ទស្សនៈវិស័យសេដ្ឋកិច្ចពិភពលោកមិនមានសភាពវិជ្ជមានពិតមែនក្តីព្រោះតែការផ្ទុះវីរុសកូវីដ ១៩ តាំងពីចុងឆ្នាំ ២០១៩ នេះ ដែលបង្កឲ្យអាជីវកម្មជាច្រើនផ្អាកដំណើរការ ខណៈដែលមនុស្សត្រូវបានប្រាប់ឲ្យចៀសវាងកន្លែងដែលមានមនុស្សច្រើន ប៉ុន្តែមហាសេដ្ឋី ម៉ាក ឃ្យូបេន…
ទស្សនៈវិស័យសេដ្ឋកិច្ចពិភពលោកមិនមានសភាពវិជ្ជមានពិតមែនក្តីព្រោះតែការផ្ទុះវីរុសកូវីដ ១៩ តាំងពីចុងឆ្នាំ ២០១៩ នេះ ដែលបង្កឲ្យអាជីវកម្មជាច្រើនផ្អាកដំណើរការ ខណៈដែលមនុស្សត្រូវបានប្រាប់ឲ្យចៀសវាងកន្លែងដែលមានមនុស្សច្រើន ប៉ុន្តែមហាសេដ្ឋី ម៉ាក ឃ្យូបេន (Mark Cuban) ប្រចាំសហរដ្ឋអាមេរិកជឿជាក់ថាប្រព័ន្ធសេដ្ឋកិច្ច និងភាពជាសហគ្រិនរបស់ប្រជាពលរដ្ឋអាមេរិកនឹងជំរុញដល់ការលូតលាស់សេដ្ឋកិច្ចវិញជាក់ជាមិនខាន ។
លើសពីនេះទៅទៀត លោកបាននិយាយក្នុងបទសម្ភាសន៍មួយកាលពីថ្ងៃអង្គារ៍មកនេះជាមួយ Yahoo Finance ថា វានឹងបង្កើតឲ្យមានក្រុមហ៊ុនជាច្រើនដែលមានសមត្ថភាពក្នុងការផ្លាស់ប្តូរពិភពលោកយើងបាន ។ លោកបានបកស្រាយថា «ចំណុចមួយទាក់ទងនឹងសហរដ្ឋអាមេរិកដែលធ្វើឲ្យប្រទេសនេះខុសពីប្រទេសដទៃលើពិភពលោកនេះ គឺយើងជាប្រទេសដែលពោរពេញទៅដោយសហគ្រិន ។ ពួកយើងតែងតែចង់បើកអាជីវកម្ម ។ ពេលដែលពួកយើងនិយាយពីក្តីសុបិនជនជាតិអាមេរិក ពួកយើងតែងតែនិយាយពីរឿងដែលអ្នកក្រីក្រក្លាយជាអ្នកមាន ហើយវាចាប់ផ្តើមពីសហគ្រិនម្នាក់មានគំនិតមួយ និងធ្វើឲ្យគំនិតនោះក្លាយជាការពិត» ។
ជាក់ស្តែង មានឧទាហរណ៍ជាច្រើនដែលបង្ហាញពីក្រុមហ៊ុនដែលបានជោគជ័យឡើងក្នុងពេល ពេលសេដ្ឋកិច្ចពិភពលោកកំពុងតែជួបវិបត្តិ ដូចជា Amazon និង Google ជាដើមដែលបានឆ្លងផុតវិបត្តិហិរញ្ញវត្ថុនៅសហរដ្ឋអាមេរិកបន្ទាប់ពីតម្លៃភាគហ៊ុនក្រុមហ៊ុនបច្ចេកវិទ្យាធ្លាក់ចុះយ៉ាងខ្លាំងនៅឆ្នាំ ២០០០ ។ លើសពីនេះទៅទៀត ក្រុមហ៊ុន Alibaba របស់ប្រទេសចិនវិញបានក្លាយជាក្រុមហ៊ុនដែលជោគជ័យដូចថ្ងៃនេះបន្ទាប់ពីក្រោកចេញពីការផ្ទុះវីរុសសារ នៅឆ្នាំ ២០០២ ដល់ ២០០៣ ផងដែរ ។
លោក ឃ្យូបេន បានបន្តទៀតថា «ពួកយើងអាចចាប់ផ្តើមរៀនសូត្រពីកំហុសឆ្គងរបស់យើង និងនិយាយថាពួកយើងត្រូវឲ្យបុគ្គលិកចូលរួមបន្ថែមដើម្បីកសាងក្រុមហ៊ុនជាថ្មី ឬពេលដែលយើងលូតលាស់ទៅមុខ» ។លោកបានបន្ថែមទៀតថា បុគ្គលិកទាំងអស់គួរតែមានភាគហ៊ុនក្នុងក្រុមហ៊ុន ។ នេះជាគំនិតមួយដែលលោកបានគាំទ្រអស់ជាច្រើនឆ្នាំមកហើយព្រោះលោកគិតថាវាជាវិធីដែលជួយដោះស្រាយវិសមភាពប្រាក់ចំណូល ៕
ចែករំលែកព័តមាននេះ