រហូតមកដល់ពេលនេះ ក្រុមគ្រូពេទ្យកម្ពុជាបានបំពេញការងារបានយ៉ាងល្អដោយ ទទួលបាន ការសរសើរពី សម្តេចតេជោហ៊ុនសែន ក្រសួងសុខាភិបាលនិង អ្នកជំងឺផងដែរ។ ដោយសារតែការប្រឹងប្រែងទាំងកម្លាំងកាយ និងចិត្តក្រុមគ្រូពេទ្យកម្ពុជាបានព្យាបាលជាសះស្បើយ អ្នកជំងឺកូវីដ១៩…
រហូតមកដល់ពេលនេះ ក្រុមគ្រូពេទ្យកម្ពុជាបានបំពេញការងារបានយ៉ាងល្អដោយ ទទួលបាន ការសរសើរពី សម្តេចតេជោហ៊ុនសែន ក្រសួងសុខាភិបាលនិង អ្នកជំងឺផងដែរ។
ដោយសារតែការប្រឹងប្រែងទាំងកម្លាំងកាយ និងចិត្តក្រុមគ្រូពេទ្យកម្ពុជាបានព្យាបាលជាសះស្បើយ អ្នកជំងឺកូវីដ១៩ ចំនួន២៣នាក់ ខណៈដែល៨៤នាក់ទៀត ស្ថិតក្រោមការព្យាបាល ។ ទន្ទឹមជាមួយគ្នានោះក៏ប្រឆាំងឈ្នះកូវីដ១៩ មិនអោយជីវិតមនុស្សណាម្នាក់បាត់បង់ឡើយ រហូតមកទល់ពេលនេះ ។
សម្តេចតេជោហ៊ុនសែន នៅថ្ងៃទី៣០ ខែមិនា បាននិយាយនៅក្នុងសន្និសីទកាសែតថា សម្តេចសូមសរសើរដល់ក្រុមគ្រូពេទ្យកម្ពុជាទាំងអស់ដែលបានប្រឹងប្រែងសមត្ថភាពដើម្បីពិនិត្យ និងព្យាបាលអ្នកជំងឺកូវីដ១៩ ។
ទន្ទឹមជាមួយគ្នានោះ សម្តេចក៏បានបង្ហាញពីការយកចិត្តទុកដាក់របស់រដ្ឋាភិបាល ចំពោះក្រុមគ្រូពេទ្យទាំងអស់ដែលកំពុងបំពេញការងារប្រយុទ្ឋប្រឆាំងនឹងជំងឺកូវីដ១៩ដែលកំពុងតែសម្លាប់មនុស្សយ៉ាងច្រើន ដែលគេគិតថា នឹងអាចឈានដល់ខ្ទង់២០០ ០០០នាក់នៅពេលខាងមុខ ។ ផែនការទិញម៉ាស ជាច្រើនលាន និងសម្លៀកបំពាក់គ្រូពេទ្យសម្រាប់ធ្វើការប្រឆាំងនឹងគ្រូពេទ្យចំនួន ៥០០០ សម្រាប់ ការលើកទឹកចិត្តជាផ្នែកហិរញ្ញវត្ថុ គឺស្ថិតនៅក្នុងចំណោមវិធានាការជាច្រើនទៀត ដែលរដ្ឋាភិបាលមាន ដើម្បីជាការគាំទ្រគ្រប់បែបយ៉ាងដល់ក្រុមគ្រូពេទ្យកម្ពុជា ។
ការលះបង់របស់ក្រុមគ្រូពេទ្យកម្ពុជាក៏សមនឹងទទួលបានការគោរព និងស្រឡាញ់អស់ពីដួងចិត្តរបស់ប្រជាជនកម្ពុជាគ្រប់រូប ខណៈដែលគ្រូពេទ្យទាំងនោះបានធ្វើការទាំងថ្ងៃ ទាំងយប់ និងឃ្លាតឆ្ងាយពីកូន ប្រពន្ធ ឪពុកម្តាមួយរយៈ ។ ពិសេសជាងនេះទៀតនោះ គឺក្រុមគ្រូពេទ្យកម្ពុជាបានប្រថុយជីវិតខ្លួន ដើម្បីជីវិតអ្នកជំងឺ ។
ប្រជាជនកម្ពុជាម្នាក់ៗត្រូវប្រែក្លាយការគោរព និងស្រឡាញ់របស់ខ្លួនចំពោះក្រុមគ្រូពេទ្យកម្ពុជាអោយទៅជាការចូលរួមដ៏សកម្ម ដើម្បីប្រយុទ្ឋនឹងការឆ្លងរាលដាលនៃមេរោគកូវីដ១៩ ។ ប្រជាជនកម្ពុជាត្រូវតែធ្វើយ៉ាង ណាការពារខ្លួនអោយបានពីការឆ្លងមេរោគកូវីដ១៩ ដើម្បីកុំអោយបន្ទុកកាន់តែច្រើនឡើងបានធ្លាក់ទៅលើគ្រូពេទ្យ។
បទពិសោធន៍នៅប្រទេសជាច្រើនបានបង្ហាញថា ការចូលរួមរបស់ប្រជាជន គឺមានសារសំខាន់ខ្លាំងណាស់នៅក្នុងការប្រឆាំងនឹងកូវីដ១៩នេះហើយ ពេលខ្លះកូវីដ១៩បានឆ្លងដល់មនុស្សច្រើន ហួសហេតុដែលសឹងតែធ្វើអោយហួសសមត្ថភាពនៃប្រព័ន្ឋសុខាភិបាលប្រទេសទាំងមូលដូចជា នៅប្រទេសអ៊ីតាលី និងអេស្ប៉ាញជាដើម ។ សំខាន់ជាងនេះការចូលរួមរបស់ប្រជាជនម្នាក់ៗនៅក្នុងសមរភូមិប្រឆាំងកូវីដ១៩នេះ គឺជាការការពារជីវិតខ្លួនឯងដោយផ្ទាល់។
សម្តេចតេជោហ៊ុនសែនក៏បានអំពាវនាវអោយប្រជាជនកម្ពុជាម្នាក់ៗយកចិត្តទុកដាក់ថែរក្សាសុខភាពរបស់ខ្លូន ហើយចេះការពារខ្លួន ដើម្បីកុំអោយឆ្លងមេរោគកូវីដ១៩ និងការចម្លងទៅកាន់មនុស្សជាទីស្រឡាញ់ និងអ្នកផ្សេងទៀត ។
ខណៈដែលករណីឆ្លងមេរោគកូវីដនៅកម្ពុជាភាគច្រើន គឺនាំចូលពីក្រៅប្រទេសនោះ សម្តេចបាន អំពាវនាវអោយប្រជាជនកម្ពុជាទាំងអស់ដែលវិលត្រឡប់មកពីការធ្វើដំណើរក្រៅប្រទេស ពិសេស ពលករជាងប្រាមម៉ឺននាក់ដែលវិលត្រឡប់មកពីប្រទេសថៃយល់ពីភាពចាំបាច់ដែលត្រូវដាក់ខ្លួនឯងអោយនៅដោយឡែករយៈពេល១៤ថ្ងៃ ដើម្បីតាមដានសុខភាពផ្ទាល់ខ្លួនផង និងដើម្បីបង្ការការចម្លងមេរោគកូវីដ១៩ ទៅមនុស្សដែលនៅជិតខ្លួនពិសេស ប្តីប្រពន្ឋ និងកូនជាដើម ។ ចំណែកប្រជាជននៅក្នុងប្រទេសត្រូវយល់ថា ការលាងសម្អាតដៃជាមួយទឹកនិងសាប៊ូ ឬក៏ការប្រើអាល់កុល ឬជែលសម្លាប់មេរោគគឺជាអាវុធការពារមួយប្រឆាំងនឹងមេរោគកូវីដ១៩។
សម្តេចថែមទាំងបង្ហាញថាសូម្បីសម្តេចក៏ចាត់ទុកទឹកអាកុលលាងដៃជាអាវុធដែលសម្តេចយកតាមខ្លួន ដើម្បីការពារប្រឆាំងនឹងមេរោគកូវីដ១៩ផងដែរ ។ ដូច្នេះប្រជាជនកម្ពុជាទាំងអស់ត្រូវតែធ្វើតាមការណែនាំរបស់ប្រមុខរាជរដ្ឋភិបាលដើម្បី ជីវិតនិងសុខភាពផ្ទាល់ខ្លួនផងនិងដើម្បីមនុស្សជាទីស្រឡាញ់និងប្រជាជាតិទាំងមូល ។
ការដាក់ខ្លួនដោយឡែករយៈពេល១៤ថ្ងៃ នៅពេលសង្ស័យមានការឆ្លងមេរោគកូវីដ១៩ ការចេះវិធីបង្ការ ការពារខ្លួន តាមរយៈការលាងដៃការប្រើម៉ាសមុខ ការស្ថិតនៅឆ្ងាយពីគ្នាយ៉ាងតិចពីរម៉ែត្រ ការមិនធ្វើដំណើរទៅកាន់ទីប្រជុំជនមានមនុស្សច្រើន ការមិនធ្វើដំណើរចេញក្រៅប្រទេសដោយមិនចាំបាច់ ការលាងសម្អាត របស់របរប្រើប្រាស់ កន្លែងធ្វើការ និងផ្ទះសម្បែង ជាដើមគឺជាអ្វីដែលប្រជាជន កម្ពុជាត្រូវអនុវត្តអោយបានដើម្បីប្រយុទ្ឋប្រឆាំងនឹងកូវីដ១៩ ។
សមរភូមិប្រឆាំងនឹងសត្រូវគ្មានរូបនេះនឹងមិនអាចជោគជ័យបានឡើយ បើសិនជាគ្មានការចូលរួម របស់ប្រជាជនកម្ពុជាទាំងអស់ដែលត្រួវចេះវិធីការពារខ្លួនប្រឆាំងនឹងមេរោគកូវីដ១៩តាមរយះការតានដាននិងអនុវត្តអោយបានតាមការណែនាំដែលដាក់ចេញដោយរដ្ឋាភិបាលនិងក្រសួងសុខាភិបាលក្នុងការប្រយុទ្ឋប្រឆាំងនឹងជំងឺកូវីដ១៩។
យើងនឹងធ្វើដំណើរទៅមុខជាមួយគ្នាជាប្រជាជាតិដ៏រឹងមាំមួយជាមួយមួយនឹងការសម្លឹងចង់ឃើញជ័យជំនះធំមួយនៅកម្ពុជាក្នុងការប្រឆាំងនឹងមេរោគកូវីដ១៩ ។ ដូច្នេះយើងត្រូវតែចូលរួមទាំងអស់គ្នាប្រឆាំងនឹងកូវីដ១៩ ៕
ចែករំលែកព័តមាននេះ