ក្រុមផលិតរថយន្ត Formula 1 (F1) របស់ក្រុមហ៊ុន Mercedes បានសហការជាមួយគ្លីនិកនៅមហាវិទ្យាល័យ UCLH និងវិស្វករសាកលវិទ្យាល័យនៅទីក្រុងឡុងដ៍ ដើម្បីរចនាឧបករណ៍ជំនួយផ្លូវដង្ហើម សម្រាប់អ្នកកើតជំងឺរលាកផ្លូវដង្ហើមដែលបណ្តាលមកពីវីរុស Covid-19 ដែលអាចនឹងចំណាយរយៈពេលក្នុងការផលិតយ៉ាងឆាប់រហ័សបំផុត ។
តាមពិតទៅឧបករណ៍វាស់សម្ពាធខ្យល់ Continuous Positive Airway Pressure (CPAP) ត្រូវបានប្រើប្រាស់រួចហើយនៅក្នុងមន្ទីរពេទ្យ ប៉ុន្តែបច្ចុប្បន្នកំពុងតែខ្វះខាត ទើបក្រុមហ៊ុនខាងលើសម្រេចរួមគ្នាធ្វើការផលិតបន្ថែមទៀត ឱ្យសមស្របទៅតាមតម្រូវការនាពេលកំពុងជួបវិបត្តិនេះ ។
ឧបករណ៍ CPAP បច្ចុប្បន្នក៏ត្រូវបានប្រើប្រាស់នៅមន្ទីរពេទ្យក្នុងប្រទេសចិន និងអ៊ីតាលីផងដែរ ដើម្បីព្យាបាលអ្នកជំងឺដែលមានផ្ទុកវីរុស Covid-19 ។ មានការខ្វះខាតយ៉ាងខ្លាំងនៃបំពង់ខ្យល់ជំនួញផ្លូវដង្ហើមនៅក្នុងប្រទេសជាច្រើន រួមទាំងចក្រភពអង់គ្លេសផងដែរ ។
ឧបករណ៍ថ្មីចំនួន ៤០គ្រឿងត្រូវបានបញ្ជូនទៅកាន់ ULCH និងមន្ទីរពេទ្យក្រុងឡុងដ៍ចំនួន ៣ផ្សេងទៀត ។ ប្រសិនបើការសាកល្បងដំណើរការល្អ ម៉ាស៊ីន CPAP អាចនឹងផលិតបានរហូតដល់ ១.០០០គ្រឿងក្នុងមួយថ្ងៃដោយក្រុមហ៊ុន Mercedes-AMG-HPP ៕ (ដកស្រង់ចេញពី CNN)
ចែករំលែកព័តមាននេះ