉ាងខ្លាំង ។ លោកយាយ ក៏សូមជូនពរដល់ម្ចាស់អំណោយ ឱ្យប្រកបរបរលក់ដូរទាខ្វៃ នៅក្នុងផ្សារច្បារអំពៅ រាជធានីភ្នំពេញ មានម៉ូយច្រើន និងទទួលបាននូវសុខភាពល្អ អាយុវែង កម្លាំងមាំមួន រស់នៅជួបជុំក្រុមគ្រួសារ កុំឱ្យស្គាល់អត់ ស្គាល់ឃ្លាន ដូចជារូបគាត់ឡើយ ។
ចំណែកលោក សេង គី ជាអាជីវករលក់ទាខ្វៃ ក៏បានជួបនិយាយទូរស័ព្ទជាមួយលោកយាយកំសត់ខាងលើដែរ ដោយលើកទឹកចិត្តឱ្យខំប្រឹងតស៊ូរស់នៅបន្តទៀត ដើម្បីចៅកំព្រា ហើយក៏ផ្តាំផ្ញើឱ្យលោកយាយ បន្ទាប់ពីទទួលថវិកានេះហើយ សូមយកទៅទិញម្ហូបអាហារឆ្ងាញ់ៗ ទទួលទានឱ្យបានឆ្អែតផងដែរ ។
បើតាម លោក ព្រាប សារុន មេភូមិផ្សារព្រំជើង បានឱ្យដឹងដែរថា លោកយាយ ហំ ម៉ៃ ពិតជាលំបាកវេទនាខ្លាំងមែន ដោយបច្ចុប្បន្នគាត់រកព្រឹកខ្វះល្ងាច ខណ:មានកូនរហូតដល់ទៅ៥នាក់ តែពួកគេទាំងនោះសុទ្ធតែក្រីក្រ គ្មានលទ្ធភាពនឹងចិញ្ចឹមម្តាយ ទើបនាំគ្នាចាកចេញពីគាត់ ទៅធ្វើកម្មករនៅតាមខេត្តផ្សេងៗ និងអ្នកខ្លះចេញទៅធ្វើការនៅប្រទេសថៃជាដើម ទើបធ្វើឱ្យលោកយាយរស់នៅជាមួយនឹងចៅកំព្រាឪពុកម្តាយ ដោយជួលផ្ទះគេស្នាក់នៅ ហើយរាល់ថ្ងៃ ដើរបេះបន្លែតាមព្រៃភ្នំលក់ដូរនៅក្នុងផ្សារ បានប្រាក់តិចតួចសម្រាប់ផ្គត់ផ្គង់ជីវភាពប្រចាំថ្ងៃ ។
សូមបញ្ជាក់ថា លោកយាយចំណាស់ម្នាក់ មានកូន ប្រុសស្រី៥នាក់ តែដោយសារពួកគេមានជីវភាពក្រីក្រ មិនអាចចិញ្ចឹមម្តាយម្នាក់ឱ្យរស់នៅជាមួយបាន ទើបបណ្តោយឱ្យគាត់ ជួលផ្ទះគេស្នាក់នៅជាមួយនឹងចៅកំព្រាឪពុកម្តាយ ប្រកបរបរ ដើរបេះស្លឹកផ្ទី ស្លឹកបាស ស្លឹកម្រះ និងឡើងបេះស្លឹកអំពិល ហើយទិញបន្លែគេបន្ថែម ដើម្បីយកទៅជួលតូបក្នុងផ្សារដាក់លក់ បានប្រាក់តិចតួច សម្រាប់ផ្គត់ផ្គង់ជីវភាពពីរនាក់យាយ និង ចៅ ។
លោកយាយវ័យចំណាស់ ឈ្មោះ ហំ ម៉ៃ អាយុ៦៧ឆ្នាំ មានប្តីឈ្មោះ ហូវ ហាច អាយុ៧៥ឆ្នាំ លែងលះគ្នាតាំងពីគាត់អាយុ៣០ឆ្នាំជាង ដោយមានកូននឹងគ្នា ចំនួន៥នាក់ ប្រុស១ ស្រី៤នាក់ ។ បច្ចុប្បន្ន គាត់រកស៊ីចិញ្ចឹមចៅកំព្រាម្នាក់ ឈ្មោះ ចិត្រា តារាវិឆៃ ភេទប្រុស អាយុ៩ឆ្នាំ រៀនថ្នាក់ទី១ នៃសាលាបឋមសិក្សាផ្សារព្រំ រស់នៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ៕
ចែករំលែកព័តមាននេះ