ខេត្តកណ្ដាល ៖ ចោរប្លន់៣នាក់ក្នុងចំណោមបក្ខពួក៩នាក់ត្រូវបានកម្លាំងនគរបាលនៃអធិការដ្ឋានស្រុកអង្គស្នួល ខេត្តកណ្ដាល ចាប់ឃាត់ខ្លួនបានជាបន្តបន្ទាប់ ក្រោយពីទទួលបានព័ត៌មាននិងរូបថតជនសង្ស័យដែលផ្ដល់ជូនដោយកម្លាំងនគរបាលនៃអធិការរដ្ឋានខណ្ឌកំបូល រាជធានីភ្នំពេញ។
លុះក្រោយពេលឃាត់ខ្លួនបាននាំទៅសាកសួរទើបដឹងថា ក្រុមចោរខាងលើនេះធ្លាប់ធ្វើសកម្មភាពធាក់ប្លន់យកម៉ូតូនៅតាមផ្លូវបានសម្រេចចំនួន៦លើករួចមកហើយ នៅក្នុងភូមិសាស្រុកអង្គស្នួល ខេត្តកណ្ដាល និងស្រុកសំរោងទង ខេត្តកំពង់ស្ពឺ។
ការចាប់ខ្លួនជនសង្ស័យទាំង៣នាក់ខាងលើនេះបានធ្វើឡើងកាលពីវេលាព្រឹកថ្ងៃទី៣០ ខែមិនា ឆ្នាំ២០២០ នៅក្នុងភូមិទួលសាលា ឃុំព្រៃពួច ស្រុកអង្គស្នួកម្នាក់និងនៅក្នុងភូមិត្រពាំងឈើនាង ឃុំពើក ស្រុកអង្គស្នួល ខេត្តកណ្ដាល២នាក់ ។
នគរបានឲ្យឲ្យដឹងថា ជនសង្ស័យដែលត្រូវចាប់ខ្លួនទាំង៣នាក់ខាងលើនោះ រួមមាន១-ឈ្មោះប៉ាណា រ៉ូ ភេទប្រុស អាយុ១៩ឆ្នាំ មុខរបរមិនពិតប្រាកដ មានទីលំនៅក្នុងភូមិត្រពាំងឈើនាង ឃុំពើក ស្រុកអង្គស្នួល ខេត្តកណ្តាល ២-ឈ្មោះស៊ឹម វ៉ៃយុ ភេទប្រុសអាយុ១៨ឆ្នាំ មុខរបរមិនពិតប្រាកដ មានទីលំនៅក្នុងភូមិទឹកជា ឃុំពើកស្រុកអង្គស្នួលខេត្តកណ្តាល និង៣-ឈ្មោះរឿង រដ្ឋា ហៅទុយ ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅក្នុងភូមិទួលសាលា ឃុំព្រៃពួច ស្រុកអង្គស្នួល ខេត្តកណ្តាល។
ដោយឡែកបក្ខពួកចំនួន៦នាក់ទៀត ក្នុងនោះ៣នាក់កំពុងរត់គេចខ្លួន រួមមាន១-ឈ្មោះឈន សាណូត ហៅឈន ពុយ ភេទប្រុស អាយុ២២ឆ្នាំ មានទីលំនៅក្នុងភូមិស្រែផ្សារ ឃុំក្រាំងអំពិល ស្រុកសំរោងទង ខេត្តកំពង់ស្ពឺ ជននេះគឺជាមេខ្លោង ២-ឈ្មោះសែ សុត្រារិទ្ធ ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅក្នុងភូមិតានួន សង្កាត់កំបូលខណ្ឌកំបូល រាជធានីភ្នំពេញ។ ៣-ឈ្មោះណៃ តូណាភេទប្រុសអាយុ១៩ឆ្នាំជនជាតិខ្មែរ មុខរបរមិនពិត នៅភូមិព្រៃកុដិ សង្កាត់កំបូល ខណ្ឌកំបូល។
តាមប្រភពខាងលើបានបញ្ជាក់ថា រីឯ៣នាក់ទៀតកំពុងជាប់ពន្ធនាគារខេត្តកណ្ដាលរួមមាន១-ឈ្មោះសេង សុបញ្ញាហៅអាញ៉ា ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅក្នុងភូមិវត្តភ្នំ ឃុំភ្នំតូចស្រុកឧដុង្គ ខេត្តកំពង់ស្ពឺ ២-ឈ្មោះខាន់ សំណាងហៅ តុង ភេទប្រុសអាយុ១៨ឆ្នាំ មុខរបរមិនពិតនៅភូមិអង្គស្នួលទី៣ ឃុំពើក ស្រុកអង្គស្នួលខេត្តកណ្តាល និង៣-ឈ្មោះលន ឆៃយុត ភេទប្រុស អាយុ២០ឆ្នាំ មុខរបរមិនពិតប្រាកដ មានទីលំនៅក្នុងភូមិអង្គស្នួលទី២ ឃុំពើក ស្រុកអង្គស្នួល ខេត្តកណ្តាល។ ជនសង្ស័យទាំង៣ខាងក្រោមនេះត្រូវបានកម្លាំង នគរបាលស្រុកអង្គស្នួលធ្វើការចាប់ខ្លួនបញ្ជូនទៅកាន់សាលាដំបូងខេត្តកណ្ដាល ហើយតុលាការបានចេញដីការសម្រេចឃុំខ្លួននៅពន្ធនាគារខេត្តកណ្តាល កាលពីថ្ងៃទី២ ខែមីនា ឆ្នាំ២០២០ ពីបទលួចមានស្ថានទម្ងន់ទោស(ប្លន់ម៉ូតូ)។
ចំណែកជនរងគ្រោះនៅក្នុងអំពើប្លន់នោះ ត្រូវបានស្គាល់ម្នាក់ឈ្មោះចេង សុវណ្ណ ភេទប្រុស អាយុ១៦ឆ្នាំ មុខរបរជាងប៉ះកង់រថយន្ត ស្នាក់នៅក្នុងភូមិព្រៃគោឃុំលំហាច ស្រុកអង្គស្នួល ខេត្តកណ្តាល។
តាមប្រភពដដែលបានបន្តថា ក្រុមជនសង្ស័យបានធ្វើសកម្មភាពប្លន់យកម៉ូតូពីអ្នកដំណើរតាមផ្លូវយ៉ាងកក្រើកនិងបានសម្រេចជាច្រើនលើក ហើយលើកចុងក្រោយនៅវេលាម៉ោង៩និង៤០នាទី យប់ថ្ងៃទី២៣ ខែមិនា ឆ្នាំ២០២០ បក្ខពួកដែលនៅសេសសល់ពីជាប់ពន្ធនាគារបានធ្វើសកម្មភាពធាក់ប្លន់យកម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០២០ ពីក្មេងប្រុសជំទង់រងគ្រោះខាងលើនៅតាមផ្លូវជាតិលេខ៤១ ស្ថិតនៅក្នុងភូមិពន្លឺ ឃុំលំហាច ស្រុកអង្គស្នួល ខេត្តកណ្តាល រួចគេចខ្លួនបាត់ស្រមោល។
តាមប្រភពដដែលបានបន្តទៀតថា ខណៈនោះកម្លាំងនគរបាលស្រុកអង្គស្នួលដឹកនាំដោយលោកវរសេនីយ៍ឯកមាន សំណាង អធិការនគរបាលស្រុក បានចុះធ្វើការស្រាវជ្រាវ រហូតដល់ថ្ងៃទី២៩ ខែមិនា ឆ្នាំ២០២០ ទើបបានទទួលព័ត៌មាននិងរូបថត មុខសញ្ញាជនសង្ស័យម្នាក់ឈ្មោះរឿន រដ្ឋាហៅទុយ ដែលផ្ដល់ជូនដោយនគរបាលខណ្ឌកំបូល រាជធានីភ្នំពេញ ។ ពេលនោះនគរបាលស្រុកអង្គស្នួលចុះទៅចាប់ខ្លួនជននោះរួមបក្ខពួក២នាក់ទៀត នាំយកមកសាកសួរ រីឯបក្ខពួកដែលនៅសល់ពីការចាប់ខ្លួននិងជាប់ពន្ធនាគារចំនួន៣នាក់កំពុងរត់គេចខ្លួននៅឡើយក្នុងនោះមានម្នាក់ជាមេខ្លោងទៀតផង។
តាមប្រភពដដែលបានបន្តទៀតថា ក្រោយពេលចាប់ខ្លួន កម្លាំងសមត្ថកិច្ចដកហូតបានទូរស័ព្ទ១គ្រឿង, ម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៌ខ្មៅពាក់ស្លាកលេខ កណ្តាល ១AA-៣៩០៩ ដែលជនសង្ស័យជិះធ្វើសកម្មភាព។
លុះក្រោយពេលសួរនាំ ជនសង្ស័យទាំង៣នាក់បានឆ្លើយសារភាពថា ពួកខ្លួនធ្លាប់ធ្វើសកម្មភាពធាក់ប្លន់យកម៉ូតូបានសម្រេចចំនួន៦លើកមកហើយ ក្នុងនោះគឺលើកទី១-នៅផ្លូវ១០០ម៉ែត្រ ស្ថិតនៅក្នុងភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ធាក់ប្លន់យកបានម៉ូតូម៉ាកហុងដា ឌ្រីមសេ១២៥ ស៊េរីឆ្នាំ២០២០ មួយគ្រឿង លើកទី២-នៅចំណុចមុខវត្តចំបក់ តាមផ្លូវលេខជាតិលេខ៤ ស្ថិតនៅក្នុងខេត្តកំពង់ស្ពឺ ធាក់ប្លន់យកបានម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៦ឡើងតែមស៊េរីឆ្នាំ២០១៩ មួយគ្រឿង ។
លើកទី៣-នៅក្នុងភូមិរោងដំរី ឃុំភ្នំតូច ស្រុកឧដុង្គ ខេត្តកំពង់ស្ពឺ ធាក់ប្លន់យកបានម៉ូតូម៉ាកហុងដាឌ្រីសេ១២៥ស៊េរីឆ្នាំ២០២០មួយគ្រឿង។ ទី៤-នៅចំណុចអូក្រាំងអំបិល តាមផ្លូវជាតិលេខ៤ ស្ថិតនៅក្នុង ខេត្តកំពង់ស្ពឺ ធាក់ប្លន់យកបានម៉ូតូម៉ាកហុងដាឌ្រីមសេ១២៥ស៊េរីឆ្នាំ២០២០សង់មួយគ្រឿង។
លើកទី៥-នៅតាមផ្លូវជាតិលេខ៤១ត្រង់ចំណុចម្តុំផ្សារវត្តអង្គ ស្ថិតនៅក្នុងខេត្តកំពង់ស្ពឺ ធាក់ប្លន់យកបានម៉ូតូ១គ្រឿង ម៉ាកហុងដាឌ្រីសេ១២៥ ស៊េរីឆ្នាំ២០១៨ និងលើកទី៦-នៅតាមផ្លូវជាតិលេខ៤១ ស្ថិតនៅក្នុងភូមិពន្លឺ ឃុំលំហាច ស្រុកអង្គស្នួល ខេត្តកណ្តាល វេលាម៉ោង៩និង៤០នាទីយប់ថ្ងៃទី២៣ ខែមិនា ឆ្នាំ២០២០ ធាក់ប្លន់យកបានម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០២០ ។
ក្រោយពេលប្លន់បានសម្រេច មេខ្លោងឈ្មោះឈន សាណូត ហៅឈន ពុយ ជាអ្នកយកម៉ូតូទៅលក់នៅក្នុងខេត្តកំពង់ស្ពឺ ប៉ុន្តែពួកខ្លួនដែលជាកូនក្រុមមិនស្គាល់ទីកន្លែងឡើយហើយក៏មិនដឹងម៉ូតូ១គ្រឿងលក់បានលុយប៉ុន្មានដែរ តែក្រោយពេលលក់ម្ដងៗចែកលុយគ្នាក្នុងម្នាក់ៗ ជួនកាលបាន១០០ដុល្លារទៅ១៥០ដុល្លារប៉ុណ្ណោះ ៕ (កែសម្រួលដោយ ៖ ធីតា)
ចែករំលែកព័តមាននេះ