រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ទីតាំងលួចនាំចេញទៅក្រៅប្រទេសនូវអាវពេទ្យ រួមជាមួយម៉ាស់សម្រាប់ការពារមេរោគផ្សេងៗ ជាពិសេសវីរុសកូវីដ១៩ ត្រូវបានកម្លាំងនគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃសហការជាមួយមន្ត្រីមន្ទីរសុខាភិបាលរាជធានីភ្នំពេញ និងព្រះរាជអាជ្ញារង អមអយ្យការអមសាលាដំបូងរាជធានីភ្នំពេញ បានចុះទៅធ្វើការបង្ក្រាបបានចំនួន៣ទីតាំង ប៉ុន្តែពេលឆែកឆេរ និងត្រួតពិនិត្យនោះរកឃើញ២ទីតាំងល្មើសច្បាប់ និង១ទីតាំងទៀតមានច្បាប់ត្រឹមត្រូវ។
សេចក្តីរាយការណ៍បន្តថា ប្រតិបត្តិការនេះបានធ្វើឡើងកាលពីម៉ោងជាង២រសៀល ថ្ងៃទី៣០ ខែមីនា ឆ្នាំ២០២០ ហើយទីតាំងទាំង៣កន្លែងខាងលើនេះ ស្ថិតនៅក្នុងបុរីអាកាសចរណ៍ ភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ ។
បើតាមស្ត្រីដែលត្រូវកម្លាំងសមត្ថកិច្ចឃាត់ខ្លួននោះមិនទាន់ត្រូវបានបង្ហាញអត្តសញ្ញាណនៅឡើយទេ ហើយក៏មិនទាន់ដឹងថា តើសមត្ថកិច្ចមានចំណាត់ការបែបណាចំពោះពួកគាត់នៅឡើយដែរ?
បើតាមលោកអនុប្រធាននគរបាលប្រឆាំងបទល្មើសសេចកិច្ចនៃក្រសួងមហាផ្ទៃ ដែលដឹកនាំកម្លាំងចុះប្រតិបត្តិការបង្ក្រាបនេះ បានឲ្យដឹងថា នៅក្នុងខណៈនោះកម្លាំងរបស់លោកបានចុះឆែកឆេរ និងចាប់យកវត្ថុតាងបទល្មើសមួយចំនួន គឺ៖
ទីតាំងទី១ មានអាវពេទ្យការពារមេរោគចំនួន៨កាតុង ស្មើនិង៤០០អាវ ម៉ាស់មនុស្សចាស់ផលិតនូវប្រទេសចិន៤០កាតុង ស្មើ៨០០០០ម៉ាស់ ម៉ាស់ក្មេងចំនួន៧កាតុង ស្មើនិង៨៥,០០០ម៉ាស់, ម៉ាស់ផលិតនូវប្រទេសវៀតណាមចំនួន១៣កាតុង ស្មើនឹង៣២៥០០ម៉ាស់។
ចំណែកឯទីតាំងទី២ ចាប់យកម៉ាស់ដែលលួចផលិតខុសបច្ចេកទេសបន្លំធ្វើពីក្រដាស់ មានចំនួនជាង១៩ម៉ឺនម៉ាស់ ។
លោកឧត្តមសេនីយ៍បានបន្តថា ក្រៅពីវត្ថុតាងខាងលើ ក៏បានឃាត់ខ្លួនស្ត្រី២នាក់នាំយកទៅយកទៅកាន់នាយកនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដើម្បីធ្វើកំណត់ហេតុសាកសួរ និងកសាងសំណុំរឿងចាត់ការតាមច្បាប់ ។ ហើយប្រតិបត្តការនេះដែរ បានធ្វើឡើងក្រោមបញ្ជាដោយផ្ទាល់ដោយលោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាន នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងក្រោមការសម្របសម្រលពីដំណាងអយ្យការ លោកសាយ ណូរ៉ា ព្រះរាជអាជ្ញារងអមអយ្យការសាលដំបូងរាជធានីភ្នំពេញផងដែរ។
រីឯទីតាំងទី៣ នាំចូលមានច្បាប់ត្រឹមត្រូវ និងនាំចូល ដើម្បីផ្គត់ផ្គង់ដល់អាជ្ញាធរជាតិគ្រប់គ្រងគ្រោះមហន្តរាយ សម្រាប់ការងារមនុស្សធម៌ មិនត្រូវបានប៉ះពាល់ឡើយ ។ ចំណែកវត្ថុតាងដែលដកហូតត្រូវបាននាំយកទៅរក្សាទុកនៅនាយកដ្ឋាន នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដើម្បីចាត់ការបន្ត៕ (កែសម្រួលដោយ ៖ បុប្ផា)
ចែករំលែកព័តមាននេះ