ប្រទេសហុងកុង ៖ នាយកដ្ឋានកសិកម្ម និងជលផលនៃទីក្រុងហុងកុង បាននិយាយថា សត្វឆ្មាចិញ្ចឹមមួយក្បាលបានធ្វើតេស្តរកវីរុសកូវីដ១៩ វិជ្ជមាន បន្ទាប់ពីម្ចាស់វាត្រូវបានបញ្ជាក់ថាមានផ្ទុកវីរុសនេះ។ គេបានប្រាប់ថា សត្វឆ្មាមួយក្បាលនេះ គ្មានបង្ហាញរោគសញ្ញាអ្វីទាំងអស់។
នៅក្នុងសេចក្តីជូនដំណឹងមួយកាលពីល្ងាចថ្ងៃអង្គារ (ថ្ងៃទី៣១ ខែមីនា) នាយកដ្ឋានបាននិយាយថា បច្ចុប្បន្ននេះ មិនមានភ័ស្តុតាងណាមួយដែលបញ្ជាក់ថា សត្វចិញ្ចឹមអាចជាប្រភពនៃជំងឺកូវីដ១៩ នោះទេ ហើយម្ចាស់មិនគួរបោះបង់ចោលសត្វចិញ្ចឹមរបស់ពួកគេឡើយ។
អង្គការសុខភាពពិភពលោកក៏បានបញ្ជាក់នៅលើគេហទំព័ររបស់ពួកគេផងដែរថា មិនមានភស្តុតាងណាមួយដែលបង្ហាញថា ឆ្កែឆ្មា ឬសត្វចិញ្ចឹមណាមួយអាចបញ្ជូនជំងឺនេះមកមនុស្សដែរ។
ឆ្មា គឺជាសត្វទី៣ ដែលធ្វើតេស្តវិជ្ជមាននៅហុងកុង បន្ទាប់ពីករណីមុនៗ ដែលឆ្កែ ២ក្បាលបានធ្វើតេស្តវិជ្ជមាន។ អាជ្ញាធរបាននិយាយថា ឆ្មានេះនឹងត្រូវបន្តតាមដាន និងពិនិត្យ។
សំណាកដែលប្រមូលបានពីមាត់ច្រមុះ និងគូថរបស់ឆ្មា បានធ្វើតេស្តវិជ្ជមានចំពោះវីរុសនេះ បន្ទាប់ពីវាត្រូវបានបញ្ជូនទៅឱ្យផ្តាច់ពីគេនៅថ្ងៃទី៣០ ខែមីនា។
យោងតាមសេចក្តីថ្លែងការណ៍ពីសមាគមពេទ្យសត្វហុងកុងបានឱ្យដឹងថា មានករណីមួយផ្សេងទៀត ដែលត្រូវបានគេរាយការណ៍ថា មានផ្ទុកមេរោគវីរុសនៅឆ្មាមួយនៅបែលហ្ស៊ិកដែលត្រូវបានគេជឿថា បានឆ្លងពីម្ចាស់វា៕ ដកស្រង់ចេញពីវេបសាយ ៖ channelnewsasia (កែសម្រួលដោយ ៖ បុប្ផា)
ចែករំលែកព័តមាននេះ