ខេត្តព្រះវិហារ ៖ បើតាមសេចក្តីរាយការណ៍បឋមបានឱ្យថា ភ្លៀងមួយមេធំលាយឡំនឹងខ្យល់កន្ត្រាក់ កាលពីម៉ោង៥និង៣០នាទីរសៀលថ្ងៃទី០១ ខែមេសា ឆ្នាំ២០២០នេះ នៅក្នុងក្រុងព្រះវិហារ បានធ្វើឲ្យផ្ទះសម្បែងប្រជាពលរដ្ឋចំនួន៤គ្រួសារ រងការខូចខាតរបើកដំបូល…
ខេត្តព្រះវិហារ ៖ បើតាមសេចក្តីរាយការណ៍បឋមបានឱ្យថា ភ្លៀងមួយមេធំលាយឡំនឹងខ្យល់កន្ត្រាក់ កាលពីម៉ោង៥និង៣០នាទីរសៀលថ្ងៃទី០១ ខែមេសា ឆ្នាំ២០២០នេះ នៅក្នុងក្រុងព្រះវិហារ បានធ្វើឲ្យផ្ទះសម្បែងប្រជាពលរដ្ឋចំនួន៤គ្រួសារ រងការខូចខាតរបើកដំបូល ដួលបង្គោលភ្លើងធំៗ និងរបើកក្បឿងអគារសាលាខេត្តព្រះវិហារមួយចំនួន ។
បើតាមលោកឧត្តមសេនីយ៍ត្រី ឆយ បូរិន នាយសេនាធិការដ្ឋាន នៃស្នងការដ្ឋាននគរបាលខេត្តព្រះវិហារ បានប្រាប់នៅព្រឹកថ្ងៃទី២ ខែមេសានេះ ឲ្យដឹងថា ភ្លៀងធ្លាក់មួយមេ លាយឡំខ្យល់កន្ត្រាក់កាលពីម្សិលមិញនេះ បានធ្វើឲ្យប៉ះពាល់ដល់ផ្ទះសម្បែងប្រជាពលរដ្ឋធ្វើអំពីឈើប្រក់សង្ក័សី នៅភូមិដំណាក់ សង្កាត់កំពង់ប្រណាក ក្រុងព្រះវិហារ រងការខូចខាតរបើកដំបូល របើកក្បឿនអគារសាលាខេត្ត និងរបើកក្បឿងមន្ទីរផែនការមួយចំនួន ដួលបង្គោលភ្លើងធំចំនួន២ដើម ប៉ុន្តែមិនមានរងគ្រោះថ្នាក់ដល់មនុស្ស ឬសត្វឡើយ ។
លោកបន្តថា បាតុភូតធម្មជាតិខ្យល់កន្ត្រាក់ម្សិលមិញនេះ ទូទាំង៨ក្រុងស្រុកនៃខេត្តព្រះវិហារ គឺប៉ះពាល់តែក្រុងព្រះវិហារ តែប៉ុណ្ណោះ ។
ជាមួយគ្នានេះដែរ លោក យ៉ុង គឹមហៀន នាយកប្រតិបត្តិសាខាកាកបាទក្រហមកម្ពុជា ខេត្តព្រះវិហារ បានឲ្យដឹងថា បច្ចុប្បន្ននេះ ក្រុមការងារកំពុងចុះពិនិត្យមើលផលប៉ះពាល់ និងការខូចខាតពីបាតុភូមិធម្មជាតិនេះ ដើម្បីរៀបចំជាជំនួយមនុស្សធម៌យកទៅជូនគ្រួសារ ដែលរងគ្រោះទាំងអស់នៅពេលឆាប់ៗខាងមុខនេះ ។ (កែសម្រួលដោយ ៖ បុប្ផា)
ចែករំលែកព័តមាននេះ