រាជធានីភ្នំពេញ ៖ បន្ទាប់ពីរដ្ឋសភាបោះឆ្នោត ផ្តល់សេចក្តីទុកចិត្តរួមមក ទេសរដ្ឋមន្ត្រី និងរដ្ឋមន្ត្រីបានចូលធ្វើសច្ចាប្រណិធានចូលកាន់ដំណែង កាលពីរសៀលថ្ងៃទី៣០ មីនា ឆ្នាំ២០២០ ។
ពិធីសច្ចាប្រណិធានចូលកាន់តំណែង ចំពោះព្រះបរមឆាយាលក្ខណ៍ ព្រះករុណា ព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់បំផុត ចំពោះព្រះភ័ក្ត្រនៃសម្តេចព្រះមហាសង្ឈរាជទាំងពីរគណៈ និងទេវតាថែរក្សាព្រះមហាសេ្វតច្ឆត្រ នៃឥស្សរជនជាតិក្រោយទទួលបានព្រះរាជក្រឹត្យ តែងតាំង និងកែសម្រួលសមាសភាពរាជរដ្ឋាភិបាល នៃព្រះរាជាណាចក្រកម្ពុជា នាវេលារសៀលថ្ងៃដដែល នាព្រះទីនាំងទេវាវិនិច្ឆ័យ ព្រះបរមរាជវាំង ។
សូមជម្រាបថា សមាសភាពរាជរដ្ឋាភិបាលថ្មី ដែលរដ្ឋសភាបោះឆ្នោតផ្តល់សេចក្តីទុកចិត្តរូមមាន ៖
១-លោក ចម ប្រសិទ្ធ ជាទេសរដ្ឋមន្ត្រី
២-លោក ហ៊ឹម ឆែម ជាទេសរដ្ឋមន្ត្រី ទទួលបន្ទុកបេសកកម្មពិសេស
៣-លោក អង្គ វឌ្ឍានា ជាទេសរដ្ឋមន្ត្រី ទទួលបន្ទុកបេសកម្មពិសេស
៤-លោក ត្រាំង អ៊ីវតឹក ជាទេសរដ្ឋមន្ត្រី ទទួលបន្ទុកបេសកកម្មពិសេស
និង៥-លោក ពេជ្រ ប៊ុនធិន ជាទេសរដ្ឋមន្ត្រី ទទួលបន្ទុកពិសេស ។
កែសម្រួល និងតែងតាំងសមាសភាពរដ្ឋមន្ត្រី ៖
១-លោកចម ប្រសិទ្ធ ជាទេសរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
២-លោក កើត រិទ្ធ ជារដ្ឋមន្ត្រីក្រសួងយុត្តិធម៌
៣-លោក ជា វ៉ាន់ដេត ជារដ្ឋមន្ត្រីក្រសួងប្រៃសណីយ៍ និងទូរមនាគមន៍
៤-ឈិត សុខុន ជារដ្ឋមន្ត្រីក្រសួងធម្មតា និងសាសនា
និង៥-លោកព្រំ សុខា ជារដ្ឋមន្ត្រីក្រសួងមុខងាសាធារណៈ ។
តើរដ្ឋមន្ត្រីក្រសួងយុត្តិធម៌ថ្មី ជានរណា ? មកដឹងពីអតីតនិស្សិតឆ្នើមអាហាររូបករណ៍ផ្នែកច្បាប់នៅប្រទេសបារាំង និងជាសាស្ត្រាចារ្យផ្នែកច្បាប់ជាង១០ឆ្នាំ ក្លាយជារដ្ឋមន្ត្រីក្រសួងយុត្តិធម៌វ័យក្មេងម្នាក់នៅកម្ពុជា ។
កោះសន្តិភាពសូមលើកយកប្រវត្តិត្រួសៗរបស់លោក កើត រិទ្ធ រដ្ឋមន្ត្រីក្រសួងយុត្តិធម៌វ័យក្មេង ដែលទើបរដ្ឋសភាបោះឆ្នោតផ្តល់សេចក្តីទុកចិត្តតែងតាំងជារដ្ឋមន្ត្រីក្រសួងយុត្តិធម៌ នាព្រឹកថ្ងៃទី៣០ មីនា ២០២០នេះ តាមការស្នើសុំរបស់សម្តេចតេជោនាយករដ្ឋមន្ត្រី ហ៊ុន សែន ។
លោក កើត រិទ្ធ អាយុ៤១ឆ្នាំ កើតនៅថ្ងៃទី០២ ខែមករា ឆ្នាំ១៩៧៩ និងមានទីកំណើត នៅភូមិព្រៃទទឹង ស្រុកព្រៃឈរ ខេត្តកំពង់ចាម លោកគឺជានិស្សិតដែលតស៊ូព្យាយាមសិក្សា ទោះបីជាជីវភាពគ្រួសារមិនសូវធូរធារក្តី គាត់នៅតែខិតខំជួយរបរគ្រួសារផង និងខំរៀនផង រហូតទទួលបានអាហាររូបករណ៍សិក្សាផ្នែកច្បាប់ នៅប្រទេសបារាំងនៅឆ្នាំ ១៩៩៩ ។
នៅឆ្នាំ២០០០ លោកទទួលបានបរិញ្ញាបត្រនីតិឯកជន ពីសាកលវិទ្យាល័យលីយ៉ុង២ ប្រទេសបារាំង(និស្សិតអាហាររូបករណ៍) ចំណែកឆ្នាំ២០០១ លោកទទួលបានសញ្ញាបត្រ Maîtrise ផ្នែកច្បាប់ពីសាកលវិទ្យាល័យលីយ៉ុង២ (ជាមួយនិទ្ទេសល្អណាស់) ។ ឆ្នាំ២០០២ ទទួលបានបរិញ្ញាបត្រជាន់ខ្ពស់ផ្នែកច្បាប់ព្រហ្មទណ្ឌ និងវិទ្យាសាស្ត្រនៃបទឧក្រិដ្ឋ នៅសាកលវិទ្យាល័យលីយ៉ុង៣ ប្រទេសបារាំងផងដែរ ។
បន្ទាប់ពីទទួលសញ្ញាបត្ររួចហើយលោកបានសម្រេចចិត្តត្រលប់មកប្រទេសកម្ពុជាវិញ ដោយជាដំបូងលោកបានធ្វើជាសាស្ត្រាចារ្យផ្នែកច្បាប់ នៅសាកលវិទ្យាល័យភូមិន្ទនីតិសាស្ត្រ និងវិទ្យសាស្ត្រសេដ្ឋកិច្ច ទាំងថ្នាក់ភាសាបារាំង និងភាសាខ្មែរ ចាប់តាំងពីឆ្នាំ២០០២ រហូត ដល់ឆ្នាំ២០១៦ ដើម្បីចែករំលែកចំណេះដឹងដល់និស្សិតខ្មែរ និងមន្ត្រីរាជការកម្ពុជា ។
លោក កើត រិទ្ធ ជាស្ថាបនិកក្នុងការបង្កើតនូវក្រមព្រហ្មទណ្ឌ និងក្រមនីតិវិធីព្រហ្មទណ្ឌមួយរូបក្នុងចំណោមថ្នាក់ដឹកនាំផ្សេងទៀតផងដែរនៃក្រសួងយុត្តិធម៌ ។ នៅក្នុងកំឡុងពេលនោះផងដែរ លោក កើត រិទ្ធ ក៏ជាបុគ្គលដែលបានចុះផ្សព្វផ្សាយច្បាប់ទាក់ទងនឹងក្រមព្រហ្មទណ្ឌ និងក្រមនីតិវិធីព្រហ្មទណ្ឌទៅដល់ចៅក្រម ព្រះរាជអាជ្ញា និងមន្ត្រីអនុវត្តច្បាប់ តាមបណ្តាខេត្តផងដែរ ។
លោកជាសហនិពន្ធសៀវភៅ សេចក្តីផ្តើមនៃច្បាប់កម្ពុជា បោះពុម្ពផ្សាយក្នុងឆ្នាំ២០០៣ និង២០០៥ ។ សហនិពន្ធសៀវភៅ កំណត់ពន្យល់លើសេចក្តី ព្រាងក្រមព្រហ្មទណ្ឌទាក់ទងលើវិភាគទានលើការសិក្សាច្បាប់ព្រហ្មទណ្ឌកម្ពុជា បោះពុម្ពឆ្នាំ២០០៥ និពន្ធអត្ថបទស្តីពីធាតុផ្សំនៃបទល្មើសរំលោភ និងនិងការវិវត្តរបស់វានៅក្នុងច្បាប់ព្រហ្មទណ្ឌកម្ពុជា បោះពុម្ពឆ្នាំ២០០៦ ក្នុងព្រឹត្តបត្រនៃសាកលវិទ្យា ល័យភូមិន្ទនីតិសាស្ត្រ និងវិទ្យសាស្ត្រសេដ្ឋកិច្ច ។ សហនិពន្ធសៀវភៅ នីតិកម្ពុជា បោះពុម្ពផ្សាយក្នុងឆ្នាំ២០១៦ ។
បទពិសោធន៍ការងារ ចាប់តាំងពីឆ្នាំ ២០០២ រហូតដល់ឆ្នាំ២០១៦ ជាសាស្ត្រាចារ្យផ្នែកច្បាប់នៅសាកលវិទ្យាល័យភូមិន្ទនិតីសាស្ត្រ និងវិទ្យាសាស្ត្រសេដ្ឋកិច្ច (ទាំងថ្នាក់ភាសាបារាំង និងភាសាខ្មែរ) នៅក្នុងកំឡុងពេលនោះលោកកើត រិទ្ធ ក៏បានចុះផ្សព្វផ្សាយច្បាប់ទាក់ទងនឹងក្រមព្រហ្មទណ្ឌ និងក្រមនីតិវិធីព្រហ្មទណ្ឌទៅដល់ចៅក្រម ព្រះរាជអាជ្ញា និងមន្ត្រីអនុវត្តច្បាប់ តាមបណ្តាខេត្ត ។
នៅឆ្នាំ២០០៣-២០០៥ មន្ត្រីរាជការស៊ី វិលក្រសួងអប់រំយុវជន និងកីឡា ។
ឆ្នាំ២០០៥-២០១២មន្ត្រីរាជការស៉ីវិលក្រសួងសេដ្ឋកិច្ច និងហរិញ្ញវត្ថុ ។
ឆ្នាំ២០០៧-២០១៣ អនុរដ្ឋលេខាធិការក្រសួងយុត្តិធម៌ ។
ឆ្នាំ២០០៨ ដល់បច្ចុបន្ន ជាសមាជិកគណកម្មាការមូលបត្រកម្ពុជា ។
ឆ្នាំ២០១២ ដល់បច្ចុប្បន្ន ជាសមាជិក ឧត្តម ក្រុមប្រឹក្សា សេដ្ឋកិច្ចជាតិ ។
ឆ្នាំ២០១៤ ដល់បច្ចុប្បន្ន ជាសមាជិកគណៈកម្មាធិការកំណែ ទម្រង់ច្បាប់ និងប្រព័ន្ធយុត្តិធម៌ និងឆ្នាំ២០១៣ ដល់ ២០១៨ ជារដ្ឋលេខាធិការក្រសួងយុត្តិធម៌ ឆ្នាំ២០១៨ ដល់ ២០២០ ជារដ្ឋលេខាធិការប្រចាំការក្រសួងយុត្តិធម៌ នៅឆ្នាំថ្ងៃ ទៅ៣០ មីនា ២០២០ ជា រដ្ឋមន្ត្រីក្រសួងយុត្តិធម៌ ៕
ចែករំលែកព័តមាននេះ