ប្រទេសមីយ៉ាន់ម៉ា ៖ ពលករចំណាកស្រុកម្នាក់បានបដិសេធមិនព្រមចូលក្នុងភូមិកំណើតរបស់គាត់នោះទេ នៅពេលដែលគាត់ត្រឡប់មកពីប្រទេសថៃវិញ ដោយសារការភ័យខ្លាចថា គាត់មានជំងឺកូវីដ១៩ គាត់បានសម្រេចចិត្តរើសទៅនៅក្នុងផ្ទះមួយនៅលើដើមឈើ រហូតទាល់តែច្បាស់ថា គាត់មិនមានជំងឺនេះ។ បុរសដែលមិនត្រូវបានគេប្រាប់ឈ្មោះនោះ…
ប្រទេសមីយ៉ាន់ម៉ា ៖ ពលករចំណាកស្រុកម្នាក់បានបដិសេធមិនព្រមចូលក្នុងភូមិកំណើតរបស់គាត់នោះទេ នៅពេលដែលគាត់ត្រឡប់មកពីប្រទេសថៃវិញ ដោយសារការភ័យខ្លាចថា គាត់មានជំងឺកូវីដ១៩ គាត់បានសម្រេចចិត្តរើសទៅនៅក្នុងផ្ទះមួយនៅលើដើមឈើ រហូតទាល់តែច្បាស់ថា គាត់មិនមានជំងឺនេះ។
បុរសដែលមិនត្រូវបានគេប្រាប់ឈ្មោះនោះ គឺស្ថិតក្នុងចំណោមពលករដែលបានវិលត្រឡប់ទៅស្រុកកំណើតនៅប្រទេសមីយ៉ាន់ម៉ាវិញ តាមរយៈស្ពានមិត្តភាពថៃ-មីយ៉ាន់ម៉ាទី២ នៅស្រុក Mae Sot។
ប៉ុន្តែនៅពេលដែលគាត់ទៅដល់ភូមិរបស់គាត់នៅខេត្ត Hpa-an ក្នុងរដ្ឋ Karen ប្រជាជននៅទីនោះ បានបដិសេធមិនអនុញ្ញាតឱ្យគាត់ចូលនោះទេ។ អ្នកស្រុកបានប្តេជ្ញាថា នឹងរារាំងពលករពីប្រទេសថៃ និងប្រទេសដទៃទៀតចូលក្នុងភូមិ លើកលែងតែពួកគេបានឆ្លងកាត់ការនៅដាច់ដោយឡែករយៈពេល១៤ថ្ងៃសិន។
ដូច្នេះបុរសរូបនោះក៏បានសង់ផ្ទះមួយនៅលើដើមឈើ ហើយបានរស់នៅក្នុងផ្ទះនោះដូចជាបក្សីនៅក្នុងសំបុកអញ្ចឹង។ ហើយសាច់ញាតិរបស់គាត់ ក៏បានទុកអាហារ និងទឹកឱ្យគាត់នៅក្បែរគល់ឈើដែលគាត់រស់នៅនោះផងដែរ។
បើគិតមកដល់ថ្ងៃអាទិត្យ គាត់បាននៅទីនោះតែម្នាក់ឯងអស់រយៈពេលប្រាំពីរថ្ងៃហើយ។ គាត់នៅខ្វះតែមួយសប្តាហ៍ទៀតប៉ុណ្ណោះ គឺអាចទៅរស់នៅក្នុងភូមិដូចគេដូចឯងបានហើយ។
គួរបញ្ជាក់ផងដែរថា ពលករចំណាកស្រុកមីយ៉ាន់ម៉ា ប្រហែល១ម៉ឺននាក់បានវិលត្រឡប់ទៅផ្ទះរបស់ពួកគេវិញ ចាប់តាំងពីរដ្ឋាភិបាលថៃប្រកាសអាសន្ន ហើយពួកគេបានចាប់ផ្តើមបិទប្រទេស ដើម្បីការពារការរីករាលដាលនៃវីរុសកូវីដ១៩នេះ៕ ដកស្រង់ចេញពីវេបសាយ ៖ bangkokpost (កែសម្រួលដោយ ៖ បុប្ផា)
ចែករំលែកព័តមាននេះ