បណ្ដាប្រទេសអឺរ៉ុប ៖ ផ្នែកការពារស៊ីវិលទទួលបន្ទុក គ្រប់គ្រងការឆ្លើយតបចំពោះការឆ្លងរាលដាលនៃវីរុសCOVID-19 របស់អ៊ីតាលី រាយការណ៍នាថ្ងៃទី១មេសាថា នៅអ៊ីតាលីមកដល់ថ្ងៃទី១មេសា ចំនួនអ្នកឆ្លងវីរុសសរុប បានឡើងដល់១១០.៥៧៤នាក់ ចំណែកចំនួនសរុបនៃអ្នកបាត់បង់ជីវិតបានកើនដល់១៣.១៥៥នាក់ក្នុងប្រទេស។
ប្រធានផ្នែកការពារស៊ីវិលលោកANGELO BORRELLI ក្នុងសន្និសីទសារព័ត៌មានមួយតាមទូរទស្សន៍ អះអាងនារសៀលថ្ងៃទី១មេសាថា ជារួមចំនួនមនុស្សដែលចូលមន្ទីរពេទ្យនិងចំនួនអ្នកស្លាប់មានការចុះថយ។ រយៈពេល២៤ម៉ោងចុងក្រោយនេះ មានអ្នកបាត់បង់ជីវិតថ្មីប្រមាណជា៧២៧នាក់ ហើយចំនួនអ្នកព្យាបាលជាបានឡើងដល់សរុប១៦.៨៤៧នាក់ តាំងពីមានការឆ្លងក្នុងប្រទេសពីថ្ងៃទី២១កុម្ភៈមក។
បារាំងអ្នកបាត់បង់ជីវិតឡើងដល់៤.០៣២នាក់
អគ្គនាយកសុខាភិបាលនៃក្រសួងសុខាភិបាលបារាំង លោកJEROME SALOMON ប្រកាសនាថ្ងៃទី១មេសាថា សរុបមានអ្នកបាត់បង់ជីវិតឡើងដល់៤.០៣២នាក់ហើយនៅបារាំងដោយសារវីរុស កត់សម្គាល់ឃើញក្នុងបណ្ដាមន្ទីរពេទ្យ តាំងពីចាប់ផ្ដើមមានការឆ្លងមក។
រយៈពេល២៤ម៉ោងចុងក្រោយនេះ អ្នកស្លាប់ថ្មី៥០៩នាក់ត្រូវបានកត់សម្គាល់ឃើញ ក្នុងបណ្ដាមន្ទីរពេទ្យបារាំង។ រហូតមកទល់ពេលនេះនៅបារាំងមានអ្នកឆ្លងវីរុសសរុបឡើងដល់៥៦.៩៨៩នាក់។
អេស្ប៉ាញអ្នកបាត់បង់ជីវិតឡើងលើស៩.០០០នាក់
ក្នុងប្រទេសអេស្ប៉ាញថ្ងៃទី១មេសាកត់សម្គាល់ឃើញចំនួនអ្នកបាត់បង់ជីវិតដោយសារវីរុសដល់ទៅ៨៦៤នាក់ រយៈពេល២៤ម៉ោងចុងក្រោយនេះ ដែលនាំឲ្យចំនួនអ្នកបាត់បង់ជីវិតសរុបក្នុងប្រទេសនេះ ឡើងដល់លើសពី៩.០០០នាក់ តែអាជ្ញាធរយល់ថា ការឆ្លងរាលដាលនៃវីរុសបានចុះយឺតវិញ ក្នុងប្រទេសទី២ដែលរងគ្រោះខ្លាំងជាងគេបំផុតដោយសារវីរុសនោះ បន្ទាប់ពីអ៊ីតាលី។
អាជ្ញាធរអេស្ប៉ាញគូសបញ្ជាក់ថា ប្រទេសនេះគិតមកដល់ថ្ងៃទី១មេសា មានអ្នកឆ្លងវីរុស សរុប១០២.១៣៦នាក់ តែសង្វាក់នៃការស្លាប់ មានការកើនឡើង។ ទីក្រុងម៉ាឌ្រីដនៅតែជាតំបន់ ដែលរងការប៉ះពាល់ខ្លាំងជាងគេជាមួយអ្នកឆ្លងក្នុងអត្រាដល់៤២,៧% ហើយអ្នកបាត់បង់ជីវិត មានអត្រា២៩,២%។ វីរុសនោះក៏រាតត្បាតខ្លាំងនៅតំបន់កាតាឡូញផងដែរ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ