សង្វៀនប្រដាល់ចំនួន3នឹងបើកការប្រកួតឡើងវិញ
- ភ្នំពេញ
រាជធានីភ្នំពេញ ៖ សង្វៀនប្រដាល់ចំនួន ៣ មាន ស៊ីអិនស៊ី បាយ័ន និងថោន នឹងចាប់ដំណើរការប្រកួតឡើងវិញនៅចុងសប្តាហ៍នេះ ប៉ុន្តែវាជាការប្រកួតបិទទ្វារ…
រាជធានីភ្នំពេញ ៖ សង្វៀនប្រដាល់ចំនួន ៣ មាន ស៊ីអិនស៊ី បាយ័ន និងថោន នឹងចាប់ដំណើរការប្រកួតឡើងវិញនៅចុងសប្តាហ៍នេះ ប៉ុន្តែវាជាការប្រកួតបិទទ្វារ គ្មានអ្នកទស្សនា តែមានការផ្សាយផ្ទាល់ ចំណែកសង្វៀនភីអិនអិន និងសង្វៀនប៉ុស្តិ៍លេខ៥ នៅមិនទាន់បើកការប្រកួតវិញទេ ក្នុងពេលសង្វៀនអាស៊ីអាគ្នេយ៍ កំពុងស្ថិតក្នុងការពិភាក្សាជាមួយម្ចាស់ឧបត្ថម្ភ ថាតើគួរបើកនៅពេលនេះវិញ ឬយ៉ាងណា។
ទោះបីយ៉ាងណា ទាំងសង្វៀនស៊ីអិនសុី បាយ័ន និងថោន មានការផ្គូផ្គងតែកីឡាករខ្មែរ និងខ្មែរប៉ុណ្ណោះ គឺគ្មានការប្រកួតគូអន្តរជាតិនោះទេ ព្រោះបច្ចុប្បន្ននេះ កម្ពុជាបានសម្រេចផ្អាកការផ្តល់ទិដ្ឋាការរយៈពេល ១ ខែ សម្រាប់ភ្ញៀវបរទេស ដើម្បីទប់ស្កាត់ការរីករាលដាលជំងឺកូវីដ-១៩ ប៉ុន្តែបើជនបរទេសណា មានបំណងចូលមកកម្ពុជា ពួកគេត្រូវមានលិខិតបញ្ជាក់សុខភាព និងមានបណ្ណធានារ៉ាប់រង ដែលមានទឹកប្រាក់មិនក្រោម៥ម៉ឺនដុល្លារឡើយ ហើយលក្ខខណ្ឌនេះ គឺខាងអ្នកនាំកីឡាករបរទេសមកប្រកួតនៅកម្ពុជា មិនអាចធ្វើបាននោះទេ ។
ទោះបីការប្រកួតនេះ នឹងត្រូវធ្វើឡើងដោយគ្មានវត្តមានកីឡាករបរទេស ប៉ុន្តែលោក នាង ស៊ីវុត្ថា
អ្នកគ្រប់គ្រងកីឡាប្រដាល់នៅសង្វៀនបាយ័ន បានប្រាប់កាលពីពេលថ្មីៗថា យើងមានការប្រកួត
ចំនួន៦កម្មវិធី ក្នុង១សប្តាហ៍ដដែល ប៉ុន្តែនៅសប្តាហ៍នេះ យើងមានការប្រកួតតែខ្មែរ និងខ្មែរទេ។
នៅក្នុងរយៈពេលចុងក្រោយនេះ សង្វៀនបាយ័ន ដែលមានទីតាំងនៅស្ទឹងមានជ័យនោះ មានកម្មវិធីប្រកួតច្រើនជាងគេក្នុង១សប្តាហ៍ៗ ដោយមានការប្រកួតពីថ្ងៃសុក្រ ដល់ថ្ងៃអាទិត្យ ក្នុងនោះនៅថ្ងៃសុក្រ មាន១កម្មវិធី(ប្រដាល់គុនខ្មែរគូបូតា) ដោយធ្វើពីម៉ោង៧យប់ដល់ម៉ោង
៩។ ចំណែកនៅថ្ងៃសៅរ៍ មានកម្មវិធីប្រកួតគុនខ្មែរមិត្តភាព និងគូម៉ារ៉ាតុងដណ្តើមប្រាក់លាន ពីម៉ោង៣រសៀលដល់ម៉ោង៥ ហើយពីម៉ោង៦ល្ងាច ដល់ម៉ោង៨យប់ ថ្ងៃសៅរ៍ដដែលនេះ ជាការប្រកួតប្រដាល់របស់ភេសជ្ជៈ Wurks។
រីឯនៅថ្ងៃអាទិត្យ មានចំនួន៣កម្មវិធី គឺប្រដាល់គុនខ្មែរស្រាបៀរកម្ពុជាពីម៉ោង៨ព្រឹកដល់ម៉ោង
១០ កម្មវិធីប្រកួតភេសជ្ជៈ Boostrong ពីម៉ោង ១២ដល់ម៉ោង២និង៣០នាទីរសៀល និងការប្រកួតរបស់កម្មវិធីខារ៉ាបាវ ពីម៉ោង៦ល្ងាចដល់ម៉ោង៨យប់។
ដោយឡែក លោក ម៉ា ស៊ីថេត អ្នកគ្រប់គ្រងកម្មវិធីកីឡាប្រដាល់ប្រចាំនៅសង្វៀនទូរទស្សន៍ស៊ីអិនស៊ីបានប្រាប់អ្នកសារព័ត៌មានថា នៅសប្តាហ៍នេះ យើងមានការប្រកួត៤កម្មវិធី រវាងកីឡាករខ្មែរ និងខ្មែរ ក្នុងនោះមានកម្មវិធីកម្ពុជាសង្វៀនគុនខ្មែរ ការប្រកួតខារ៉ាបាវដណ្តើមប្រាក់លាន កម្មវិធីអ្នកតស៊ូគុនខ្មែរគោជល់ និងកម្មវិធីប្រដាល់កំពូលអ្នកប្រដាល់គុនខ្មែរភេសជ្ជៈរ៉េតអាន ។
បើតាមការលម្អិតពីលោក ម៉ា ស៊ីថេត បានឲ្យដឹងថា សម្រាប់កម្មវិធី«កម្ពុជាសង្វៀនគុនខ្មែរ» ដែលធ្វើនៅថ្ងៃសៅរ៍ ពីម៉ោង៨ ដល់ម៉ោង ១០ព្រឹក មានការប្រកួត៤គូ ឯការប្រកួតគុនខ្មែរខារ៉ាបាវដណ្តើមប្រាក់លាន ដែលធ្វើនៅថ្ងៃសៅរ៍ដែរ ពីម៉ោង២រសៀល ដល់ម៉ោង៤ មាន៥គូ ហើយការប្រកួតអ្នកតស៊ូគុនខ្មែរគោជល់ ដែលធ្វើនៅថ្ងៃសៅរ៍ ពីល្ងាចម៉ោង៥និង៥០នាទី ដល់ម៉ោង៨យប់ មាន៤គូ ចំណែកការប្រកួតកំពូលអ្នកប្រដាល់គុនខ្មែរភេសជ្ជៈរ៉េតអាន ដែលធ្វើនៅថ្ងៃអាទិត្យ ពីម៉ោង៨ព្រឹកដល់ម៉ោង១០ មាន៥គូ។
ទន្ទឹមជាមួយគ្នានេះ កម្មវិធីប្រកួត Mas Fight Cambodia របស់សង្វៀនថោន ក៏នឹងរៀបចំការប្រកួតឡើងវិញនៅសប្តាហ៍នេះដែរ។ លោក គឹម ស្រ៊ុនកុសល អ្នកគ្រប់គ្រងកម្មវិធី Mas Fight Cambodia បានប្រាប់ថា នៅថ្ងៃអាទិត្យនេះ យើងមានការប្រកួតចំនួន៦គូ រវាងកីឡាករខ្មែរ និងខ្មែរ ដោយធ្វើចាប់ពីម៉ោង ៣រសៀលដល់ម៉ោង៥ល្ងាច។
ទោះបីយ៉ាងណា គិតត្រឹមរសៀលម៉ោង១ ថ្ងៃចន្ទកន្លងមកនេះ តំណាងអ្នកគ្រប់គ្រងសង្វៀនទាំង៣ មានសុីអិនស៊ី បាយ័ន និងថោន ដែលនឹងបើកការប្រកួតប្រដាល់វិញ នៅចុងសប្តាហ៍នេះ នៅមិនទាន់បានផ្ញើលិខិតផ្លូវការទៅកាន់សហព័ន្ធកីឡាប្រដាល់គុនខ្មែរនៅឡើយទេ ហើយក្រសួងអប់រំ យុវជន និងកីឡា ក៏មិនទាន់បានចេញលិខិតអនុញ្ញាតឲ្យបើកការប្រកួតវិញនោះដែរ បន្ទាប់ពីសហព័ន្ធបានសម្រេចឲ្យគ្រប់សង្វៀនប្រដាល់ទាំងអស់ ត្រូវផ្អាកការប្រកួតកាលពីថ្ងៃទី ២៣ ខែមីនា៕ (កែសម្រួលដោយ ៖ បុប្ផា)
ចែករំលែកព័តមាននេះ