រាជធានីភ្នំពេញ ៖ ខណៈពលរដ្ឋកាន់តែមានភាពភ័យព្រួយការឆ្លងជំងឺកូវីដ១៩ នៅក្នុងប្រទេសបាននាំគ្នាទិញទំនិញប្រើប្រាស់ចាំបាច់មួយចំនួនស្តុកទុកនៅផ្ទះ បង្ការខ្លាចមានការបិទផ្សារ ដោយសារតែជំងឺនេះរាលដាលកាន់តែខ្លាំង ។ ដោយសារតែពលរដ្ឋទិញទំនិញទុកកាន់តែច្រើនបែបនេះធ្វើអោយអាជីវករមួយចំនួនឆ្លៀតឱកាសដំឡើងថ្លៃទំនិញចាំបាច់មួយថ្លៃហួសហេតុ ។ រដ្ឋាភិបាលបានអំពាវនាវម្ដងជាពីរដង សុំអោយអាជីវករនិងម្ចាស់ហាងទំនិញរក្សាតម្លៃដដែល ដើម្បីចូលរួមទប់ស្កាត់ការឆ្លងរាលដាលនេះនៅក្នុងប្រទេសកម្ពុជា ។
យោងតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជាបានអោយដឹងថា កាលៈទេសៈដែលប្រទេសជាតិកំពុងប្រយុទ្ធប្រឆាំងនឹងជំងឺរាតត្បាត Covid- 19 ក្រសួងពាណិជ្ជកម្មបានសង្កេតឃើញថា ម្ចាស់ហាងលក់ទំនិញ អាជីវករ និងអ្នកលក់ដូរទំនិញតាមប្រព័ន្ធអ៊ីនធើណេតមួយចំនួនបានឆ្លៀតឱកាសលក់ដំឡើងថ្លៃទំនិញដូចជា ម៉ាស់ការពារមុខ អាល់កុលលាងដៃ ជែលលាងដៃ ឧបករណ៍ស្ទង់កំដៅ និងគ្រឿងឧបភោគបរិភោគចាំបាច់ សម្រាប់ប្រើប្រាស់ប្រចាំថ្ងៃ លើទីផ្សារទូទាំងប្រទេស ដែលសកម្មភាពទាំងនេះ អាចបង្កឲ្យមានផលប៉ះពាល់ដល់សន្តិសុខសង្គមធ្ងន់ធ្ងរ ។
ក្រសួងពាណិជ្ជកម្មបានអំពាវនាវ និងស្នើសុំឲ្យសាធារណជន មេត្តារក្សាភាពនឹងនរ កុំជ្រួលច្របល់ហួសហេតុនាំឲ្យជនឱកាសនិយមឆ្លៀតយកផលចំណេញ តាមរយៈការលក់ដំឡើងថ្លៃទំនិញហួសហេតុ ។ សម្រាប់ម្ចាស់ហាងទំនិញ និងអាជីវករគ្រប់ប្រភេទ សូមប្រកាន់ខ្ជាប់នូវស្មារតីសាមគ្គីជាតិខ្មែរ កុំឆ្លៀតឱកាសដំឡើងថ្លៃទំនិញកេងចំណេញហួសហេតុ និងសូមអោយម្ចាស់ហាងលក់ទំនិញ និងអាជីវករទាំងអស់ត្រូវបិតស្លាកថ្លៃជាប្រាក់រៀលលើមុនទំនិញ ដែលចរាចរនៅលើទីផ្សារ សំដៅធានាបាននូវយន្តការសេដ្ឋកិច្ចទីផ្សារសេរី ការប្រកួតប្រជែងដោយសមធម៌ និងលើកស្ទួយដល់ចរាចររូបិយវត្ថុក្នុងស្រុក ក្នុងគោលបំណងបម្រើផលប្រយោជន៍ប្រជាជនទូទៅ ។
យោងតាមប្រសាសន៍សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា បានអោយដឹងថា កម្ពុជាបានបិទសាលារៀនរដ្ឋ និងឯកជន ក្លិបកម្សាន្ត រង្គសាល បៀរហ្កាឌិន និងខារ៉ាអូខេ កាស៊ីណូជាដើម តែកម្ពុជានឹងមិនបិទក្រុង បិទប្រទេស បិទផ្សារ លក់ទំនិញដូចក្រុមមួយចំនួននិយាយឡើង ដូច្នេះពលរដ្ឋនៅតែអាចទិញទំនិញនៅផ្សារបានដដែល និងសូមកុំអោយមានការជ្រួលច្របល់ខ្លាំងពេក ៕
ចែករំលែកព័តមាននេះ