ជារៀងរាល់ឆ្នាំ ប្រជាជនកម្ពុជាជាច្រើនបាននាំគ្នាធ្វើដំណើរទៅលេងស្រុកកំណើតនៅថ្ងៃបុណ្យចូលឆ្នាំខ្មែរនៅពាក់កណ្តាលខែមេសា ដែលត្រូវបានចាត់ទុកថា ជាពេលវេលាដ៏សំខាន់សម្រាប់ការជួបជុំគ្រួសារ។ ប៉ុន្តែពិធីបុណ្យចូលឆ្នាំខ្មែរឆ្នាំនេះ ប្រហែលជានឹងមិនអាចសប្បាយដូចឆ្នាំមុនៗឡើយ ខណៈដែលប្រជាជនទូទាំងប្រទេសបានបារម្ភអំពីការឆ្លងមេរោគកូវីដ១៩ ដែលកំពុងឆ្លងដល់មនុស្សចំនួន រហូតដល់ជិត៨សែននាក់ក្នុងពិភពលោក ហើយសម្លាប់មនុស្សជិតបួនម៉ឺននាក់។
នៅកម្ពុជាស្ថានភាពមិនធ្ងន់ធ្ងរដូចជាប្រទេសភាគច្រើននៅក្នុងពិភពលោកទេ។ រហូតមកទល់ត្រឹមថ្ងៃទី៣១ ខែមីនា កម្ពុជាបានរកឃើញអ្នកឆ្លងមេរោគកូវីដ១៩ ចំនួន១០៩ ករណី។ ហើយកម្ពុជាមិនទាន់មានមនុស្សស្លាប់ ដោយសារមេរោគនេះឡើយ។
ប៉ុន្តែទោះបីជាយ៉ាងណាក្តី រាជរដ្ឋាភិបាលកម្ពុជាបានចាត់វិធានការសំខាន់ជាច្រើន ដើម្បីប្រយុទ្ធនឹងមេរោគកូវីដ១៩នេះ។ សម្តេចតេជោ ហ៊ុន សែន កាលពីថ្ងៃទី៣០ ខែមេសា បានប្រកាសបិទកាស៊ីណូទាំងអស់ទូទាំងប្រទេស ដើម្បីទប់ការឆ្លងមេរោគកូវីដ១៩ និងបានហាមការនាំចេញអង្ករ និងស្រូវ ដើម្បីធានាការមានស្បៀងគ្រប់គ្រាន់សម្រាប់ប្រជាជនក្នុងករណីដែលមេរោគកូវីដ១៩ នៅតែបន្តរាលដាលនៅកម្ពុជា។ ទន្ទឹមនោះ សម្តេចក៏បានអោយដឹងអំពីការធ្វើច្បាប់ ដាក់ប្រទេសក្នុងស្ថានភាពអាសន្នផងដែរ។
ចំពោះពិធីបុណ្យចូលឆ្នាំ សម្តេចបានលើកទឹកចិត្តអោយប្រជាជនកម្ពុជារៀបចំពិធីនេះ នៅតាមផ្ទះរៀងៗខ្លួន និងចៀសវាងការជួបជុំដែលមានមនុស្សច្រើន ដើម្បីកុំអោយមានការឆ្លងមេរោគកូវីដ១៩។
នៅក្នុងឱកាសបុណ្យចូលឆ្នាំខ្មែរនោះ ប្រជាជនកម្ពុជាបានទទួលការឈប់សម្រាកច្រើនថ្ងៃហើយ ជាទូទៅពួកគេច្រើនយកពេលវេលានេះនាំគ្នាធ្វើដំណើរទៅលេងស្រុកកំណើត ឬក៏ដើរលេងក្រៅប្រទេស។
ជារៀងរាល់ឆ្នាំ ទីក្រុងភ្នំពេញ បានក្លាយជាទីក្រុងដ៏ស្ងាត់ជ្រងំ ខណៈមនុស្សភាគច្រើននាំគ្នាទៅលេងស្រុកកំណើត និងធ្វើដំណើរទៅក្រៅប្រទេស។
ប៉ុន្តែឆ្នាំនេះ ការធ្វើដំណើររបស់មនុស្សអាចនឹងត្រូវថយចុះដោយសារតែការភ័យខ្លាចនៃការឆ្លង មេរោគកូវីដ១៩។
វាច្បាស់ណាស់ថា ប្រជាជនកម្ពុជានឹងមិនមាននរណាធ្វើដំណើរ ទេសចរណ៍ទៅក្រៅ ប្រទេសទេ ដោយសារស្ថានភាពធ្ងន់ធ្ងរនៃការឆ្លងរាលដាលមេរោគកូវីដ១៩ នៅក្នុងពិភពលោក។
ប៉ុន្តែចុះចំណែកការធ្វើដំណើរទៅលេងស្រុកកំណើតវិញនោះ? តាមការសាកសួរអ្នកខ្លះបាននិយាយថា ពួកគេប្រហែលជានឹងមិនធ្វើដំណើរទៅលេងស្រុកកំណើតឡើយដោយខ្លាចមានការឆ្លងមេរោគកូវីដ១៩។
ចំណែកខ្លះទៀតនិយាយថា ពួកគេនឹងទៅលេងស្រុក ដើម្បីជួបជុំបងប្អូន និងឪពុកម្តាយ ពីព្រោះនេះជាពេលវេលាសំខាន់សម្រាប់ពួកគេ ពិសេសកម្មកររោងចក្រ និងអ្នកមកធ្វើការនៅភ្នំពេញ តែមានស្រុកកំណើតនៅតាមបណ្តាខេត្តនានា។
វាប្រហែលជាទាមទារអោយមានការសម្រេចចិត្តដ៏ប្រុងប្រយ័ត្ន និងការចេះការពារខ្លួនពីការឆ្លងមេរោគកូវីដ១៩ សម្រាប់ប្រជាជនកម្ពុជាដែលសម្រេចចិត្តធ្វើដំណើរទៅលេង ស្រុកកំណើតនៅក្នុងពេលវេលាដែលមានការរាលដាលនៃមេរោគកូវីដ១៩។
នៅលើពិភពលោក ប្រទេសជាច្រើនដែលមានស្ថានភាពកូវីដ១៩ធ្ងន់ធ្ងរ បានចេញវិធានការរឹតត្បិតការធ្វើដំណើរ ហើយអោយប្រជាជនស្នាក់នៅតាមផ្ទះរបស់ខ្លួន បើសិនជាមិនមានភាពចាំបាច់។ ចំណាត់ការនេះ ពីព្រោះតែគេយល់ថា ការធ្វើដំណើរជាមូលហេតុមួយនៃការឆ្លង និងចម្លងមេរោគកូវីដ១៩ ពីមនុស្សម្នាក់ទៅមនុស្សម្នាក់ទៀត។
នៅកម្ពុជាដែលស្ថានភាពមិនទាន់ធ្ងន់ធ្ងរដូចប្រទេសជាច្រើនោះ រដ្ឋាភិបាលមិនទាន់ឈានដល់ដំណាក់កាលនៃការបិទ ឬហាមឃាត់ការធ្វើដំណើររបស់ប្រជាជនឡើយ បើទោះបីជាមានការណែនាំអោយប្រជាជនចៀសវាងការជួបជុំមនុស្សច្រើន ហើយណែនាំអោយមានការបិទការប្រគំតន្រី្ត និងការធ្វើពិធីមានមនុស្សច្រើន ព្រមទាំងបិទសាលារៀនទូទាំងប្រទេស។
សម្រាប់រដ្ឋាភិបាល ការសម្រេចចិត្តហាមការធ្វើដំណើរប្រហែលជានឹងអាចកើតមានហើយច្បាប់នៃការដាក់ប្រទេសអោយក្នុងស្ថានភាពអាសន្នអាចនឹងត្រូវប្រកាសប្រើ បើសិនជារដ្ឋាភិបាលយល់ថា ស្ថានភាពនៃការរាលដាលមេរោគកូវីដ១៩ នៅកម្ពុជា មានភាពធ្ងន់ធ្ងរខ្លាំងនៅពេលខាងមុខ។ ប៉ុន្តែពេលនេះ ការដាក់ប្រទេសក្នុងស្ថានភាពអាសន្ន គឺមិនចាំបាច់ឡើយ។
នៅក្នុងដំណាក់កាលនេះ ប្រជាជនកម្ពុជា ត្រូវតាមដានព័ត៌មានអោយជាប់លាប់ចំពោះ ការណែនាំរបស់រដ្ឋាភិបាលដើម្បីចូលរូមក្នុងការប្រយុទ្ធនឹងមេរោគកូវីដ១៩។
ចំពោះការធ្វើដំណើរវិញ វាទាមទារអោយប្រជាជនទាំងអស់ធ្វើការពិចារណាយ៉ាងម៉ត់ចត់បំផុត ដោយគិតដល់ភាពចាំបាច់នៃការធ្វើដំណើរនោះ និងគ្រោះថ្នាក់នៃការឆ្លេងមេរោគកូវីដ១៩ ដែលអាចកើតមានពីការធ្វើដំណើរនោះ។
ការពិចារណាល្អិតល្អន់ និងការចេះការពារខ្លួននឹងអាចជួយប្រជាជនកម្ពុជាធ្វើដំណើរបានសេចក្តីសុខ និងចៀសផុតពីការឆ្លងនិងការចម្លងមេរោគកូវីដ១៩។
កន្លងមក រដ្ឋាភិបាលបានបង្ហាញពីការព្រួយបារម្ភរបស់ខ្លួន ចំពោះការវិលត្រឡប់មកស្រុកកំណើតវិញនៃពលករកម្ពុជាជាងប្រាំម៉ឺននាក់មកពីប្រទេ សថៃហើយបានស្នើសុំអោយពួកគេដាក់ខ្លួននៅដោយឡែករយៈពេល១៤ថ្ងៃ ដើម្បីតាមដានសុខភាព និងបញ្ចៀសការចម្លងមេរោគកូវីដ១៩ ដល់មនុស្សជាទីស្រឡាញ់ក្នុងគ្រួសារ។
ដូច្នេះសូមបងប្អូនទាំងអស់បង្កើនការប្រយ័ត្នទាំងអស់គ្នាហើយធ្វើដំណើរតែក្នុងករណីដែលចាំបាច់៕ (កែសម្រួលដោយ ៖ បុប្ផា)
ចែករំលែកព័តមាននេះ