ការផ្ទុះនៃវីរុសកូវីដ ១៩ ដែលកំពុងតែធ្ងន់ធ្ងរឡើងពីមួយថ្ងៃទៅមួយថ្ងៃកំពុងតែជះឥទ្ធិពលយ៉ាងខ្លាំងដល់អាជីវកម្មគ្រប់ទីន្លែងនិងគ្រប់វិស័យ ។ ប៉ុន្តែយោងទៅតាមលោក នីខូឡាស បា (Nicholas Bahr) ដែលជាអ្នកជំនាញផ្នែកគ្រប់គ្រងហានិភ័យបានចែករំលែកពីវិធីសាស្ត្រសំខាន់ៗដែលអាជីវកម្មអាចអនុវត្តក្នុងកំឡុងពេលដែលពោរពេញទៅដោយភាពមិនប្រាកដប្រជានេះ ។
១. មើលថែបុគ្គលិករបស់ខ្លួន
អាជីវករត្រូវតែរក្សាទំនាក់ទំនងយ៉ាងសកម្មជាមួយនឹងបុគ្គលិកដើម្បីយល់ពីឥទ្ធិពលដែលពួកគេបានទទួលរងពីវីរុសនេះ និងផ្តល់ការធានាដល់ពួកគេព្រមទាំងប្រាប់ពីគម្រោងការរបស់អ្នកដែលអាចជួយដល់ពួកគេបានជាដើម ។
២. រក្សាទំនាក់ទំនងជាមួយអតិថិជន
ក្នុងគ្រាដែលមានអាសន្ន ជំនឿទុកចិត្តគឺពិតជាមានតម្លៃណាស់ ដូច្នេះអាជីវករត្រូវតែធានាដល់អតិថិជន អ្នកជាក់ពាក់ព័ន្ធដទៃ និងសាធារណៈជនថាអ្នកកំពុងតែមានវិធានការគ្រប់គ្រាន់ដើម្បីទប់ទល់នឹងការផ្ទុះវីរុសនេះហើយ ព្រមទាំងមានការចូលរួមក្នុងការបង្កើតដំណោះស្រាយផងដែរ ។ ប្រព័ន្ធសង្គម គឺជាមធ្យោបាយងាយ និងមានប្រសិទ្ធិភាពជាងគេសម្រាប់ចំណុចនេះ ។
៣. វិភាគមើលការផ្គត់ផ្គង់
អ្នកត្រូវវិភាគឡើងវិញថាអតិថិជនអ្នកនៅតែរក្សាតម្រូវការ និងបន្តទិញពីអ្នកទេ ហើយតើក្នុងពេលបច្ចុប្បន្ននេះ ពួកគេត្រូវការអ្វីពីអ្នក ។ បន្ទាប់មកអ្នកត្រូវនិយាយជាមួយអ្នកផ្គត់ផ្គង់ឲ្យបានច្បាស់ពីអ្វីដែលពួកគេអាចផ្តល់ដល់អ្នក ។
៤. ប្រើពេលទំនេររបស់អ្នកឲ្យបានល្អ
ប្រសិនបើអាជីវកម្មអ្នកកំពុងតែមានសភាពស្ងប់ស្ងាត់ជាងមុន អ្នកអាចយកពេលវេលាដែលទំនេរដើម្បីគិតពីសេវាកម្ម ឬផលិតផលថ្មីៗដែលអ្នកអាចសាកល្បងបានពេលដែលស្ថានការល្អប្រសើរជាងមុន ។ ជាមួយគ្នានេះដែរ អ្នកគួរតែរៀបចំការងាររបស់បុគ្គលិកឡើងវិញដើម្បីជៀសវាងមិនឲ្យពួកគេមានអារម្មណ៍ថាខ្លួនគ្មានការងារធ្វើ ៕
ចែករំលែកព័តមាននេះ