រាជធានីភ្នំពេញ ៖ រថយន្តបែនដឹកថ្ម១គ្រឿងបានបើកចេញពីផ្លូវបេតុងមួយកន្លែងឡើងមហាវិថីឈ្នះឈ្នះ ស្រាប់តែរថយន្តយីឌុប១គ្រឿងទៀតដឹកចំណីសត្វទៅដល់បានបុកចំទទឹងខ្លួនរថយន្តដឹកថ្មយ៉ាងពេញទំហឹងនិងជ្រុលទៅកៀររថយន្តមួយគ្រឿងផ្សេងទៀតម៉ាកឡិចសុីសRX-300 បណ្ដាលឲ្យរថយន្តទាំង៣គ្រឿងនេះរងការខូចខាតយ៉ាងដំណំ ដោយឡែករថយន្តដឹកចំណីសត្វខូចកាប៊ីនទាំងស្រុងតែម្ដង តែមិនបានបណ្ដាលឲ្យអ្នកបើកបររថយន្តទាំង៣គ្រឿងនោះរងរបួសឡើយ។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១១និង៤៥នាទីថ្ងៃត្រង់ថ្ងៃទី១ ខែមេសា ឆ្នាំ២០២០ នៅលើកំណាត់មហាវិថីឈ្នះ ឈ្នះ ត្រង់ចំណុចខ្លោងទ្វារវត្តភ្នៀតសិម្ពលី ស្ថិតនៅក្នុងភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
រថយន្តទាំង៣គ្រឿងខាងលើនោះរួមមាន ១-រថយន្តបែនដឹកថ្មមួយគ្រឿងម៉ាកហុីយ៉ាន់ដាយ ពណ៌ខៀវ ពាក់ស្លាកលេខ ព្រះសីហនុ ៣A-៥៣៥៥, ២-រថយន្តមួយគ្រឿងដឹកចំណីសត្វ ម៉ាកហុីយ៉ាន់ដាយ ពណ៌ក្រហម ឆ្នូតខៀវនិងស ពាក់ស្លាកលេខ កំពង់ធំ ៣A-០៩៧៦ និង៣-រថយន្តមួយគ្រឿងម៉ាកឡិចសុីស RX-300 ពណ៌ទឹកប្រាក់ ពាក់ស្លាកលេខ ភ្នំពេញ ២AU-១៤០១ ។ ចំណែកអ្នកបើកបររថយន្តទាំង៣គ្រឿងមិនត្រូវបានស្គាល់អត្តសញ្ញាណឡើយ។
តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តបែនយីឌុបដឹកថ្មបានបើកបរធ្វើដំណើរក្នុងទិសដៅពីលិចទៅកើតចេញពីផ្លូវបេងភូមិស្រែរាជ្ជះ ឡើងឆ្លងមហាវិថីឈ្នះឈ្នះ អត់មើលឆ្វេងស្ដាំ ជាហេតុបង្កឲ្យរថយន្តយីឌុបដឹកចំណីសត្វដែលកំពុងបើកល្បឿនលឿនក្នុងទិសដៅពីជើងទៅត្បូង ជាន់ហ្វ្រាំងមិនជាប់ ក៏ជ្រុលទៅបុកចំទទឹងខ្លួនរថយន្តដឹកថ្មពេញទំហឹង បន្ទាប់មកបានកៀររថយន្តឡិចសុីសRX300 ដែលបើកស្របគ្នា១គ្រឿងទៀត បណ្ដាលឲ្យរថយន្តទាំង៣គ្រឿងរងការខូចខាត ប៉ុន្តែរថយន្តដឹកចំណីសត្វរងការខូចខាតធ្ងន់ធ្ងរជាងគេដោយក្រពិតរួញកាប៊ីនទាំងស្រុងតែម្ដង។
ក្រោយពេលកើតហេតុ នគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះធ្វើការវាស់វែង និងនាំយករថយន្តទាំង៣គ្រឿងទៅរក្សាទុករង់ចាំដោះស្រាយនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ