ស្របពេលកីឡាបាល់ទាត់ ត្រូវបានផ្អាកនៅចក្រភពអង់គ្លេស និងនៅទូទាំងពិភពលោក ដោយសារការរាតត្បាតនៃវីរុសឆ្លង Covid-19 ប៉ុន្តែការប្រកួតលីគក្នុងប្រទេសបេឡារុស្ស នៅតែបន្តលេងជាធម្មតា ។
ក្របខ័ណ្ឌ Belarusian Premier League ក្នុងប្រទេសនៅទ្វីបអឺរ៉ុបខាងកើត នៅតែបន្តការប្រកួតលីគរបស់ខ្លួនឈានដល់សប្តាហ៍ទី២ ទោះនៅក្នុងកាលៈទេសៈដែលពិភពលោកកំពុងជួបវិបតិ្តយ៉ាងណាក្តី និងបានក្លាយជាកន្លែងតែមួយគត់នៅអឺរ៉ុប ដែលការប្រកួតកីឡាបាល់ទាត់នៅតែបន្តលេង ។
ជាក់ស្តែងកាលពីនៅថ្ងៃសៅរ៍កន្លងទៅ មានការប្រកួតចំនួន៦គូរួមមានការប្រកួតរវាងកំពូលតារាង FC Minsk និងក្រុម Dinamo Minsk ដែលមានអ្នកគាំទ្រចូលរួមទស្សនាចំនួន ៣.០០០នាក់ក្នុងរដ្ឋធានី Minsk ។
អ្នកនាំពាក្យសហព័ន្ធកីឡាបាល់ទាត់បេឡារុស្សលោក Aleksandr Aleinik បានមានប្រសាសន៍ថា «ការប្រុងប្រយ័ត្នត្រូវបានធ្វើឡើងដើម្បីអនុញ្ញាតឱ្យការប្រកួតបន្តទៅមុខ ។ យើងបានអនុវត្តរាល់វិធានការណ៍ ដែលបានណែនាំដោយក្រសួងកីឡា» ។
សូមបញ្ជាក់ថា ប្រទេសបេឡារុស្សក៏មានករណីឆ្លងតិចជាង ១០០ករណី និងពុំទាន់មានអ្នកស្លាប់ដោយសារជំងឺរលាកផ្លូវដង្ហើមបណ្តាលមកពីវីរុស Covid-19 នេះនៅឡើយទេ ។
ខណៈពេលដែលបណ្តាប្រទេសនៅអ៊ឺរ៉ុបភាគច្រើន កំពុងដាក់ប្រទេសក្នុងភាពអាសន្ន និងបិទព្រំដែន ប៉ុន្តែប្រធានាធិបតីបេឡារុស្សលោក Alexander Lukashenko មិនមានការព្រួយបារម្ភឡើយ និងថែមទាំងបានស្នើឱ្យពលរដ្ឋខ្លួនផឹកស្រា Vodka ដើម្បីប្រយុទ្ធប្រឆាំងទៅនឹងវីរុសនេះ ៕ (ដកស្រង់ចេញពី BBC)
ចែករំលែកព័តមាននេះ