រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា គ្មានការបិទផ្សារធំៗនៅក្នុងទីក្រុងភ្នំពេញ ដូចការលើកឡើងរបស់ជនមួយចំនួននោះទេ។
សម្តេចតេជោបានលើកឡើងក្នុងសន្និសីទសារព័ត៌មាននាព្រឹកថ្ងៃទី៣០ ខែមីនា ឆ្នាំ២០២០ នៅវិមានរដ្ឋសភាយ៉ាងដូច្នេះថា ៖ «បញ្ហាការបិទក្រុង ការបិទប្រទេស ការបិទផ្សារលក់ដូរ ការបិទភោជនីយដ្ឋាន ការបិទហាងការហ្វេ ការបិទហាងទំនិញនោះមិនឈានដល់នោះទេ ។ ការធ្វើនេះគឺគិតពីដំណើរសេដ្ឋកិច្ចប្រទេស ហើយក្នុងនោះដំណើររោង ចក្រមិនបិទនោះទេ »។
សម្តេចបន្តថាការមិនបិទកន្លែងខាងលើនេះ ព្រោះវាជាកន្លែងធ្វើឲ្យដំណើរការសេដ្ឋកិច្ចជាតិដើរ។ ប៉ុន្តែដើម្បីទប់ស្កាត់ការរីករាដាលជំងឺកូវីដ១៩នេះមធ្យោបាយការដឹកជញ្ជូនរបស់មួយចំនួនបានបិទជាបណ្តោះអាសន្ន ក្នុងនោះមានរថយន្តក្រុង និងកាណូត។
ជាមួយគ្នានោះដែរ សម្តេចបញ្ជាឲ្យសមត្ថកិច្ចចុះចាប់ខ្លួនអ្នកដែលលក់ថ្នាំដែលថាព្យាបាលជំងឺកូវីដ១៩ជាដែលគ្មានការទទួលស្គាល់ពីអង្គការសុខភាពពិភពលោកផងដែរ។ ម្សិលមិញនេះមានបទបញ្ជាជាបន្ទាន់ឲ្យមានការរឹបអូសនូវឧបករណ៍ធ្វើតេស្ត រកមេរោគកូវីដ១៩ ។ ឥឡូវសូមឲ្យគ្រប់ទីកន្លែងទាំងអស់រុករកទៀតចំពោះអ្វីដែលអង្គការសុខភាពពិភពលោកមិនទទួលស្គាល់ ត្រូវរឹបអូសយកមកដោយបំផ្លាញចោលតែម្តង។
សម្តេចក៏បានអំពាវនាវដល់អាជីវករទាំងអស់ដែលកំពុងធ្វើអាជីវកម្មនូវអ្វីដែលមិនប្រាកដនេះ សូមឈប់ ព្រោះថាប្រជាជនកំពុងតែជួបបញ្ហាកូវីដ១៩។ អីចឹង ឧបករណ៍ធ្វើតេស្តនេះមិនពិតប្រាកដទេ ដូច្នេះសូមកំុចាញ់បោកអ្នកណាឲ្យសោះ សូម្បីវិទ្យាស្ថានប៉ាស្ទ័រក៏គេវិភាគរាប់ម៉ោងបានឃើញ តែគេថាធ្វើតេស្តភ្លាមឃើញ អីចឹងកុំជឿ។
ជាមួយគ្នានោះដែរសម្តេចក៏បានអំពាវនាវទៅដល់ប្រជាពលរដ្ឋខ្មែរទាំងអស់ កុំឲ្យទិញ ឬកុំជឿ ឧបករណ៍ធ្វើតេស្តខ្លួនឯង រកវីរុស កូវីដ-១៩ ដែលអង្គការសុខភាពពិភពលោក ក្រសួងសុខាភិបាលកម្ពុជា មិនទទួលស្គាល់។
សម្តេចក៏បានឲ្យភាគីពាក់ព័ន្ធ បន្ដរុករកបន្ថែមទៀត កុំឲ្យមានចរាចរនៅកម្ពុជា។
សម្តេចលើកឡើងយ៉ាងម៉ឹងម៉ាត់ថា៖ «ហើយគួរត្រូវបំផ្លាញចោលតែម្ដង ហើយសូមអំពាវនាវ ចំពោះអាជីវករទាំងឡាយ មិនប្រាកដ កុំបង្កើតបញ្ហាប្រជាជនកំពុងរង់គ្រោះស្រាប់ ទៅលើបញ្ហា កូវីដ-១៩។ចឹង ឧបករណ៍ធ្វើតេស្តនេះ វាមិនអាចទៅរួមទេ? សូមបងប្អូនប្រជាពលរដ្ឋរបស់យើង កុំចាញ់បោកអ្នកណាឲ្យសោះ សូម្បីតែវិទ្យាស្ថានប៉ាស្ទ័រ ក៏ត្រូវរង់ចាំរាប់ម៉ោង អាចដឹងអំពីលទ្ធផល ហេតុអ្វី? បានជាឧបករណ៍ធ្វើតេស្ត ចាក់ហើយថា មានរោគ ឬមិនមានរោគ ចំណុចនេះសូមឲ្យអាជីវករមួយចំនួន គឺត្រូវមានការយកចិត្តទុកដាក់ កុំឲ្យប្រជាជនរងគ្រោះដោយសារយើង ហើយសូមកុំឲ្យបំផុស ថ្នាំនេះលេបទៅជា ថ្នាំនោះលេបទៅជា»។
សម្តេចក៏បានបញ្ជាក់ថា នៅលើពិភពលោកមិនទាន់មានប្រទេសណាមួយ ឬអង្គការសុខភាពពិភពលោក ក៏មិនទាន់អះអាងថា មានវ៉ាក់សាំងការពារជំងឺ កូវីដ-១៩ ទេ៕ (កែសម្រួលដោយ ៖ ធីតា)
ចែករំលែកព័តមាននេះ