អ្នកជំនាញផ្នែកហិរញ្ញវត្ថុជាទូទៅតែងតែជំរុញឲ្យមនុស្សគ្រប់រូបទុកថវិកាដែលស្មើនឹងការចាយវាយប្រចាំថ្ងៃរបស់អ្នកប្រមាណពី ៣ ទៅ ៦ខែសម្រាប់គ្រាមានអាសន្ន ដូចជាពេលដែលអ្នកបាត់បង់ការងារ ឬមានបញ្ហាសុខភាពជាដើម ។ ចុះក្នុងករណីដែលប្រទេសកំពុងតែជួបប្រទះនឹងវីរុសកាចសាហាវនេះ តើអ្នកគួរតែទុកលុយជាប់ខ្លួនប៉ុន្មាន?
១. ប្រភេទការងាររបស់អ្នក
អ្នកជំនាញផ្នែកហិរញ្ញវត្ថុបានប្រាប់ដល់ CNBC Make It ថា ចំនួនខាងលើ គឺសម្រាប់តែមនុស្សដែលមានការងារនឹងន និងវ័យក្មេងប៉ុណ្ណោះ ។ ប្រសិនបើប្រាក់ចំណូលរបស់អ្នកមិនមានភាពនឹងន នឹងអាស្រ័យលើកត្តាច្រើននោះអ្នកគួរតែមានយ៉ាងតិចណាស់ស្មើការចាយវាយ ៦ខែដែរ ។ ជាក់ស្តែង មិនមាននរណាម្នាក់អាចដឹងច្បាស់ទេពីឥទ្ធិពលដែលវីរុសខាងលើមានលើវិស័យផ្សេងៗក្នុងរយៈពេលប៉ុន្មានខែខាងមុខ ហើយអ្នកអាចនឹងមានហានិភ័យខ្ពស់ប្រសិនបើអ្នកមានការងារដែលរកប្រាក់ចំណូលមិននឹងន ។
២. អាយុរបស់អ្នក
អ្នកជំនាញខាងលើបានប្រាប់មកទៀតថា មនុស្សដែលមានអាយុកាន់តែច្រើន គួរមានប្រាក់សន្សំទុកពេលមានអាសន្នកាន់តែច្រើនដែរ ។ អ្នកដែលជិតចូលនិវត្តន៍គួរតែមានប្រាក់សន្សំសម្រាប់ការចាយវាយមួយឆ្នាំយ៉ាងតិច ហើយអ្នកដែលចូលនិវត្តន៍ហើយគួរតែមានស្មើ ២ឆ្នាំយ៉ាងតិច ។ប្រាកដណាស់ ក្នុងប្រទេសកម្ពុជាឪពុកម្តាយដែលមានអាយុជរាតែងតែស្ថិតក្រោមការមើលថែរបស់កូនៗ ប៉ុន្តែដើម្បីចៀសវាងបង្កើនសម្ពាធដល់កូនៗក្នុងកំឡុងពេលដែលពោរពេញទៅដោយភាពមិនប្រាកដប្រជានេះ អ្នកក៏ត្រូវតែមានកាតព្វកិច្ចសន្សំលុយដែរ ។
៣. ជីវភាពរស់នៅរបស់អ្នក
ជាក់ស្តែងសំណួរខាងលើមិនមានចម្លើយដែលត្រឹមត្រូវតែមួយទេព្រោះមនុស្សម្នាក់ៗមានជីវភាពរស់នៅខុសៗគ្នាទាំងអស់ ។ អ្វីដែលសំខាន់ គឺតើមានប្រាក់សន្សំប៉ុន្មានដែលអាចផ្តល់អារម្មណ៍ស្ងប់ដល់អ្នក? សំណួរនេះមានសារៈសំខាន់ព្រោះអារម្មណ៍សុវត្ថិភាព គឺជាអ្វីដែលមនុស្សត្រូវការក្នុងកំឡុងពេលនេះដូច្នេះគោលដៅរបស់អ្នក គឺសន្សំទុកលុយក្នុងចំនួនមួយដែលអាចផ្តល់អារម្មណ៍នេះដល់អ្នកបាន ៕
ចែករំលែកព័តមាននេះ