រាជធានីភ្នំពេញ ៖ តម្លៃប្រេងនៅក្នុងប្រទេសកម្ពុជា បានធ្លាក់ចុះយ៉ាងខ្លាំងមិនធ្លាប់មានក្នុង រយៈពេលជាង ១០ឆ្នាំកន្លងទៅនេះ ស្របពេលដែលតម្លៃប្រេងឆៅនៅលើទីផ្សារអន្តរជាតិក៏ បានធ្លាក់ដាំក្បាលចុះយ៉ាងគំហុកផងដែរ ក្នុងខណៈពេលដែលវីរុសកូវីដ-១៩ កំពុងតែរាល ដាលស្ទើរតែពាសពេញពិភពលោកគួរឱ្យភ័យខ្លាច ។
តម្លៃប្រេងឆៅនៅលើទីផ្សារអន្តរជាតិបានធ្លាក់ចុះដល់កម្រិតទាបបំផុត ហើយចាត់ទុកថាជា ប្រវត្តិសាស្ត្រនៅក្នុងរយៈពេល ១៨ឆ្នាំចុងក្រោយនេះ ។ ការធ្លាក់ចុះតម្លៃប្រេងឆៅនេះដែរក៏ បានធ្វើឱ្យទីផ្សារប្រេងឥន្ធនៈប្រើប្រាស់ប្រចាំថ្ងៃនៅក្នុងប្រទេសកម្ពុជា មានការធ្លាក់ចុះផង ដែរ ក៏ប៉ុន្តែទន្ទឹមនឹងការធ្លាក់នោះក៏មិនសូវមានអ្នកប្រើប្រាស់យានយន្តច្រើនប៉ុន្មានដែរ ក្នុងពេលដែលកម្ពុជា និងពិភពលោកកំពុងជួបបញ្ហាជំងឺកូវីដ-១៩ នេះ ។
យោងតាមសារព័ត៌មានអន្តរជាតិ Business Today បានឱ្យដឹងថាតម្លៃប្រេងឆៅនៅលើទី ផ្សារអន្តរជាតិ បានធ្លាក់ចុះមកនៅត្រឹមក្រោម ២០ដុល្លារអាមេរិកប៉ុណ្ណោះក្នុងមួយបារ៉ែល ។ ការធ្លាក់ចុះតម្លៃប្រេងឆៅអន្តរជាតិនេះ គឺដោយសារតែបញ្ហានៃការរាតត្បាតជំងឺកូវីដ ១៩ នៅលើពិភពលោក ធ្វើឱ្យមានការធ្លាក់ចុះនៃការធ្វើដំណើរ ដូចជាយន្តហោះ កប៉ាល់ និង យានយន្តគ្រប់ប្រភេទនៅតាមបណ្ដាប្រទេសនីមួយៗ ។ តាមការប៉ាន់ប្រមាណថា ជំងឺរាត ត្បាតនេះបានធ្វើឱ្យតម្រូវការប្រេងនៅលើទីផ្សារធ្លាក់ចុះរហូតដល់ ២០ភាគរយនៅលើ ពិភពលោក ជាក់ស្ដែងតាមបណ្ដាប្រទេសនីមួយៗ យានយន្តត្រូវបានចតទុកចោល និង លែងមានចរាចរមមាញឹកដូចកាលមុនពេលជំងឺនេះផ្ទុះឡើង ។
យោងតាមក្រុមពាណិជ្ជករទំនិញសាកលបាននិយាយថា នៅថ្ងៃអនាគត តម្រូវការនៃការ ប្រើប្រាស់ប្រេងនៅលើពិភពលោកនឹងធ្លាក់ចុះបន្តទៀត ក្នុងនោះពួកគេបានព្យាករណ៍ថា អាចនឹងធ្លាក់ចុះដល់ជាង ៣លានបារ៉ែលក្នុងមួយថ្ងៃ នៅក្នុងខែមេសានេះ ដែលការធ្លាក់ចុះ នេះប្រមាណ ១ ភាគ ៣ នៃការប្រើប្រាស់ប្រេងប្រចាំថ្ងៃ ។ ម្យ៉ាងទៀតសង្គ្រាមតម្លៃរវាង អារ៉ាប៊ីសាអ៊ូឌីត និងរុស្ស៊ី បានផ្ទុះឡើងនៅដើមខែមេសា បន្ទាប់ពីបរាជ័យក្នុងកិច្ចព្រម ព្រៀងរយៈ ៣ឆ្នាំ ដើម្បីកម្រិតការផ្គត់ផ្គង់រវាងអង្គការប្រទេសនាំចេញប្រេង និងអ្នកផលិត ផ្សេងទៀត ។
បើតាមក្រុមអ្នកវិភាគសាកល ដែលសារព័ត៌មានបរទេសនេះបានស្រង់សម្ដី បាននិយាយ ថា តម្លៃប្រេងពេលនេះ គឺមានតម្លៃទាបខ្លាំងណាស់ ហើយវានឹងឈានដល់ការបិទការ ផលិតរបស់ក្រុមហ៊ុនមួយចំនួន ដែលមិនមានលទ្ធភាពក្នុងការផ្ទុកប្រេងបន្ត ព្រោះតែមិន មានតម្រូវការនៅលើសកលោក ។ងាកមកមើលតម្លៃប្រេងឥន្ធនៈលក់នៅលើទីផ្សារប្រទេសកម្ពុជាវិញ ឃើញថា មានតម្លៃ ត្រឹមតែ ២៣៥០រៀលប៉ុណ្ណោះក្នុងមួយលីត្រសម្រាប់ប្រេងសាំងធម្មតា ។ បើតាមការកត់ សម្គាល់តម្លៃប្រេងឥន្ធនៈនៅពេលនេះជាតម្លៃទាបបំផុតមួយផងដែរ ក្នុងរយៈពេលជាង ១០ ឆ្នាំកន្លងទៅនេះ ។ ក៏ប៉ុន្តែបើក្រលេកទៅមើលស្ថានភាពចរាចរ នៅក្នុងប្រទេសកម្ពុជា ជា ពិសេសនៅរាជធានីភ្នំពេញ ឃើញថា មានសភាពស្ងប់ស្ងាត់ ដោយសារតែការរាលដាល នៃជំងឺកូវីដ ១៩ ហើយរដ្ឋាភិបាលបានអំពាវនាវឱ្យពលរដ្ឋកុំចាកចេញពីផ្ទះបើមិនមាន ករណីចាំបាច់ ។ យ៉ាណាមិញពលរដ្ឋកម្ពុជាក៏ហាក់មានភាពភ័យខ្លាចពីការឆ្លងជំងឺនេះផង ដែរ ពួកគេបានទិញស្បៀងចាំបាច់មួយចំនួនបម្រុងទុករួចហើយ ដូច្នេះពួកគេប្រហែលជា មិនត្រូវការប្រើប្រាស់យានយន្តរបស់ពួកគេនោះទេ ។
អ្នកនាំពាក្យក្រសួងពាណិជ្ជកម្មកម្ពុជា បានលើកឡើងថា កម្ពុជាជាប្រទេសនាំចូលប្រេង ឥន្ធនៈ ពីក្រៅដូច្នេះតម្លៃកែប្រែទៅតាមទីផ្សារអន្តរជាតិ ហើយដើម្បីជួយសម្រួលដល់ជីវ ភាពពលរដ្ឋក្នុងពេលប្រេងឡើងថ្លៃពីមុននោះ រដ្ឋាភិបាលបានសម្រេចកំណត់តម្លៃប្រេង ឥន្ធនៈលក់លើទីផ្សាររយៈពេល ១០ថ្ងៃម្ដង និងមកដល់ពេលនេះ គឺ ១៥ថ្ងៃត្រូវកំណត់ម្ដង ។
បើតាមដ្យាក្រាមតម្លៃប្រេងដែលបង្ហាញដោយក្រសួងពាណិជ្ជកម្មកម្ពុជា តាំងពីពាក់កណ្ដា
លខែមីនា រហូតដល់ដំណាច់ខែមីនា ២០២០ នេះ ឃើញថាតម្លៃបានធ្លាក់ចុះបន្តបន្ទាប់ ដែលធ្វើឱ្យក្រសួងពាណិជ្ជកម្មត្រូវកំណត់តម្លៃលក់លើទីផ្សារកម្ពុជា មានតម្លៃទាបជាប្រវត្តិ សាស្ត្រក្នុងរយៈពេលជាង ១ ទសវត្សរ៍នេះ ។ តែទោះយ៉ាងណានៅថ្ងៃទី ១៦ខែមេសា ឆ្នាំ ២០២០ខាងមុខនេះតម្លៃប្រេងលើទីផ្សារកម្ពុជា នឹងត្រូវប្រែប្រួលជាថ្មីទៅតាមការកំណត់ របស់ក្រសួងពាណិជ្ជកម្ម ហើយក៏មិនទាន់ដឹងថា តើតម្លៃប្រេងឥន្ធនៈលក់លើទីផ្សារកម្ពុជា នឹងធ្លាក់ចុះបន្តទៀត ឬកើនឡើងវិញនោះទេ ៕
ចែករំលែកព័តមាននេះ