រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នៅវេលាម៉ោងប្រមាណជិត២រសៀលថ្ងៃទី១ មេសា ទូកប៉ុកចាយមួយគ្រឿងដែលគេអះអាងថា ដឹកចំណីសត្វបានជាប់កឿងនៅកណ្តាលទន្លេអស់រយៈពេលប្រមាណជា២ម៉ោង ហើយទើបតែរើខ្លួនរួចនិងបន្តដំណើរទៅទៀតនាវេលាម៉ោង៤រសៀលថ្ងៃដដែល ។
ទូកប៉ុកចាយមួយគ្រឿងខាងលើត្រូវបានគេប្រទះឃើញជាប់កឿងនៅកណ្តាលទន្លេ ត្រង់ចំណុចទន្ទឹមនឹងសាលាបឋមសិក្សាជ្រោយចង្វា ក៏ទន្ទឹមនឹងចំណុចខាងជើងវត្តភ្នំ ស្ថិតក្នុងសង្កាត់ស្រះចក ខណ្ឌដូនពេញ។
តាមសេចក្តីរាយការណ៍បានបន្តថា មុនពេលកើតហេតុ គេឃើញទូកប៉ុកចាយមួយគ្រឿងខាងលើមានដឹកចំណីសត្វពេញប្រៀប បានធ្វើដំណើរពីជើងទៅត្បូង លុះមកដល់ចំណុចខាងលើ ដែលគេអះអាងថាជាកន្លែងទឹករាក់ដោយមានដីដុះ ស្រាប់តែទូកប៉ុកចាយនោះក៏បានជាប់កឿងនៅកណ្តាលទន្លេ ដោយព្យាយាមបើកទៅមុខអស់រយៈពេលប្រមាណជា២ម៉ោង ទើបតែអាចរើខ្លួនរួច ហើយបន្តដំណើរទៅទិសខាងជើងវិញ ៕ (កែសម្រួលដោយ ៖ ធីតា)
ចែករំលែកព័តមាននេះ