ក្នុងបរិបទសម័យទំនើបនេះ បុគ្គលិកតែងតែមានសេចក្តីរំពឹងកាន់តែច្រើនឡើងសម្រាប់អ្នកដឹកនាំក្រុមហ៊ុន ឬអាជីវកម្មលើសពីការបញ្ជា ឬប្រាប់ពីការងារដែលត្រូវបំពេញ ។ ពួកគេត្រូវការការជំរុញទឹកចិត្ត និងគោលដៅពិតប្រាកដ ហើយពួកគេនឹងផ្តល់មកវិញនូវជំនឿទុកចិត្ត និងការខិតខំប្រឹងប្រែង ។
ជាក់ស្តែង គឺមិនមានរូបមន្តណាមួយជាក់លក់ពីគុណសម្បត្តិធំៗដែលជួយឲ្យអ្នកដឹកនាំម្នាក់ជោគជ័យទាំងស្រុងទេ ។ ប៉ុន្តែយោងទៅតាមសៀវភៅ Cracking the Leadership Code បានឲ្យដឹងថា អ្នកដឹកនាំអាចសម្រេចគោលដៅខាងលើបានដោយអនុវត្តតាមយុទ្ធសាស្ត្រខាងក្រោមនេះ៖
១. ព្យាយាមយល់ពីបុគ្គលិកដោយស្តាប់ឲ្យបានច្រើន
អារម្មណ៍ដែលមនុស្សទទួលបាននៅពេលដែលពួកគេមើលឃើញភាគីម្ខាងទៀតយកចិត្តទុកដាក់ស្តាប់ពួកគេ គឺជាកត្តាសំខាន់ដែលបង្កើតឲ្យមានអារម្មណ៍ស្និទ្ធស្នាលរវាងមនុស្ស ។ អារម្មណ៍ស្និទ្ធស្នាលនេះអាចយកទៅបណ្តុះឲ្យចេញជាការប្តេជ្ញា និងជំនឿចិត្តពីបុគ្គលិកបានដែរ ។ អ្នកដឹកនាំមិនត្រូវស្តាប់ដើម្បីរកការឆ្លើយតបគ្រប់ពេលវេលាទេ ប៉ុន្តែពួកគេគួរព្យាយាមស្តាប់ដើម្បីយល់ដឹងពីមនុស្សម្នាក់ទៀត ។
២. រក្សាភាពបើកទូលាយសម្រាប់គំនិត និងបទពិសោធន៍ថ្មីៗ
តើអ្នកជាមនុស្សដែលចូលចិត្តគ្រប់គ្រងអ្វីៗទាំងអស់មែនដែរទេ? ដើម្បីក្លាយជាអ្នកដឹកនាំក្នុងបរិបទថ្មី អ្នកត្រូវតែធ្វើជាមនុស្សដែលមានភាពបើកទូលាយទទួលយកគំនិតថ្មីៗពីអ្នកដទៃដែរព្រោះវាអនុញ្ញាតឲ្យអ្នកបង្កើនប្រសិទ្ធិភាពការងាររបស់អ្នក និងអ្នកដែលធ្វើការជាមួយ ។
៣. ជំរុញឲ្យមានការឆ្ងល់
អ្នកដឹកនាំល្អជាមនុស្សដែលមិនខ្លាចក្នុងការសួរថា ហេតុអ្វី?ទេដើម្បីយល់ឲ្យបានគ្រប់ជ្រុងជ្រោយពីអ្វីមួយ ។ ការធ្វើដូច្នេះជំរុញឲ្យមានការរៀនសូត្រ និងការផ្តោតស្មារតីលើលទ្ធផល ។ វិធីនេះកាន់តែមានប្រសិទ្ធិភាពទៅទៀតនៅពេលដែលជុំវិញខ្លួនអ្នកគឺពោរពេញទៅដោយមនុស្សដែលមានសមត្ថភាពនិងជំនាញខ្ពស់ ។
៤. ព្យាយាមយល់ដឹងពីមនុស្សនិងសង្គមដោយស្គាល់មនុស្សថ្មីឲ្យបានច្រើន
ចូរចងចាំថា ភាពជាអ្នកដឹកនាំមិនត្រឹមតែទាក់ទិននឹងបទពិសោធន៍និងចំណេះដឹងដែលអ្នកមានទេ តែវាក៏ទាក់ទងទៅនឹងសមត្ថភាពរបស់អ្នកក្នុងការធ្វើការជាមួយមនុស្សខុសៗគ្នាដែរ ។ ការស្ទាល់មនុស្សថ្មីៗជួយបង្កើនគុណភាពនៃការសន្ទនារបស់អ្នកព្រោះវាអនុញ្ញាតឲ្យអ្នកយល់ដឹងកាន់តែច្រើនពីមនុស្សខុសៗគ្នាក្នុងសង្គម និងវិធីក្នុងការទំនាក់ទំនងជាមួយពួកគេ ៕
ចែករំលែកព័តមាននេះ