យោងតាមប្រភពពី Marca បានរាយការណ៍ថាក្លិប Real Madrid គ្មានគម្រោង និងមិនចាំបាច់ក្នុងការកាត់បន្ថយប្រាក់ខែកីឡាកររបស់ពួកគេ ក្នុងអំឡុងពេលផ្អាកការប្រកួតដោយសារការផ្ទុះឡើងនៃវីរុស Covid-19 ឡើយ…
យោងតាមប្រភពពី Marca បានរាយការណ៍ថាក្លិប Real Madrid គ្មានគម្រោង និងមិនចាំបាច់ក្នុងការកាត់បន្ថយប្រាក់ខែកីឡាកររបស់ពួកគេ ក្នុងអំឡុងពេលផ្អាកការប្រកួតដោយសារការផ្ទុះឡើងនៃវីរុស Covid-19 ឡើយ ព្រោះក្លិបមានប្រាក់គ្រប់គ្រាន់ក្នុងការចំណាយលើបញ្ហានេះ។
ក្លិបក្នុងក្របខ័ណ្ឌកំពូល La Liga មួយចំនួនបានប្រកាសថា ពួកគេកំពុងធ្វើប្រតិបតិ្តការបណ្តោះអាសន្ន ក្នុងការស្នើកាត់បន្ថយប្រាក់ខែមួយផ្នែករបស់កីឡាករ ដើម្បីជួយផ្គត់ផ្គង់ការបើកប្រាក់ខែដល់បុគ្គលិកផ្សេងទៀត ។
ដោយសារតែប្រាក់ខែរបស់កីឡាករក្នុងក្រុម Real Madrid គឺតិចជាង ៥០%នៃប្រាក់ចំណូលសរុបរបស់ក្លិប ព្រមទាំងប្រាក់ចំណេញពីការដោះដូរកីឡាកររហូតដល់ ៣២០លានអឺរ៉ូក្នុងរយៈពេល១១ឆ្នាំចុងក្រោយនេះ ទើបគ្មានផលប៉ះពាល់លើការចំណាយរបស់ក្លិបឡើយ ។
ការផ្ទុះឡើងនៃវីរុសនេះបានធ្វើឱ្យកីឡានៅពាសពេញពិភពលោកត្រូវបានផ្អាក ដោយក្នុងនោះបាល់ទាត់អេស្ប៉ាញត្រូវផ្អាកដោយគ្មានកំណត់ ។ បច្ចុប្បន្នប្រទេសអេស្ប៉ាញស្ថិតនៅពីក្រោយប្រទេសអុីតាលីតែមួយគត់នៅលើពិភពលោក ដែលមានចំនួនអ្នកបាត់បង់ជីវិតច្រើនបំផុតដោយសារតែវីរុសនេះ ពោលគឺចំនួន ៧,៧១៦ និងករណីឆ្លងមានជិត ៨៨,០០០ករណី ៕ (ដកស្រង់ចេញពី Marca)
ចែករំលែកព័តមាននេះ