រាជធានីភ្នំពេញ ៖ កម្មវិធីប្រកួតកីឡាប្រដាល់ក្បាច់ខ្មែរបូរាណតាមស្ថានីយ៍ទូរទស្សន៍ត្រូវបានដំណើរការឱ្យប្រកួតឡើងវិញជាធម្មតា បន្ទាប់ពីបានផ្អាកជាបណ្ដោះអាសន្តអស់រយៈពេលខ្លីមកនេះ។ នេះបើតាមការឱ្យដឹងពីមន្ត្រីសហព័ន្ធកីឡាប្រដាល់គុនខ្មែរមួយរូប។
ការប្រកួតកីឡាប្រដាល់គុនខ្មែរដែលជាប្រភេទកីឡាដ៏មានប្រជាប្រិយភាពលំដាប់ទី២បន្ទាប់កីឡាបាល់ទាត់ ហើយត្រូវសហព័ន្ធកីឡាប្រដាល់គុនខ្មែរបានធ្វើការប្រកាសឱ្យពន្យាពេលមួយរយៈខ្លីសិន ដើម្បីចូលរួមទប់ស្កាត់ការរីករាលដាលជំងឺរលាកសួត COVID-19 នោះគ្រោងនឹងដំណើរការប្រកួតជាផ្លូវការវិញហើយ នៅចុងសប្ដាហ៍នេះ។
ទន្ទឹមនឹងមានការប្រកាសឱ្យដំណើរការប្រកួតកីឡាប្រដាល់គុនខ្មែរឡើងវិញនាពេលនេះ គឺអនុវត្តទៅតាមប្រសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជណាចក្រកម្ពុជា ដែលបានមានប្រសាសន៍កាលពីពេលថ្មីៗមកនេះ ដោយសម្ដេចបានមានប្រសាសន៏លើកឡើងទៀតថា គឺមិនចង់ឱ្យប្រជាពលរដ្ឋធ្វើដំណើរចេញទៅក្រៅផ្ទះ ឱ្យមើលតាមកញ្ចក់ទូរទស្សន៍នៅផ្ទះវិញ។
សម្ដេចតេជោ បានធ្វើការប្រកាសកាលពីដើមសប្ដាហ៍កន្លងទៅក្នុងកម្មវិធីជួបសំណេះសំណាលជាមួយក្រុមគ្រូពេទ្យស្ម័គ្រចិត្តជំងឺ COVID-19 នៅវិមានសន្តិភាពថា បើសិនជាមិនឱ្យមានកម្មវិធីប្រកួតកីឡាប្រដាល់និងការប្រជុំខនសឺតទេនោះ ប្រទេសនឹងមានភាពស្ងាត់ជ្រងុំមិនខាន ព្រោះអីកម្មវិធីទាំងនេះ វាជាការផ្សាយបន្តផ្ទាល់មិនអនុញ្ញាតិឱ្យមានអ្នកទស្សនាផ្ទាល់តាមទីកន្លែងប្រកួតនោះឡើយ។
ម្យ៉ាងវិញទៀតកម្មវិធីទាំងពីរនេះ អ្នកមានភារកិច្ច ទើបអនុញ្ញាតិឱ្យចូល ជាក់ស្ដែងការប្រគំតន្ត្រីមានតែក្រុមភ្លេង និងអ្នកចម្រៀងប៉ុណ្ណោះ ខណៈការប្រកួតកីឡាប្រដាល់មានតែមន្ត្រីអាជ្ញាកណ្ដាលចៅក្រម និងកីឡាករ បូករួមទាំងក្រុមគ្រូពេទ្យទៀតផង សរុបសេចក្ដីទៅ គឺមិនលើសពី៥០នាក់នោះទេ។
ប៉ុន្តែបើតាមការឱ្យដឹងពីតំណាងស្ថានីយទូរទស្សន៍សម្រាប់កម្មវិធីប្រកួតកីឡាប្រដាល់មិនមានកីឡាករបរទេសនោះទេ មានតែការប្រកួតរវាងកីឡាករកម្ពុជានិងកម្ពុជាប៉ុណ្ណោះ៕ (កែសម្រួលដោយ ៖ បុប្ផា)
ចែករំលែកព័តមាននេះ