ខេត្តបន្ទាយមានជ័យ ៖ បើទោះបីជាបន្ទាត់ព្រំដែនខេត្តស្រះកែវថៃជាប់ខេត្តបន្ទាយមានជ័យកម្ពុជាត្រូវភាគីថៃបិទស្ទើរតែទាំងស្រុងក្តី ប៉ុន្តែពលករវិលត្រឡប់ពីថៃតាមព្រំដែនក្នុងខេត្តបន្ទាយមានជ័យកើតមានជាបន្តបន្ទាប់ ព្រោះបារម្ភឆ្លងមេរោគកូវីដ១៩ ម្យ៉ាងទៀតខ្លាចថៃបិទព្រំដែនរយៈពេលយូរ។ គេសង្កេតឃើញថា ការវិលត្រឡប់របស់ពលករកើតមានតាមច្រកទ្វារអន្តរជាតិផង ច្រកតំបន់ផង និងរបៀងផង…
ខេត្តបន្ទាយមានជ័យ ៖ បើទោះបីជាបន្ទាត់ព្រំដែនខេត្តស្រះកែវថៃជាប់ខេត្តបន្ទាយមានជ័យកម្ពុជាត្រូវភាគីថៃបិទស្ទើរតែទាំងស្រុងក្តី ប៉ុន្តែពលករវិលត្រឡប់ពីថៃតាមព្រំដែនក្នុងខេត្តបន្ទាយមានជ័យកើតមានជាបន្តបន្ទាប់ ព្រោះបារម្ភឆ្លងមេរោគកូវីដ១៩ ម្យ៉ាងទៀតខ្លាចថៃបិទព្រំដែនរយៈពេលយូរ។
គេសង្កេតឃើញថា ការវិលត្រឡប់របស់ពលករកើតមានតាមច្រកទ្វារអន្តរជាតិផង ច្រកតំបន់ផង និងរបៀងផង សរុបរាប់រយនាក់ចាប់តាំងពីភាគីថៃបិទព្រំដែនកាលពីថ្ងៃទី២៣ មីនា ឆ្នាំ២០២០។
លោកសេម មករា ប្រធានសេនាធិការនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតបានប្រាប់តាមទូរស័ព្ទថា ចំនួនពលករវិលត្រឡប់ពីថៃដែលជាប់គាំងលើដីថៃ ហើយសមត្ថកិច្ចថៃសហការល្អប្រគល់ពលករឲ្យភាគីកម្ពុជាតាមច្រកទ្វារអន្តរជាតិប៉ោយប៉ែតចាប់តាំងពីថ្ងៃទី២៣ មកទល់ថ្ងៃទី៣០ មីនា ឆ្នាំ២០២០នេះមានចំនួន១៣៩៨នាក់ ក្នុងនោះស្ត្រី៦៧៦នាក់ និងកុមា៤៥នាក់។
លោកបញ្ជាក់ថា ក្នុងចំណោមពលករទាំងនេះ មានពលករម្នាក់ជាអ្នកទោសជាប់ពាក់ព័ន្ធគ្រឿងញៀនដែលភាគីថៃទើបដោះលែង ។ ដោយឡែកបន្ទាត់ព្រំដែនខាងត្បូងផ្លូវជាតិលេខ៥ ក្នុងស្រុកម៉ាឡៃ ត្រូវបានមន្ត្រីសមត្ថកិច្ចជួរមុខប្រាប់តាមទូរស័ព្ទថា មានពលករវិលត្រឡប់ពីថៃតិចតួច តាមច្រករបៀង និងតំបន់ម៉ាឡៃជួន១ថ្ងៃ១០នាក់ ជួន១ថ្ងៃមានតែ៣ទៅ៤នាក់តែប៉ុណ្ណោះ។
លោកបានបញ្ជាក់បន្តថា ចំណែកបន្ទាត់ព្រំដែនខាងជើងផ្លូវជាតិលេខ៥ ចាប់ពីក្រុងប៉ោយប៉ែត រហូតដល់ស្រុកថ្មពួក ច្រករបៀងចំការគរ ស្ថិតក្នុងស្រុកស្វាយចេក មានពលករវិលត្រឡប់ពីថៃច្រើនជាងគេ ខណៈច្រកតំបន់បឹងត្រកួន ត្រូវមន្ត្រីជួរមុខប្រាប់ថាចាប់តាំងពីភាគីថៃបិទច្រកព្រំដែនថ្ងៃទី២៣ មីនា មកដល់ថ្ងៃទី៣០ មីនា នេះ គេប្រគល់ពលករត្រឡប់មកវិញចំនួន៣៥នាក់។
លោកបានបញ្ជាក់បន្តទៀតថា បើទោះជាថ្នាក់ដឹកនាំជួរមុខក៏ដូចជាប្រធានមណ្ឌលសំចតរបស់ក្រសួងសង្គមកិច្ចដែលមានទីតាំងនៅក្រុងប៉ោយប៉ែតមិនប្រាប់ពីទិន្ន័យពិតប្រាកដ តែការវិលត្រឡប់របស់ក្រុមពលករពីប្រទេសថៃត្រូវមន្ត្រីជួរមុខប្រាប់ថា ពលករទាំងអស់ក្រោយឆ្លងព្រំដែនដល់កម្ពុជានឹងត្រូវមន្ត្រីជំនាញនិ ងគ្រូពេទ្យធ្វើកាពិនិត្យកំដៅ និងតាមដានសុខភាព បន្ទាប់មកដឹកទៅមណ្ឌលសំចតរបស់ក្រសួងសង្គមកិច្ចដើម្បីពិនិត្យសុខភាព និងតាមដានកំដៅ ពិសេសស្រង់សាវតាររបស់ពលករទាំងអស់ផងដែរមុនឲ្យបន្តដំណើរទៅលំនៅដ្ឋានវិញរៀងៗខ្លួនវិញ។
លោកឧត្តមសេនីយ៍ត្រីឃួន ជឿន មេបញ្ចាការយោធាកងការពារព្រំដែនលេខ៥០៣ប្រាប់តាមទូរស័ព្ទថាច្រករបៀងចំកាគរក្នុងស្រុកស្វាយចេកមានពលករវិលត្រឡប់ពីថៃជារៀងរាល់ថ្ងៃ ក្រោយពីភាគីថៃបិទព្រំដែន ប៉ុន្តែលោកថា ថ្ងៃខ្លះតិច ថ្ងៃខ្លះច្រើនរហូតដល់រយនាក់ ហើយកម្លាំងជួរមុខដឹកនាំដោយលោកឧត្តមសេនីយ៍ទោឈុន ម៉ៅ មេបញ្ជាការរងយោធភូមិភាគ៥ និងជាមេបញ្ជាការទិសទីបន្ទាយមានជ័យបានសហការណ៍ជាមួយអាជ្ញាធរ និងមន្ត្រីជំនាញទទួលពលករពីភាគីថៃ ដោយការពារសុត្ថិភាពពួកគេយ៉ាងយកចិត្តទុកដាក់បំផុត។
តាមប្រភពព័ត៌មានខ្លះថា មានពលករវិលត្រឡប់ពីថៃតាមច្រករបៀងខាងលើជាង១០០នាក់គិតត្រឹមម៉ោងជិត៣រសៀលថ្ងៃទី៣០ មីនា ឆ្នាំ២០២០នេះ។ ស្ថានភាពក្រោយរកឃើញអ្នកផ្ទុកមេរោគថ្មីកូវីត១៩ ក្រោយស្ថាប័នជំនាញរកឃើញអ្នកមានមេរោគថ្មីកូវីដ១៩ ចំនួន២នាក់ នៅក្រុងប៉ោយប៉ែត ដែលម្នាក់ជាស្ត្រីបំរើការងារនៅខារ៉ាអូខេ និងម្នាក់ទៀតជាបុគ្គលិកកាស៊ីណូនៅក្រុងប៉ោយប៉ែត អ្នកស្រុកហាក់មានការបារម្ភអំពីជំងឺឆ្លងនេះកាន់តែខ្លាំង ហើយពួកគាត់ក៏កាន់តែពង្រឹងការប្រុងប្រយ័ត្នតាមគ្រួសាផងដែរ។
ជាមួយគ្នានេះប្រភពព័ត៌មានខ្លះទៀតថា មានអ្នកសង្ស័យ២២នាក់ដែល២០នាក់ជាបុគ្គលិកកាស៊ីណូកំពុងគេដាក់នៅដោយឡែកដើម្បីតាមដានសុខភាព។ ចំណែកទិដ្ឋភាពទឹកដីកាស៊ីណូ ក្រោយភាគីថៃបិទច្រកថ្មើជើងលើស្ពានព្រំដែនច្រកទ្វារអន្តរជាតិប៉ោយប៉ែតខ្លងលឹក ហើយបើកឲ្យដំណើរកាតែទ្វារធំលើស្ពានព្រំដែនដើម្បីឲ្យរថយន្តខ្លួនឆ្លងទៅមកដឹកទំនិញ ទិដ្ឋភាពកាស៊ីណូជាច្រើននៅជាយដែនក្នុងក្រុងប៉ោយប៉ែតហាក់ស្ងប់ស្ងាត់ ព្រោះគ្មានភ្ញៀវចូលលេង ។
តាមប្រភពពីបុគ្គលិកកាស៊ីណូមួយចំនួននិយាយថា ក្រោយពីភាគីថៃបិទអ្នកដំណើរថ្មើជើងមិនឲ្យឆ្លងព្រំដែនស្ទើរគ្រប់កាស៊ីណូបានឲ្យបុគ្គលិកផ្អាកការងារបណ្តោះអាសន្នដូចគ្នា ធ្វើឲ្យពួកគេព្រួយបារម្ភពីបញ្ហាជីវិភាពផងដែរ បើស្ថានភាពជំងឺកូវីដ១៩នេះមិនថមថយ ជាពិសេសព្រំដែននៅតែបន្តជាប់គាំង ខណៈប្រភពខ្លះបារម្ភខ្លាចឆ្លងជំងឺ បើសិនកាស៊ីណូនៅបើកដំណើរការ ។ សាកសួរតាមទូរស័ព្ទពីចំនួនកាស៊ីណូនៅជាយដែនក្រុងប៉ោយប៉ែត មន្ត្រីជំនាញនៅមាត់ច្រកទ្វារអន្តរជាតិប៉ោយប៉ែតម្នាក់សុំមិនបញ្ចេញឈ្មោះប្រាប់ថាពីមុនលោកដឹងត្រឹមតែ១១កាស៊ីណូទេ ៕ (កែសម្រួលដោយ ៖ ធីតា)
ចែករំលែកព័តមាននេះ