ខេត្តព្រះសីហនុ ៖ កាលពីវេលាម៉ោង៩និង២៥នាទីព្រឹកថ្ងៃទី៣០ ខែមីនា ឆ្នាំ២០២០ តាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ១៤៩-១៥០ ស្ថិតក្នុងភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សីលា ខេត្តព្រះសីហនុ មានករណីគ្រោះថ្នាក់ចរាចរណ៍រវាងរថយន្តប្រភេទបែនកង់១០មួយគ្រឿងធ្វើដំណើរពីខេត្តព្រះសីហនុទៅភ្នំពេញ បានបុកគ្នាជាមួយរថយន្តមួយគ្រឿងទៀតម៉ាកមីតស៊ុយប៊ីស៊ី ក្នុងទិសដៅបញ្ច្រាសគ្នា បណ្តាលឱ្យរថយន្តទាំង២គ្រឿងរងការខូចខាតយ៉ាងដំណំ និងរបួសធ្ងន់២នាក់ ស្រាល២នាក់ ។
ភាគីខាងរថយន្តប្រភេទបែនកង់១០មួយគ្រឿង ពណ៌ត្រីអុី ពាក់ស្លាកលេខ ខេមរភូមិន្ទ 05-3-1968 បើកបរដោយឈ្មោះ ភួន ភិន ភេទប្រុស អាយុ៤៧ឆ្នាំ មានទីលំនៅភូមិក្រាំងខ្ចាយ ឃុំតាំងខ្ចារ ស្រុកភ្នំស្រួច ខេត្តកំពង់ស្ពឺ បានរងរបួសធ្ងន់ និងប្រពន្ធឈ្មោះញ៉ែម សាវ៉ាង អាយុ៤៥ឆ្នាំ រងរបួសស្រាល ។ ចំណែកភាកីខាងរថយន្តមួយគ្រឿងទៀតម៉ាកមីតស៊ុយប៊ីសុី ពណ៌ស ពាក់ស្លាកលេខ ភ្នំពេញ ២AP-២២១៩ បើកបរដោយឈ្មោះ អាន លីហៀង ភេទប្រុស អាយុ២៤ឆ្នាំ រស់នៅភ្នំពេញ រងរបួសស្រាល និងអ្នករួមដំណើរ ម្នាក់ឈ្មោះ ចាន់ ថាខឹម ភេទប្រុស អាយុ១៨ឆ្នាំ រស់នៅភូមិប៉ោតាសេក ឃុំបឹងព្រីង ស្រុកថ្មគោល ខេត្តបាត់ដំបង រងរបួសធ្ងន់ ។
ក្រោយពេលកើតហេតុ កម្លាំងអាវុធហត្ថស្នាក់ការសន្តិសុខ៤០២ សហការជាមួយកម្លាំងរបស់អធិការដ្ឋាននគរបាលស្រុកកំពង់សីលាចុះទៅពិនិត្យកន្លែងហេតុ និងជួយសំរួលសណ្តាប់ធ្នាប់ ហើយបានបញ្ជូនជនរងគ្រោះទៅសង្គ្រោះនៅមន្ទីរពេទ្យបង្អែកស្រុកស្រែអំបិល ។ រីឯរថយន្តទាំង២គ្រឿងខាងលើត្រូវបានយកទៅរក្សាទុកនៅអធិការដ្ឋាននគរបាលស្រុកកំពង់សីលាបន្តតាមនីតិវិធី៕ (កែសម្រួលដោយ ៖ ធីតា)
ចែករំលែកព័តមាននេះ