ខេត្តស្វាយរៀង ៖ កាលពីថ្ងៃទី២៩ ខែមីនា ឆ្នាំ២០២០នេះ ក្រុមការងារគ្រូពេទ្យស្ម័គ្រចិត្តលោកហ៊ុន ម៉ានី សាខាខេត្តស្វាយរៀងចំនួន២៧នាក់បានបន្ដចុះផ្សព្វផ្សាយអប់រំផ្តល់ចំណេះដឹងស្តីពីវិធានការការពារ ទប់ស្កាត់ប្រយុទ្ធប្រឆាំងនឹងជំងឺកូវីដ១៩ និងចែកម៉ាស់ដល់ប្រជាពលរដ្ឋនៅក្នុងភូមិតារាក់…
ខេត្តស្វាយរៀង ៖ កាលពីថ្ងៃទី២៩ ខែមីនា ឆ្នាំ២០២០នេះ ក្រុមការងារគ្រូពេទ្យស្ម័គ្រចិត្តលោកហ៊ុន ម៉ានី សាខាខេត្តស្វាយរៀងចំនួន២៧នាក់បានបន្ដចុះផ្សព្វផ្សាយអប់រំផ្តល់ចំណេះដឹងស្តីពីវិធានការការពារ ទប់ស្កាត់ប្រយុទ្ធប្រឆាំងនឹងជំងឺកូវីដ១៩ និងចែកម៉ាស់ដល់ប្រជាពលរដ្ឋនៅក្នុងភូមិតារាក់ និងភូមិសង្កែ នៅក្នុងឃុំឈើទាល ស្រុកស្វាយជ្រុំចំនួន២៨៦ខ្នងផ្ទះ។
ក្រុមការងារគ្រូពេទ្យស្ម័គ្រចិត្តលោកហ៊ុន ម៉ានី សាខាខេត្តស្វាយរៀងទាំង២៧នាក់នេះដឹកនាំដោយលោកវេជ្ជបណ្ឌិតកែរ រដ្ឋា អនុប្រធានប្រតិបត្តិ ក្រុមការងារគ្រូពេទ្យស្ម័គ្រចិត្តលោកហ៊ុន ម៉ានី និងជាប្រធានមន្ទីរសុខាភិបាលខេត្តស្វាយរៀងនិងលោកហែម សារឹទ្ធ អភិបាលស្រុកស្វាយជ្រុំ។
ក្នុងការចុះផ្សព្វផ្សាយអប់រំផ្តល់ចំណេះដឹងស្តីពីវិធានការការពារទប់ស្កាត់ប្រយុទ្ធប្រឆាំងនឹងជំងឺ COVID-19និងចែកម៉ាស់ដល់ប្រជាពលរដ្ឋខាងលើនេះក៏មានការចូលរួមសហការពីក្រុមប្រឹក្សាឃុំឈើទាលនិងមេភូមិព្រមទាំងមានការចូលរួមពីក្រុមយុវជនស.ស.យ.ក ឃុំឈើទាលផងដែរ។
ក្នុងឱកាសនោះក្រុមការងារគ្រូពេទ្យស្ម័គ្រចិត្តលោកហ៊ុន ម៉ានី ក៏បានឧបត្ថម្ភម៉ាស់១ប្រអប់, ក្រមាចំនួន៣០ និងថវិកា១០០,០០០រៀលជូនដល់ក្រុមប្រឹក្សាឃុំ។ដោយឡែកលោកហែម សារឹទ្ធ បានឧបត្ថម្ភក្រុមស.ស.យ.ក ចំនួន១២នាក់ ក្នុងម្នាក់ៗថវិកា១០,០០០រៀលផងដែរ។
លោកវេជ្ជបណ្ឌិតកែរ រដ្ឋា បានបញ្ជាក់ថា ជំងឺកូវីដ១៩ជាជំងឺកាចសហាវនាបច្ចុប្បន្នបង្កឲ្យមនុស្សគ្រប់ស្រទាប់ទទួលរងជំងឺ និងឈឺបាត់បង់ជីវិត បើគ្មានទទួលសេវាព្យាបាលទាន់ពេលវេលា ដូចនេះដើម្បីបញ្ជៀសជំងឺប្រភេទនេះ បងប្អូនត្រូវឧស្សហ៍លាងដៃនឹងសាប៊ូឲ្យបានញឹកញាប់។លើសពីនោះទៀតពេលប្រាស្រ័យទំនាក់ទំនងត្រូវពាក់ម៉ាស់ ឬក្រមា បើគ្មានករណីចាំចាច់គួរកុំជួបជុំប្រមូលផ្តុំគ្នាច្រើន ពេលសង្ស័យមានជំងឺអ្វីគួររួសរាន់ទៅប្រឹក្សាជាមួយគ្រូពេទ្យដែលនៅជិតធ្វើអនាម័យភូមិដ្ឋានបញ្ជៀសទៅកន្លែងចិញ្ចឹមសត្វ។
លោកវេជ្ជបណ្ឌិតកែរ រដ្ឋា បានបន្ថែមទៀតថា ជាពិសេសពិសារម្ហូបអាហារដែលចំអិនឲ្យឆ្អិន ចៀសវាងហូបបន្លែឆៅ គួរបន្ថយការសេពគ្រឿងស្រវឹងហើយកុំធ្វើដំណើរទៅទីប្រជុំជនផងដែរ។
សូមបញ្ជាក់ថាខេត្តស្វាយរៀងជាខេត្តជាប់ព្រំដែនកម្ពុជាវៀតណាម បន្ទាប់ពីនិន្នាការជំងឺកូវីដ១៩ផ្ទុះនៅប្រទេសចិន រាជរដ្ឋាភិបាល បានចាត់វិធានការទប់ស្កាត់ជំងឺនេះ ក្នុងនោះអាជ្ញាធរខេត្ត រួមនិងមន្ទីរសុខាភិបាលខេត្តបានរៀបចំធ្វើការត្រួតពិនិត្យភ្ញៀវចេញចូលតាមច្រកព្រំដែនអន្តរជាតិច្រកតំបន់រៀបចំក្រុមគ្រូពេទ្យនិងបន្ទប់ដាច់ដោយឡែកសម្រាប់អ្នកជំងឺសង្ស័យបានគ្រប់មន្ទីរពេទ្យបង្អែកក្នុងខេត្ត ។
ក្នុងនោះក៏មានចែកអំណោយប្រជាពលរដ្ឋក្រីក្រចំនួន៧គ្រួសារផងដែរ ក្នុងមួយគ្រួសារ បានទទួលបានមុង១, កន្ទេល១,សារុង១, ក្រម៉ា១, ស្ករស១គីឡូ, ទឹកដោះគោ, ១កំប៉ុង, អង្ករ២០គីឡូក្រាម, ទឹកត្រី១យួរ, ទឹកស៊ីអ៊ីវ១យួរ, មី១៥កញ្ចប់ និងថវិកា៥០,០០០រៀល។ ឧបត្ថម្ភស្ត្រីមានផ្ទៃពោះកូនភ្លោះ១០០,០០០រៀល និងចូលបុណ្យសព២នាក់ចំនួន២០០,០០០រៀល៕ (កែសម្រួលដោយ ៖ ធីតា)
ចែករំលែកព័តមាននេះ