ប្រពៃណីសែនផ្នូរ ឬឆេងម៉េងជាពិធីដែលជនជាតិចិន វៀតណាម និងខ្មែរជាប់សែស្រឡាយចិនតែងប្រារព្ធធ្វើឡើងជារៀងរាល់ឆ្នាំ នៅក្នុងខែមេសា ដើម្បីជាការសម្ដែងការគោរពដឹងគុណចំពោះបុព្វការីជន ឬសាច់ញាតិ ដែលបានចែកឋានទៅកាន់បរលោក ដែលចាត់ទុកជាពិធីដ៏សំខាន់មួយក្នុងជំនឿទំនៀមទម្លាប់ជនជាតិចិន-វៀតណាម ខ្មែរសែស្រឡាយចិន ។
ពិធីសែនផ្នូរ ឬឆេងម៉េងជាទូទៅច្រើនធ្វើឡើងនៅថ្ងៃទី៤ ឬ៥ ខែមេសា ប៉ុន្តែសម្រាប់ក្រុមគ្រួសារជនជាតិចិន វៀតណាម និងខ្មែសែស្រឡាយចិនមួយចំនួនបានកំណត់ថ្ងៃរៀបចំពិធីសែនផ្នូរទៅតាមភាពសមស្របណាមួយរបស់ខ្លួន ។
តាមការកត់សម្គាល់នៅមុនថ្ងៃរៀបចំពិធីគេតែងនាំកូនចៅទៅសម្អាតផ្នូរ ពូនដីបន្ថែម ហើយនៅថ្ងៃសែនគេនាំគ្រួសារទាំងក្មេង ទាំងចាស់ ប្រុសស្រី មកជួបជុំគ្នានៅពីចំហៀងផ្នូរដោយមានក្រាលកន្ទេលពីមុខផ្នូរ រៀបចំគ្រឿងសំណែនផ្សេងៗមានដូចជា បាយ សម្ល មាន់ស្ងោ ជ្រូកខ្វៃ នំនែក ចេក និងអាហារផ្សេងៗរួមទាំង ភេសជ្ជៈ ទឹកក្រូច ស្រាបៀរ តែ ក្រដាសសែន មានក្រដាសមាសក្រដាសប្រាក់ ក្រដាសសម្លៀកបំពាក់ គ្រឿងបរិក្ខារប្រើប្រាស់ផ្សេងៗ ដែលធ្វើពីក្រដាស សម្រាប់ដុតឧទ្ទិសជូនបុព្វការីជន មានមាតាបិតា ជីដូនជីតា កុងម៉ា សាច់ញាតិទាំង៧សន្តាន ។
ជាមួយគ្នានេះក៏មានការប្រោសព្រំទឹកលើផ្នូរផ្ដល់នូវភាពត្រជាក់ត្រជំ ហើយកូនចៅ ញាតិផៅសន្តានដែលនៅរស់តែងនាំគ្នាអុជធូបបួងសួងប្រាថ្នាផ្សេងៗសុំឱ្យបុព្វការីជនទាំងឡាយជួយកាន់ខ្នងរងមុខថែរក្សាកូនចៅឲ្យរស់នៅបានសុខសប្បាយ រកទទួលទានមានបាន កើតកាលវាលគុម្ព ត្រជាក់ត្រជំសុខដុមរម្យនាតរៀងទៅ ។ សាន សារិន
ចែករំលែកព័តមាននេះ