ក្នុងពេលដែលមនុស្សសាមញ្ញព្យាយាមចៀសពីកន្លែងមានមនុស្សច្រើនដោយស្នាក់នៅផ្ទះ អ្នកមានទ្រព្យសម្បត្តិស្តុកស្តម្ភកំពុងតែជម្លៀសខ្លួនទៅកាន់បន្ទប់ក្រោមដី ឬកោះឯកជនដើម្បីចៀសផុតពីកូវីដ ១៩ ។
ក្រុមហ៊ុន Rising S Company ដែលជាក្រុមហ៊ុនសាងសង់បន្ទប់ក្រោមដី និងបន្ទប់ការពារគ្រាប់បែក បានមើលឃើញមានអតិថិជនចាប់អារម្មណ៍កាន់តែច្រើនបើធៀបនឹងឆ្នាំមុន ។ លោកនាយកប្រតិបត្តិ ក្លាយដ៍ ស្កត (Clyde Scott) របស់ក្រុមហ៊ុនខាងលើបានឲ្យដឹងថា ទោះជាក្រុមហ៊ុនលោកដំណើរការអាជីវកម្មនៅសហរដ្ឋអាមេរិកពិតមែនក្តី លោកបានទទួលបានការសាកសួរពីមនុស្សជុំវិញពិភពលោកដែលរួមមានប្រទេសដែលលោកមិនធ្លាប់មានអតិថិជននៅពីមុនមកជាដើម ។ លោកបានចែករំលែកថា បន្ទប់ក្រោមដីដែលទាក់ទាញអតិថិជនច្រើនជាងគេជាមធ្យមមានតម្លៃប្រមាណ ១៥ម៉ឺនដុល្លារ ។
លោក ឡារី ហល (Larry Hall) ដែលជាម្ចាស់ក្រុមហ៊ុន Survival Condo ដែលជាក្រុមហ៊ុនសាងសង់បន្ទប់ក្រោមដីនៅសហរដ្ឋអាមេរិកផងដែរបាននិយាយថា លោកក៏ទទួលបានអតិថិជនកាន់តែច្រើនសាកសួរព័ត៌មានពីលោកដែរតាំងពីមានការផ្ទុះវីរុសកូវីដ ១៩ ។ លោក ហល បានប្រាប់មកទៀតថា លោកមានអតិថិជនម្នាក់ដែលបានសម្រេចចិត្តទិញបន្ទប់ក្រោមដីទាំងដែលមិនធ្លាប់មកមើលផ្ទាល់ភ្នែកម្តងផង ។ អតិថិជនថ្មីៗរួមមានមកពីតំបន់មជ្ឈឹមបូព៌ា ចក្រភពអង់គ្លេស ជប៉ុន និងបារាំងជាដើម ។ អ្នកដែលមានទ្រព្យសម្បត្តិស្តុកស្តម្ភដទៃទៀតងាកទៅចាប់អារម្មណ៍កោះឯកជនវិញដើម្បីរក្សាគម្លាតពីវីរុសដ៏កាចសាហាវ ។
លោក គ្រីស ក្រូឡូ (Chris Krolow) ដែលជានាយកប្រតិបត្តិរបស់ក្រុមហ៊ុនមួយដែលលក់ និងជួលកោះឯកជនបានប្រាប់មកថា ការស្នាក់នៅមួយយប់មានតម្លៃប្រមាណ ២,៩៥០ដុល្លារស្រាប់មនុស្សពីរនាក់សម្រាប់អ្នកដែលចាប់អារម្មណ៍ចង់ជួលកោះមួយទាំងមូល ។
ក្រៅពីនេះហើយ លោក ចនណាថាន់ បេកខេត (Jonathan Beckett) ដែលជានាយកប្រតិបត្តិរបស់ក្រុមហ៊ុន Burgess Yachts បានប្រាប់ថាមនុស្សដទៃទៀតសម្រេចចិត្តជួលនាវាធំៗវិញដើម្បីរក្សាគម្លាត ។ នៅលើនាវារបស់លោក កូនៗអាចទទួលបានការបង្រៀនគួរផ្ទាល់ខ្លួន ហើយសមាជិកដទៃអាចរៀនធ្វើម្ហូបជាមួយចុងភៅលើនាវាជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ