តាមប្រពៃណីរបស់ជនជាតិឥណ្ឌា នៅពេលដែលរៀបការរួច កូនស្រីត្រូវទៅរស់នៅខាងផ្ទះស្វាមី ដូចនាងវិសាខាក្រោយរៀបការស្វាមីគឺបុណ្ណវឌ្ឍនកុមាររួចរាល់ហើយ នាងក៏ត្រូវទៅរស់នៅផ្ទះស្វាមី ប៉ុន្តែមុននឹងទៅ ធនញ្ជយសេដ្ឋីជាឪពុកបានអប់រំកូនស្រីឱ្យដើរតាមលម្អាន១០យ៉ាងដល់កូនស្រីដើម្បីសុខចម្រើននៃជីវិតគ្រួសារ ។
១-ឱវាទថាកុំនាំភ្លើងក្នុងចេញក្រៅផ្ទះ គឺថាកុំយករឿងដែលមិនល្អរបស់ឪពុកក្មេកម្តាយក្មេក ឬស្វាមីចេញទៅនិយាយឲ្យអ្នកក្រៅស្តាប់ ។
២- កុំយកភ្លើងខាងក្រៅចូលផ្ទះ គឺថាបើមានអ្នកស្តីនិន្ទាឪពុកក្មេក ម្តាយក្មេក ឬស្វាមីយ៉ាងណាៗ កុំឲ្យនាំរឿងទាំងនោះមកនិយាយឲ្យអ្នកផ្ទះស្តាប់ ។
៣- ត្រូវឲ្យវត្ថុដល់អ្នកដែលគួរឲ្យប៉ុណ្ណោះ គឺថាគួរឲ្យរបស់ដល់អ្នកខ្ចីណាដែលចេះយកមកសងវិញ ។
៤-កុំឲ្យវត្ថុដល់អ្នកដែលមិនគួរឲ្យ គឺថាមិនគួរឲ្យរបស់កម្ចីដល់អ្នកដែលមិនសងវិញ ។
៥- ឲ្យដល់អ្នកដែលគួរ និងមិនឲ្យដល់អ្នកដែលមិនគួរឲ្យ គឺថាពេលមានញាតិមិត្តក្រកម្សត់មក សូមឲ្យជួយ សូមពំនាក់អាស្រ័យ ពេលឲ្យទៅហើយ គេសងក្តីមិនសងក្តីក៏គួរឲ្យ ។
៦- ឲ្យចេះអង្គុយជាសុខ គឺថាឲ្យចេះអង្គុយក្នុងកម្រិតរវាងឪក្មេក ម៉ែក្មេក និង ស្វាមី ។
៧- ឲ្យចេះដេកជាសុខ គឺថា គួរតែដេកក្រោយឪពុកក្មេក ម្តាយក្មេក និង ស្វាមី ។
៨- ឲ្យចេះបរិភោគជាសុខ គឺថាគួរចេះចាត់អាហារឲ្យឪពុកក្មេក ម្តាយក្មេកបរិភោគហើយ ទើបខ្លួនហូបជាក្រោយ ។
៩- ត្រូវចេះបម្រើភ្លើង គឺថាត្រូវដឹងខ្លួនជានិច្ចថា ឪពុកក្មេក ម្តាយក្មេក និងស្វាមីប្រៀបដូចជាភ្នក់ភ្លើង ឬនាគរាជ ដែលខ្លួនត្រូវបម្រើ ។
១០- ត្រូវចេះគោរពទេវតាខាងក្នុង គឺថាត្រូវដឹងខ្លួនជានិច្ចថា ឪពុកក្មេក ម្តាយក្មេក និងស្វាមីប្រៀបដូចទេវតា ដែលខ្លួនត្រូវតែគោរព ។
កូនស្រីទាំងឡាយណាដែលចេះគោរពប្រណិប័តន៍ដើរតាមលម្អានទាំង១០ប្រការនេះ កូនស្រីទាំងឡាយនោះនឹងបានរស់នៅដោយសុខសួស្តី សិរីមង្គល ចម្រុងចម្រើនដោយលាភយសជាក់ជាមិនខាន ។ សាន សារិន
ចែករំលែកព័តមាននេះ