ខេត្តប៉ៃលិន ៖ ឈ្មួញកណ្តាលសម្រាប់ផ្លែតាង៉ែន ឬហៅថាមៀនប៉ៃលិនបានឲ្យដឹងថា
តម្លៃដំណាំហូបផ្លែមួយនេះគឺធ្លាក់ថ្លៃខ្លាំង ជាពិសេសគឺគ្មានទីផ្សារតែម្តងសម្រាប់ការនាំចេញ
ថៃ ។ យ៉ាងណាមិញផ្លែតាង៉ែនទោះគ្មានទីផ្សារនៅថៃ តែឈ្មួញបានអះអាងថាការប្រមួលផល
ផ្លែតាង៉ែន គឺចំពេលរដូវសែនផ្នូរធ្វើឲ្យពួកគាត់នៅមានទឹកមាត់លេបខ្លះៗតាមរយៈការប្រមួល
ផលយកទៅលក់ឲ្យបងប្អូនខ្មែរជាប់ខ្សែស្រឡាយចិន ។
ជាក់ស្តែងនៅព្រឹកថ្ងៃទី២៩ ខែមីនា ឆ្នាំ២០២០ គេសង្កេតឃើញមានឈ្មួញម្នាក់បានដឹក
នាំកម្មករប្រមាណជាង៥០នាក់សម្រុកបេះផ្លែតាង៉ែន ឬហៅថា «មៀនប៉ៃលិន» ជាង៣០០ដើម ដោយអ្នកខ្លះបេះផ្លែបណ្តើរច្រកកេសបណ្តើរ និងអ្នកខ្លះទៀតកាត់មែកតម្រឹមស្លឹកជាបណ្តើរៗ ។ ខណៈកំពុងមមាញឹកនឹងការប្រមូលផលផ្លែតាង៉ែន ឈ្មួញជួញដូរកសិផលហូបផ្លែមួយរូប បានប្រាប់ឲ្យដឹងថា ផ្លែតាង៉ែនពេលនេះមានការធ្លាក់ថ្លៃបើធៀបនឹងឆ្នាំមុនគឺធ្លាក់ថ្លៃ ខ្លាំងណាស់ ហើយបើដឹកយកទៅលក់នៅប្រទេសថៃទៀត គឺអត់ចំណេញអ្វីនោះទេ គឺខាតចុង
ខាតដើមតែម្តង ព្រោះគ្មានទីផ្សារ។
ប្រភពព័ត៌មានពីស្ត្រីម្នាក់ ឈ្មោះ ស្រីម៉ៅ អាយុ៣៥ឆ្នាំ ជាឈ្មួញផ្លែតាង៉ែន រស់នៅ
ក្នុងក្រុងប៉ៃលិន បានរៀបរាប់ឱ្យដឹងថា «ប្រមូលឆ្នាំនេះនិយាយទៅតាង៉ែនអត់មានទីផ្សារ
សោះបើសិនយកទៅលក់នៅថៃ តែវាហាក់ដូចជាសំណាងដែរសម្រាប់ខ្ញុំ ព្រោះប្រមូលផល
ពេលនេះគឺចំរដូវបងប្អូនខ្សែចិនសែនផ្នូរ អញ្ចឹងតម្លៃគឺគ្រាន់បើ» ។ អ្នកនាងបានបន្តថា «ពួក
ខ្ញុំបេះយកទៅលក់ឱ្យប្រជាពលរដ្ឋជាប់ខ្សែស្រឡាយចិន នៅតាមបណ្តាខេត្តនានា ដែលមាន
តម្រូវការទិញយកទៅសែនផ្នូរ ទើបលក់បានថ្លៃខ្ពស់ជាងលក់ឱ្យខាងឈ្មួញថៃបន្តិច »។
អ្នកនាងបានបន្តថា អ្នកនាងបានម៉ៅចម្ការគេមួយកន្លែង ស្ថិតនៅក្នុងភូមិតាង៉ែនក្រោម សង្កាត់ប៉ៃលិន ក្រុងប៉ៃលិន ដោយម្ចាស់ចម្ការលក់ឱ្យគាត់ ក្នុង១គីឡូក្រាម តម្លៃ៣០០០ រៀល ។ បើគាត់បេះយកទៅលក់បន្តនៅប្រទេសថៃ គេឱ្យត្រឹមតែ១គីឡូក្រាម តម្លៃ១៣០០ រៀលទៅ ១៥០០រៀលប៉ុណ្ណោះ ខាតអស់ ពាក់កណ្តាល ។ គាត់បានបន្តទៀតថាការទិញផ្លែតាង៉ែនពេលនេះ ពិតជាមានការធ្លាក់ចុះខ្លាំង តែគាត់ក៏មានសំណាងដែរ ដោយសារជួលកម្មករបេះតាង៉ែន ប៉ះចំរដូវ ដែលប្រជាពលរដ្ឋខ្មែរជាប់ខ្សែស្រឡាយចិនមួយចំនួន នៅតាមបណ្តាខេត្តនានា គេមានតម្រូវការទិញយកទៅសែនផ្នូរ ទើបគាត់បេះលក់បានខ្ពស់បន្តិច គឺ១គីឡូក្រាមអាចលក់បានចាប់ពី៤០០០រៀល ទៅ៥០០០រៀលដែរ ។ ហើយគាត់ក៏ជួលកម្មករជាច្រើននាក់ ឱ្យចូលបេះផ្លែតាង៉ែននេះ ដោយ១កញ្ឆេ ទម្ងន់២៥គីឡូក្រាម ឱ្យថ្លៃឈ្នួល៥០០០រៀល បើកាលពីមុន១កញ្ឆេឱ្យថ្លៃឈ្នួល៨០០០រៀល ។
ប្រភពពីនារីឈ្មួញផ្លែឈើខាងលើបានបន្តថា ប៉ុន្តែដោយសារតែតម្លៃទីផ្សារតាង៉ែនមាន
ការធ្លាក់ចុះខ្លាំងការជួលកម្មករក៏កាត់បន្ថយទៅតាមនោះដែរ។ គាត់បញ្ជាក់ថាការបេះផ្លែតា
ង៉ែននេះ មានរយ:ពេលជាង១០ថ្ងៃមកហើយ ដោយចម្ការខ្លះបេះបាន៥តោន តែការបេះនៅ
ចម្ការនេះ បានប្រហែលជាង១០តោន ហើយដឹកយកទៅលក់ដូរនៅតាមបណ្តាខេត្តនានា ក្នុងប្រទេសកម្ពុជា ជាបណ្តើរៗដែរ ខណ:បេះចម្ការមួយអស់ ចូលទៅបេះនៅចម្ការមួយទៀត
ជាហូរហែដែរ។ ចំណែកម្មករដែលបេះផ្លែតាង៉ែន បានរៀបរាប់ឱ្យដឹងដែរថា ពួកគាត់ម្នាក់ៗ ខ្លះមានកូចចៅតូចៗ មកពីស្រុកកំរៀង ខេត្តបាត់ដំបង ខ្លះមកពីក្រុងប៉ៃលិន និងមកពីខេត្ត
ផ្សេងៗ ទៀតដែរ ដោយស៊ីឈ្នួលបេះផ្លែតាង៉ែនហៅមៀនប៉ៃលិន ក្នុង១ថ្ងៃ បានកម្រៃជួនកាល
៣០០០០រៀល ទៅ៥០០០០រៀល ។ ពួកគាត់បន្តទៀតថា យប់នៅត្រង់កន្លែងណា នាំគ្នាបោះ
តង់ស្នាក់នៅកន្លែងនោះ ហើយដាំបាយធ្វើម្ហូបហូបជាមួយគ្នា ។
ចំណែកកម្មករណារស់នៅជិតៗក្នុងក្រុង ក៏ត្រឡប់ទៅស្នាក់នៅផ្ទះរបស់ខ្លួនវិញ លុះព្រឹកឡើងនាំគ្នាបន្តដើរបេះផ្លែតាង៉ែន ឱ្យថៅកែនៅតាមចម្ការនីមួយៗ រហូតដល់អស់ ទើបឈប់ទៅរកការងារផ្សេងទៀត ៕
ចែករំលែកព័តមាននេះ