រាជធានីភ្នំពេញ ៖ បុរសម្នាក់ឡើងដើមត្នោតទៅយកទឹកត្នោតផ្អែមទាំងយប់ អកុសលឡើងដល់ពាក់កណ្តាលដើម បានបាក់បង្អោងធ្លាក់បាក់ភ្លៅម្ខាងរងរបួសធ្ងន់ បង្កឲ្យមានការភ្ញាក់ផ្អើលកាលពីវេលាម៉ោង ៩យប់ថ្ងៃទី៣ មេសា ឆ្នាំ២០២០ ស្ថិតនៅវាលស្រែភូមិកប់គង…
រាជធានីភ្នំពេញ ៖ បុរសម្នាក់ឡើងដើមត្នោតទៅយកទឹកត្នោតផ្អែមទាំងយប់ អកុសលឡើងដល់ពាក់កណ្តាលដើម បានបាក់បង្អោងធ្លាក់បាក់ភ្លៅម្ខាងរងរបួសធ្ងន់ បង្កឲ្យមានការភ្ញាក់ផ្អើលកាលពីវេលាម៉ោង
៩យប់ថ្ងៃទី៣ មេសា ឆ្នាំ២០២០ ស្ថិតនៅវាលស្រែភូមិកប់គង សង្កាត់ចោមចៅ២ ខណ្ឌពោធិ៍សែនជ័យ ។
ជនរងគ្រោះឈ្មោះ សាន សុភ័ក្រ ភេទប្រុសអាយុ ៣៦ឆ្នាំ មុខរបរអ្នកឡើងត្នោត ស្នាក់នៅភូមិកន្ទោកជើង សង្កាត់កន្ទោក ខណ្ឌកំបូល មានស្រុកកំណើតនៅ ភូមិបាគ្រង ឃុំគោគល្វាង ស្រុកជើងព្រៃ ខេត្តកំពង់ចាម ។
តាមប្រភពពីប្រជាពលរដ្ឋនៅកន្លែងកើតហេតុបាននិយាយប្រាប់ថា នៅមុនពេលកើតហេតុ ដោយឮសំឡេងស្រែកឱ្យជួយ ។ បន្ទាប់មក បាននាំគ្នាទៅមើល ក៏ស្រាប់តែឃើញជនរងគ្រោះរងរបួសបាក់ភ្លៅ
ផ្នែកខាងឆ្វេងម្ខាង ។
ប្រភពបន្តទៀតថា ខណៈភ្លាមៗនោះ ប្រជាពលរដ្ឋបានទៅប្តឹងមេភូមិកន្លែងកើតហេតុជួយរកសាច់ ញាតិមកយកជនរងគ្រោះទៅព្យាបាល ដោយប្រជាការពារសង្កាត់បានទាក់ទងហៅរថយន្តមកដឹកជនរងគ្រោះយកទៅសង្គ្រោះភ្លាមៗ ។
បើតាមសំដីជនរងគ្រោះបានបញ្ជាក់ប្រាប់ថា ដើមត្នោតខាងលើមានកំពស់ប្រមាណ១០ម៉ែត្រ មុនពេលកើតហេតុគាត់ជិះម៉ូតូមួយគ្រឿងម៉ាកស្គូពី ពណ៌ស ពាក់ស្លាកលេខ កំពង់ចាម1S-0934 ឡើងត្នោតនៅពេលយប់នេះ គឺដើម្បីទៅយកទឹកត្នោតផ្អែមយកមកទុកលក់ បើទុកដល់ព្រឹកទឹកត្នោតមិនសូវផ្អែមល្អទេ ខណៈពេលឡើងបានជាងពាក់កណ្តាលដើម ក៏ស្រាប់តែបង្អោងប្ញស្សីបានបាក់ធ្លាក់មកតែម្ដងទៅ ។
ចែករំលែកព័តមាននេះ